ސީޒަންގެ ފުރަތަމަ ލީގު ބައްޔާއި ބެޔާން ކުރިމަތިލާން ޖެހިއްޖެ

ޖަރުމަނު ބުންޑަސް ލީގާގައި މި ސީޒަނުގައި ފުރަތަމަ ފަހަރަށް، ވިންސެންޓް ކޮމްޕެނީގެ ބެޔާން މިއުނިކް ބަލިވެއްޖެއެވެ. މެއިންޒުގެ މެވާ އެރީނާގައި ކުޅުނު މި މެޗުން ބެޔާން ބަލިވީ 2-1 އިންނެވެ. ބެޔާން އިން ލީގުގައި އެންމެ ފަހުން ބަލިވެފައިވަނީ މިދިޔަ ސީޒަނުގެ ފަހު މެޗުގައެވެ.

ބެޔާންއިން މި މެޗު ފެށީ އާދައިގެ މަތިން ވަރަށް ވަރުގަދަ ކޮށެވެ. އަދި ފުރަތަމަ މިނެޓުން ފެށިގެން ވެސް އެ ޓީމު ކުޅެމުން އައީ މެޗުގެ ކޮންޓްރޯލް ނަގައިގެންނެވެ. އަދި އެ ޓީމުގެ އެޓޭކުތަކަށް އެންމެ ބޮޑަށް ސަޕްލައި ކޮށްދެމުން ދިޔައީ މައިކަލް އޮލީސޭއެވެ. އޭނާގެ ހަމަލާއެއް އެއް ފަހަރު ގޯލުގެ ދަނޑިއަށް އަމާޒުވިއިރު، އެހެން ހަމަލާއެއް ދިޔައީ ގޯލު ދަނޑި ކައިރިން ބޭރަށެވެ.

ބެޔާނުން ރަގަޅަށް ކުޅެމުން ދަނިކޮށް، މެއިޒުން އުފެއްދި ކައުންޓަރ އެޓޭކެއްގައި އެ ޓީމުން ލީޑު ނެގިއެވެ. އަރުމިންޑޯ ސިއެބް ބެޔާންގެ ޕެނަލްޓީ އޭރިއާ ތެރެއަށް ހުރަސްކޮށްލި ބޯޅަ ސާފު ނުކޮށްލެވި އުޅެނިކޮށް ލިބުނީ ޖޭ-ސުންގް ލީ އަށެވެ. ގޯލު އޭރިޔާގެ ރޮނގު މަތިން ކަހަލަ ގޮތަކަށް ލިބުނު ބޯޅަ އޭނާވަނީ ގޯލުގެ ކަނާތް ފަރާތަށް ޖައްސާލާ، މެއިންޒަށް ލީޑު ނަގައިދީފައެވެ.

ބެޔާނަށް އެއް ގޯލު ފަހަތުގައި އޮވެ ދެވަނަ ހާފު ފަށަން ޖެހުމުން، އެ ޓީމުގެ ޓެމްޕޯއަށް އެއްވެސް ބަދަލެއް ނުގެނަސް ކުޅެމުން ދިޔައެވެ. ނަމަވެސް އަނެއްކާ ވެސް ފެނުނީ މެއިންޒްގެ ގޯލެކެވެ. މި ގޯލަކީ ވެސް އަރުމިންޑޯ ސިއެބް ހުރަސްކޮށްލި ބޯޅައަކުން ޖޭ-ސުންގް ލީ ކާމިޔާބުކުރި ގޯލެކެވެ. 

ބެޔާން ކުރަމުން ދިޔަ މަސައްކަތުން، މެޗު ނިމުމުގެ ކުރިން އެ ޓީމަށް ގޯލެއް ކާމިޔާބުކުރެވުނެވެ. މެޗު ނިމެން ތިން މިނެޓަށް ވެފައި ވަނިކޮށް މި ގޯލު ކާމިޔާބުކުރީ ލެރޯއީ ސާނޭއެވެ. 

މި މެޗުން ބަލިވި ނަމަވެސް، ބެޔާން އޮތީ 33 ޕޮއިންޓާއެކު ލީގުގެ އެއްވަނައިގައެވެ. ދެވަނައިގައި އޮތް ބެޔާން ލެވަކޫސަންއަށް ލިބިފައިވަނީ 29 ޕޮއިންޓެވެ.