ގޯލްޑް ކަޕް: ގުރުއަތުން ކުއާޓާގެ ޖާގަ ލިބުނީ ފުވައްމުލަކު ސިޓީއަށް

ނައިންޓީ ޕްލަސް ގޯލްޑް ކަޕްގެ ދެވަނަ ބުރުގައި، ގްރޫޕް-އީގެ ހުރިހާ މެޗެއް ކުޅެ ނިމިފައިވައިރު، މި ގްރޫޕުގައި ހިމެނޭ ތިމަރަފުއްޓާއި ފުވައްމުލަކު ސިޓީ ހުރިހާ ގޮތަކުން އެއްވަރުވެފައި ވުމުން، އެ ގްރޫޕުން ގުރައިދޫއާއެކު ކުއާޓާގެ ޖާގަ ޔަގީންކުރާ ދެވަނަ ޓީމެއް ހޮވުމަށް ނެގި ގުރުއަތުލުން ކާމިޔާބުކޮށް، ފުވައްމުލަކު ސިޓީއިން ކުއާޓާ ފައިނަލަށް ދަތުރުކޮށްފިއެވެ.

މި ގްރޫޕުގައި ތިމަރަފުއްޓާއި ފުވައްމުލަކު ސިޓީ ހުރިހާ ގޮތަކުން އެއްވަރުވީ، މުބާރާތުގެ ކުއާޓާ ފައިނަލުން ޖާގައެއް ޔަގީންކޮށްފައި އޮތް ގުރައިދޫއިން ހޮނިހިރު ދުވަހުގެރޭ، މުބާރާތުގައި އެންމެ މޮޅަށް ކުޅެ މިހާތަނަށް އެއްވެސް މެޗަކުން ބަލިވެފައިނުވާ ފުވައްމުލަކު ސިޓީގެ މައްޗަށް 1-0 އިން ކުރިހޯދުމުންނެވެ. އޭގެ ކުރިން ގުރައިދޫއިން ވަނީ ތިމަރަފުށި ވެސް އެ ސްކޯއިން ބަލިކޮށްފައެވެ. އަދި ތިމަރަފުއްޓާއި ފުވައްމުލަކު ސިޓީ ބައްދަލުކުރި މެޗު ވަނީ 1-1 އިން އެއްވަރުވެފައެވެ.

މިއާއެކު މުބާރާތުގެ ކުއާޓާ ފައިނަލަށް ދަތުރުކުރާ 7 ޓީމެއް މިހާރު ވަނީ ޔަގީންވެފައެވެ. އެއީ، ނައިފަރު، ގުރައިދޫ، މާފުށި، އަލިފުށި، މާލޭ ސިޓީ، ފުވައްމުލަށް ސިޓީ އަދި އޭދަފުށްޓެވެ.

މި ބުރުގެ ހުރިހާ މެޗެއް މިއަދު ކުޅެ ނިންމުމަށް ތާވަލުކޮށްފައިވާއިރު، ފަހު މެޗުގައި މިރޭ އައްޑޫ ސިޓީއިން ނިކުންނާނީ ނައިފަރާއި ދެކޮޅަށެވެ. ނައިފަރުން ވަނީ ކުއާޓާގެ ޖާގައެއް މިހާރު ޔަގީންކޮށްފައެވެ. އަދި ކުއާޓާ ފައިނަލުން ޖާގަ ހޯދުމަށް އައްޑޫ ސިޓީއަށް ބޮޑު ފުރުސަތެއް އޮތް އިރު، އެ ޓީމުން ޖެހޭނީ ދެ ގޯލުގެ ތަފާތުން ބަލިނުވެ ސަލާމަތް ވާށެވެ.

މުބާރާތުގެ ކުއާޓާ ފައިނަލް މެޗުތައް ކުޅުމަށް ހަމަޖެހިފައިވަނީ މި ހަފްތާގެ އަންގާރަ ދުވަހާއި ބުދަ ދުވަހުއެވެ.