ކުޅިވަރު
މާލޭ ސިޓީ ދެ ކުޅުންތެރިއެއްގެ ރަށްވެހިކަމުގެ މައްސަލައަކާއި ގުޅިގެން އެ ގްރޫޕްގެ މެޗު ފަސްކޮށްފި
މާލޭ ސިޓީ އާއި އަލިފުށި ބައްދަލު ކުރަން އޮތް މެޗު ވަނީ ފަސްކޮށްފައި
ހުލާސާ
ކުރެންދޫއިން ފޮނުވި ސިޓީގައި ބުނީ، މާލޭ ސިޓީގައި ރަށުން ބޭރު 4 ކުޅުންތެރިން ހިމެނޭ ކަމަށާއި، މާލެ ޓީމުގެ އަހްމަދު މާއިޝް ރަޝީދާއި އަހްމަދު ނާހިލް އިބްރާހިމްއަކީ ވެސް ރަށުން ބޭރު ކުޅުންތެރިން ކަމަށާއި، މި ދެ ކުޅުންތެރިން ނިސްބަތްވަނީ ދ އަތޮޅު ހުޅުދެއްޔަށް ކަމަށް.
ނައިންޓީ ޕްލަސް ގޯލްޑް ކަޕްގެ ދެވަނަ ބުރުގެ ގްރޫޕް-އެޗްގައި ހިމެނޭ މާލޭ ސިޓީ އާއި އަލިފުށި ބައްދަލު ކުރުމަށް ތާވަލުކޮށްފައި އޮތް މެޗު ފަސްކޮށްފިއެވެ. މިއަދު ހަވީރު ކުޅުމަށް ހަމަޖެހިފައި އޮތް މި މެޗަށް ދެ ޓީމުން ވެސް ދަނޑަށް ހާޒިރުވިއެވެ. ނަމަވެސް މުބާރާތުގެ ޑިސިޕްލިނަރީ ކޮމެޓީން މި މެޗު ފަސްކުރީ، މާލޭ ސިޓީއިން މުބާރާތުގެ ގަވާއިދާއި ހިލާފަށް ކުޅުންތެރިން ލައްވާ ކުޅުވި މައްސަލައަކާ ގުޅިގެންނެވެ.
މި ގްރޫޕްގައި މި ދެ ޓީމުގެ އިތުރަށް ދެން ހިމެނޭ ކުރެންދޫއިން މިދިޔަ ބުރާސްފަތި ދުވަހު މާލޭ ސިޓީއާ ދެކޮޅަށް ކުޅުނު މެޗަށްފަހު ހުށަހެޅި މައްސަލައިގައި ބުނެފައިވަނީ، އެ ޓީމާ ދެކޮޅަށް ކުޅުނު މެޗުގައި، ރަށުން ބޭރުން ކުޅުންތެރިންޖެހޭ އުސޫލާ މާލޭ ސިޓީއިން ހިލާފުވެފައިވާ ކަމަށެވެ.
ރަށުން ބޭރު ދެ ކުޅުންތެރިން ހިމެނުމުގެ އިހްތިޔާރު މުބާރާތުގައި ވާދަކުރާ ހުރިހާ ޓީމަކަށް ލިބިފައިވާއިރު، މި ދެ ޖާގައަށް މާލޭ ސިޓީ ޓީމުގައި ހިމަނާފައިވަނީ ރާއްޖޭގެ ފުރަތަމަ ޑިވިޝަނުގައި ވެސް ކުޅެމުން އަންނަ މިސްރުގެ މިޑްފީލްޑަރު ހަލީލް ޖަމާލާއި އަލީ މުނާޒެވެ.
ނަމަވެސް ކުރެންދޫއިން މުބާރާތުގެ އިންތިޒާމު ކޮމެޓީއަށް ހުށަހެޅި ސިޓީގައި ބުނެފައިވަނީ މާލޭ ސިޓީގައި ރަށުން ބޭރު 4 ކުޅުންތެރިން ހިމެނޭ ކަމަށާއި، މާލެ ޓީމުގެ އަހްމަދު މާއިޝް ރަޝީދާއި އަހްމަދު ނާހިލް އިބްރާހިމްއަކީ ވެސް ރަށުން ބޭރު ކުޅުންތެރިން ކަމަށާއި، މި ދެ ކުޅުންތެރިން ނިސްބަތްވަނީ ދ އަތޮޅު ހުޅުދެއްޔަށް ކަމަށެވެ. ހެކީގެ ގޮތުގައި ކުރެންދޫއިން ހުށަހެޅި އައިޑީ ކާޑުގެ ކޮޕީތައް ބުނާގޮތުން އެއީ ތެދެކެވެ.
އަދި އެ ޓީމުން ވަނީ މެޗު ނިމުމާ ހަމައަށް އެ ކުޅުންތެރިންގެ މައުލޫމާތު ފެންނަން ހުރި ގޮތުގެ ސްކްރީން ޝޮޓެއް ވެސް ހިއްސާކޮށްފައެވެ. އެ ސްކްރީންޝޮޓްގައި ބުނާގޮތުން ވެސް އެ ދެ ކުޅުންތެރިން އޮތީ ދ. ހުޅުދެލީގެ ރެޖިސްޓްރީގައެވެ.
އަދި ކުރެންދޫއާ ދެކޮޅަށް ބުރާސްފަތި ދުވަހު ކުޅުނު މެޗުގައި ވެސް މި ދެ ކުޅުންތެރިން ވަނީ މާލޭ ސިޓީ ޓީމުގެ ފުރަތަމަ އެގާރައިގައި ކުޅެފައެވެ.
މި ތުހުމަތު ދޮގުކޮށް މާލޭ ސިޓީ ޓީމުގެ ފަރާތުން ބުނިކަމަށް ހަވީރު ނޫހުގައި ރިޕޯޓުކޮށްފައިވާ ގޮތުން، އެ ދެ ކުޅުންތެރިން ރަޖިސްޓަރީކޮށްފައި ވަނީ ހެންވޭރު ހޮސްޓޮކް ގެއަށެވެ. މާލެ ޓީމުން ވަނީ އެ ދެ ކުޅުންތެރިންގެ އުފަންދުވަހުގެ ސެޓްފިކެޓްތަކުގެ ފޮޓޯ ވެސް ހުށަހަޅައިފައެވެ.
ނައިންޓީ ޕްލަސްއިން ބުނީ އެ މައްސަލަ ލިބިފައިވާ ކަމަށާއި ޑިސިޕްލިނަރީ ކޮމިޓީން ބަލާނެ ކަމަށެވެ.
