އިއްބެގެ ހެޓްރިކަކާއެކު އައްޑޫއިން ގްރޫޕްގެ އެއްވަނަ ޓީމުގެ ގޮތުގައި ކުއާޓާއިން ޖާގަ ހޯދައިފި

ނައިންޓީ ޕްލަސް ގޯލްޑް ކަޕްގައި ދެވަނަ ބުރުގެ ފަހު މެޗުގެ ގޮތުގައި ތާވަލުކޮށްފައި އޮތް ގްރޫޕް-ޖީގެ ފަހު މެޗުގައި އައްޑޫއިން ބޮޑު ތަފާތަކުން ނައިފަރު ބަލިކޮށް، ގްރޫޕްގެ އެއްވަނަ ޓީމުގެ ގޮތުގައި ކުއާޓާ ފައިނަލުން ޖާގަ ހޯދައިފިއެވެ. 

މި މެޗަށް އައްޑޫ ނިކުތްއިރު، އެ ޓީމަށް ކުއާޓާގެ ޖާގައެއް ކަށަވަރު ކުރުމަށް އެއް ޕޮއިންޓުން ވެސް ފަރުޖައްސާލެވެން އޮތެވެ. އަދި މޮޅު ނުވެވުނަސް، 2 ގޯލަށް ވުރެން ތަފާތު ކުޑަ ނަތީޖާއެއް ނަމަ، އެ ޓީމަށް ހަނި ފުރުސަތެއްގައި ކުއާޓާއަށް ދެވުނީހެވެ. އެއީ ނައިފަރަށް މީދޫ ބަލިކޮށް 3 ޕޮއިންޓު ލިބިފައި އޮތް އިރު، އައްޑޫ އާއި މީދޫ ބައްދަލުކުރި މެޗު އެއްވަރުވެ، މީދޫއަށް ގްރޫޕްގެ ހުރިހާ މެޗެއް ހަމަވިއިރު އެއް ޕޮއިންޓު ލިބިފައި އޮތުމުންނެވެ. ނަމަވެސް، ދަނޑަށް ނިކުމެ އައްޑޫ އިން މިވަނީ އިދިކޮޅު ޓީމު 'ސުންނާފަތި' ކޮށްލުމަށްފަހު ކުއާޓާއަށް ދަތުރުކޮށްފައެވެ.

ގަލޮޅު ދަނޑުގައި ކުޅުނު މި މެޗުގައި އައްޑޫއިން ނައިފަރު ބަލިކުރީ 7-2 އިންނެވެ. މި މެޗުގައި އައްޑޫގެ ތަރިއަކީ، ރަށުން ބޭރު ކުޅުންތެރިއެއްގެ ގޮތުގައި އެ ޓީމަށް ކުޅެމުން އަންނަ އިބްރާހިމް ވަހީދު ހަސަންއެވެ. އޭނާ ވަނީ މި މެޗުގައި 4 ގޯލު ކާމިޔާބުކޮށްފައެވެ.

މި މެޗުގައި ފުރަތަމަ ލީޑު ނެގީ ނައިފަރުންނެވެ. އެ ޓީމަށް މި ގޯލު ކާމިޔާބުކޮށްދިނީ ޒުވާން ގައުމީ ޓީމުގެ ފޯވާޑް، މުހައްމަދު އިޒާން އަލީއެވެ. 

ނައިފަރަށް ލީޑު ފުޅާ ނުކުރެވެނީސް، ހާޒިމް ފައުޒީގެ ގޯލަކުން އައްޑޫއިން ވަނީ މެޗުގެ ނަތީޖާ ހަމަހަމަ ކޮށްފައެވެ. އޭގެ ފަހުން އައްޑޫއަށް ލީޑު ނަގައިދިނީ އިބްރާހިމް ވަހީދެވެ. 

އައްޑޫއިން ލީޑު ނެގުމާ ގުޅިގެން ނައިފަރުން މެޗުގެ ނަތީޖާ އަނެއްކާ ވެސް އަނބުރާލުމަށް ކުރަމުން ދިޔަ މަސައްކަތަށް އިތުރު ހިތްވަރެއް ލިބުނީ، އެ ޓީމުގެ ކެޕްޓަނެއްގެ ގޮތުގައި ކުޅެމުން އަންނަ، ފުރަތަމަ ޑިވިޝަނުގައި ކްލަބް އީގަލްސް އާއި ކްލަބް ވެލެންސިއާ އަދި ދެ ވަނަ ޑިވިޝަނުގައި ވިކްޓަރީން ފެނުނު ހުސެއިން ފައިސަލް ކާމިޔާބުކޮށްދިން ގޯލުންނެވެ.  

ނަމަވެސް، މެޗު އަނބުރާލުމުގެ ފުރުސަތެއް އައްޑޫގެ އިބްރާހިމް ވަހީދު ނުދިނެވެ. ނައިފަރުގެ ގޯލަށްފަހު އޭނާ ކާމިޔާބުކުރި 3 ގޯލުން، ނައިފަރު އެއްކޮށް މާޔޫސްކޮށްލިއެވެ. 

މި މެޗުގައި އައްޑޫގެ ހަވަނަ ގޯލު އިބްރާހިމް މަހުދީ ހުސެއިން (ފޭދޫ އިއްބެ) ކާމިޔާބުކުރި އިރު، އެ ޓީމުގެ ހަތް ވަނަ ގޯލު ކާމިޔާބުކުރީ އިސްމާއިލް އީސާ (މެސީ)އެވެ. 

މި ނަތީޖާއާއެކު އައްޑޫއިން ކުއާޓާ ފައިނަލުގެ ޖާގަ ކަށަވަރުކުރީ ގްރޫޕްގެ އެއްވަނަ ޓީމުގެ ގޮތުގައެވެ. 

މި މުބާރާތުގެ ކުއާޓާ ފައިނަލަށް ދަތުރުކުރާ ހުރިހާ ޖާގައެއް މިހާރު ކަށަވަރުވެފައިވީ ނަމަވެސް، މާލޭ ސިޓީއާ ދެކޮޅަށް ފެންމަތިވެގެން އުޅޭ ރަށްވެހިކަމުގެ މައްސަލައަށް އަދި ވަކި ގޮތެއް ނުނިންމައެވެ. މި މައްސަލައާ ގުޅިގެން އެ ޓީމާއި އަލިފުށި ކުޅެން ހަމަޖެހިފައި އޮތް މެޗު ވެސް ވަނީ ފަސްކޮށްފައެވެ. ނަމަވެސް މިހާރު އޮތް ގޮތުން، އެ ގްރޫޕުން ކުއާޓާ ފައިނަލަށް ދަތުރު ކޮށްފައިވަނީ އަލިފުއްޓާއި މާލޭ ސިޓިއެވެ.