ދެ މިނެޓުން ދެ ގޯލު ކާމިޔާބުކޮށް، ޔުނައިޓެޑުން އަވަށްޓެރި ސިޓީ ބަލިކޮށްފި

ފުރަތަމަ ހާފު ކާމިޔާބުކުރި ގޯލަކާއެކު، އިންގްލިޝް ޕްރިމިއަރ ލީގުގެ ޗެމްޕިއަން މެންޗެސްޓަރ ސިޓީއިން ތިން ޕޮއިންޓާއެކު މެޗު ނިންމާލަން ދަނިކޮށް، ފަހު ވަގުތު މެންޗެސްޓަރ ޔުނައިޓެޑުން ނަތީޖާ އަނބުރާލައިފިއެވެ. މި މެޗު 2-1 އިން ޔުނައިޓެޑު ކާމިޔާބުކުރިއިރު، މި ނަތީޖާގައި އެންމެ ބޮޑު ހިއްސާއެއް އޮތީ އެ ޓީމުގެ އަމަދު ޑިއާލޯއެވެ.

ސިޓީއިން އެ ޓީމުގެ އެމިރޭޓްސް ސްޓޭޑިއަމްގައި ޔުނައިޓެޑާ ދެކޮޅަށް ނިކުތީ ޓާބީގެ ފޭވަރިޓުންގެ ގޮތުގައެވެ. ޕެޕް ގާޑިއޯލާގެ ޓީމުން ވަނީ ލީގުގައި ޔުނައިޓެޑާއި ދެކޮޅަށް އެންމެ ފަހުން ކުޅުނު 6 މެޗުގެ ތެރެއިން 5 މެޗު ކާމިޔާބުކޮށްފައެވެ. އަދި އޭގެ ތެރެއިން 3 މެޗު އިއްތިހާދު ސްޓޭޑިއަމްގައި ބޮޑު ތަފާތަކުން ކާމިޔާބު ކޮށްފައިވާއިރު، މި ފަހަކަށް އައިސް ސިޓީގެ ދަނޑަކީ އާންމު ގޮތެއްގައި ޔުނައިޓެޑަށް އޮތް ލަދުވެތިކަމެކެވެ.

އާދީއްތަ ދުވަހުގެރޭ މި ދެ ޓީމު ބައްދަލުކުރި މެޗުގެ ފުރަތަމަ ހާފުގައި ސިޓީއަށް ލިބުނު ކޯނަރަކުން ޖޮސްކޯ ވާޑިއޯލް ބޮލުން ކާމިޔާބުކުރި ގޯލާއެކު، ލީގުގެ އެއްވަނައިގައި އޮތް ލިވަޕޫލާއި ދެމެދު އޮތް ފަރަގު 6 ޕޮއިންޓަށް ކުޑަ ކުރެވޭނެކަމަށް ބެލެވުނެވެ. ނަމަވެސް، ގާޑިއޯލާގެ ޓީމު ފެނުނީ އެ ޓީމުގެ އެންމެ ރަގަޅު ފޯމުގައެއް ނޫނެވެ. 

ދެވަނަ ހާފުގެ ކުރީކޮޅު ޔުނައިޓެޑުން ނުރައްކާތެރި ދެ ހަމަލާއެއް އުފައްދާ، ސިޓީއަށް އިންޒާރު ދިނެވެ. އޭގެ ތެރެއިން ފުރަތަމަ ހަމަލާގައި އަމަދު ބޮލުން ފޮނުވާލި ބޯޅަ ސިޓީގެ ކީޕަރު އެޑަސަން ދިފާއުކުރިއިރު، ބްރޫނޯ ފެނާންޑޭޒްއަށް ލިބުނު ރަނުގެ ފުރުސަތުގައި އޭނާއަށް ގޯލާ އަމާޒެއް ނުކުރެވުނެވެ. 

ޔުނައިޓެޑަށް މެޗުގެ ނަތީޖާ ހަމަހަމަކުރެވުނީ ސިޓީއަށް ހެދުނު ގޯހެއްގެ ބޭނުން ހިފައިގެންނެވެ. އެ ޓީމުގެ މެތިއުޒް ނުނޭސް ފަހަތުން ކީޕަރަށް ކުޅެލި ބޯޅަ އަމަދު ހޯދައި ޕެނަލްޓީ އޭރިއާ ތެރެއަށް ވަނުމުން، ނުނޭސްއަށް ހެދުނު ގޯސް ފޫބައްދަން އޭނާ މަސައްކަތް ކުރިއެވެ. ނަމަވެސް އެ ބޯޅަ ނުހޯދުނު އިރު، އަމަދުއަށް ފައުލްކޮށް އޭނާއަށް ހޯދައިދެވުނީ ޔުނައިޓެޑަށް ޕެނަލްޓީއެކެވެ. 

ފެނާންޑޭޒްގެ ޕެނަލްޓީއިން ޔުނައިޓެޑުން މެޗުގެ ނަތީޖާ ހަމަހަމަ ކުރިއިރު، މެޗު ނިމެން ބާކީ އޮތީ ދެ މިނެޓެވެ. 

އޭގެ ދެ މިނެޓު ފަހުން، ޔުނައިޓެޑުގެ ހާފު ތެރެއިން ލިސާންޑްރޯ މާޓިނޭޒް އަމަދުއަށް މަތިން ފޮނުވާލި ބޯޅަ ފުރަތަމަ ޓަޗުން ރަގަޅަށް ސެޓު ކޮށްލުމަށްފަހު، ދެވަނަ ޓަޗުގައި ގޯލަށް ފޮނުވާލައި، އަމަދު ވަނީ ޔުނައިޓެޑަށް މެޗު ކާމިޔާބުކޮށްދީފައެވެ. 

މި ނަތީޖާއާއެކު 22 ޕޮއިންޓާއެކު ޔުނައިޓެޑު 13 ވަނައިގައި އޮތްއިރު، ލީގުގެ ފަސް ވަނައިގައި އޮތް ސިޓީއާއި ދެމެދު އޮތީ 5 ޕޮއިންޓުގެ ފަރަގެކެވެ.