އަމިއްލަ ދަނޑުގައި ލެގަނޭސް އަތުން ބަލިވެ، ބާސެލޯނާއަށް ލީގުގެ އެއްވަނައިގައި ބާރެއް ނެތް

ސްޕެނިޝް ލަ ލީގާގައި އާދީއްތަ ދުވަހުގެރޭ ބާސެލޯނާއިން ލެގަނޭސްއާ ދެކޮޅަށް ނިކުތް މެޗުން ބަލިވެ، އެ ޓީމަށް ލީގުގެ އެއްވަނައިގައި އޮތް އަމިއްލަ ބާރު ގެއްލިއްޖެއެވެ. އަމިއްލަ ދަނޑުގައި ކުޅުނު މި މެޗު ބާސެލޯނާއަށް 1-0 އިން ގެއްލުމުން، ލީގު ރޭހުގައި ކުރިޔަށް ޖެހިލުމަށް އެންމެ ބޮޑު ފުރުސަތެއް މިހާރު އޮތީ، ބާސެލޯނާއަށް ވުރެން އެއް މެޗު މަދުން ކުޅެފައި އޮތް ރެއާލް މެޑްރިޑާއި އެތުލެޓިކޯ މެޑްރިޑަށެވެ.

މިއީ ބާސެލޯނާއަށް މި ސީޒަނުގައި ކުރިމަތިލާން ޖެހުނު ހަތަރު ވަނަ ލީގު ބައްޔެވެ. އެގޮތުން، އެ ޓީމުގެ އަމިއްލަ ދަނޑުގައި ދެ މެޗުން ބަލިވެފައިވާއިރު، ރަށުން ބޭރުގައި ވެސް ދެ މެޗުން ބަލިވެފައި ވެއެވެ.

ބާސެލޯނާއާ ދެކޮޅަށް ލެގަނޭސްއިން ލީޑު ނެގީ މެޗުގެ 4 ވަނަ މިނެޓުގައެވެ. އެ ޓީމަށް ލިބުނު ކޯނަރު އޮސްކަރ ރޮޑްރިގޭޒް ބާސެލޯނާގެ ޕެނަލްޓީ ބޮކްސް ތެރެއަށް ނަގައިދިންއިރު، އެތާންގައި އެކަނިހުރި ސާޖިއޯ ގޮންޒާލޭސްވަނީ ހާސްކަމެއް ނެތި ބޯޅަ ގޯލަށް ފޮނުވާލާފައެވެ. 

ލެގަނޭސްގެ ގޯލަށްފަހު ބާސެލޯނާއިން އެ ޓީމުގެ ކުޅުން ވަރަށް ބޮޑަށް ރަގަޅު ކުރިއެވެ. އަދި އެ ޓީމުން ވަނީ ފުރަތަމަ ހާފުގައި ގޯލު ޖަހާނެ ފުރުސަތުތައް ވެސް ތަނަވަސްކޮށްފައެވެ. ނަމަވެސް އިދިކޮޅު ޓީމުގެ ގޯލު ކުރިމަތީގައި ބާސެލޯނާގެ ފޯވާޑް، ރޮބަޓް ލެވަންޑޯސްކީ ފެނުނީ ވަރަށް ބީރަށްޓެހި ކޮށެވެ. ލިބުނު އެއްވެސް ފުރުސަތެއް ގޯލުގެ ތެރެއަށް އޭނާއަކަށް ފޮނުވައެއް ނުލެވުނެވެ.

އޭގެ ތެރެއިން މެޗުގެ 10 ވަނަ މިނެޓުގައި ލެވަންޑޯސްކީއަށް ލިބުނު ރަނުގެ ފުރުސަތު ފާހަގަކޮށްލެވެއެވެ. ޕެނަލްޓީ އޭރިޔާ ތެރެއިން ދެ ކުޅުންތެރިން ކައިރިން ނައްޓާލުމަށްފަހު ރަފީނިޔާ ގޯލު ކުރިމައްޗަށް ހުރަސްކޮށްދިން ބޯޅަ ގޯލުގެ ތެރެއަށް ފޮނުވާލުމަށް ލެވަންޑޯސްކީ މަސައްކަތްކުރީ ގޯލު އޭރިޔާގެ ރޮނގު މަތިންނެވެ. ނަމަވެސް ލެގަނޭސްގެ ގޯލްކީޕަރު މާކޯ މިޓްރޮވިޗްއާ ދިމާލަށް ފޮނުވާލެވުނު އެ ބޯޅަ ވަނީ މަތަކޮށްފައެވެ. 

މީގެ އިތުރުން ފުރަތަމަ ހާފުގައި ރަފީނިއާ ފޮނުވާލި ބާރު ބޯޅައެއް ވެސް ލެގަނޭސްގެ ކީޕަރު ސަލާމަތް ކޮށްފައިވެއެވެ. މި ހަމަލާ ދިފާއު ކުރުމަށް ކީޕަރު ފަންޗުކޮށްލި ބޯޅަ ބޭރަށް ދިޔައީ ގޯލުގެ ހުރަސް ދަނޑީގައި ޖެހުމަށްފަހުއެވެ.

ދެވަނަ ހާފުގައި ވެސް މޮޅަށް ކުޅެ، ގިނަ ހަމަލާތަކެއް ވަނީ ބާސެލޯނާއިން އުފައްދާފައެވެ. ނަމަވެސް ލެގަނޭސްގެ ޑިފެންޑަރުން ފެނުނީ ހުޝިޔާރުކޮށެވެ. 

މީގެ އިތުރުން، މި މެޗުގައި އެންމެ އެދެވޭ ކުޅުމެއް ނުދެއްކުމުން، ދެވަނަ ހާފުގެ މެދުތެރެއިން ލެވަންޑޯސްކީ އާއި ލެމިން ޔަމާލް ވަނީ ބަދަލުކޮށްފައެވެ. 

ލީގުގައި ބާސެލޯނާއިން، އެތުލެޓިކޯ މެޑްރިޑާއި ރެއާލް މެޑްރިޑަށް ވުރެން އެއް މެޗު އިތުރަށް ކުޅެފައިވާއިރު، ދެވަނައިގައި އޮތް އެތުލެޓިކޯ އޮތީ އެ ޓީމަށް ވުރެން އެއް ޕޮއިންޓު ފަހަތުގައެވެ. އަދި ރެއާލް އާއި ދެމެދު އޮތީ ދެ ޕޮއިންޓުގެ ފަރަގެކެވެ.

ބާސެލޯނާއަށް ދެން އޮތީ ބޮޑު އިމްތިހާނެކެވެ. އެތުލެޓިކޯ މެޑްރިޑާ ދެކޮޅަށް ކުޅޭ އެ މެޗުން ބާސެލޯނާ ބަލިވެއްޖެނަމަ، އެތުލެޓިކޯ މެޑުރިޑު ލީގުގެ އެއްވަނައަށް އަރާނެއެވެ.