މާލޭގެ ހުރިހާ ޕަމްޕް ސްޓޭޝަނެއްގައި ވައިސާފުކުރާ ނިޒާމް ޤާއިމްކޮށް ނިންމަނީ

އަންނަ އަހަރުގެ ނިޔަލަށް މާލޭގެ ހުރިހާ ޕަމްޕް ސްޓޭޝަންއެއްގައި ވައިސާފުކުރާ ނިޒާމް ހަރުކޮށް ނިންމާލުމަށް މަސައްކަތްކުރައްވަމުން ގެންދަވާކަމަށް މާލޭ ވޯޓަރ އެންޑް ސުވަރޭޖް ކޮންޕެނީ (އެމްޑަބްލިޔުއެސްސީ)ގެ މެނޭޖިން ޑިރެކްޓަރ ޢަބްދުލް މަތީން މުޙައްމަދު ވިދާޅުވެއްޖެއެވެ.

މާލޭގައި ހުންނަ ނަރުދަމާ ނިޒާމުގެ ޕަމްޕް ސްޓޭޝަންތަކުން ނުބައި ވަސް ބޭރުވުމަކީ ރައްޔިތުންގެ އޮތް ބޮޑު ކަންބޮޑުވުމަކަށްވުމާއެކު، އެ މައްސަލައަށް ހައްލެއް ހޯދުމުގެ މަސައްކަތް އެމްޑަބްލިޔުއެސްސީން މިއަހަރުގެ މެދުތެރޭގައި ވަނީ ފަށާފައެވެ.

ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި މަތީން ވިދާޅުވީ މިހާތަނަށް 2 ޕަމްޕް ސްޓޭޝަންއެއްގައި މި ނިޒާމު ހަރުކޮށް ބޭނުންކުރަމުންދާކަމަށެވެ. އޭގެތެރެއިން އެންމެ ފުރަތަމަ ވައި ސާފުކުރާ ނިޒާމު ޤާއިމްކޮށްފައިވަނީ އިންދިރާ ގާނދީ މެމޯރިއަލް ހޮސްޕިޓަލް ސަރަހައްދުގައި ހުންނަ 4 ނަމްބަރ ޕަމްޕް ސްޓޭޝަންގައެވެ.

މަތީން އިތުރަށް ވިދާޅުވީ މިހާރު ބަހައްޓާފައިވާ 2 ނިޒާމުން ވައިސާފު ކުރަނީ 2 ބާވަތެއްގެ ތަކެތިންކަމަށާއި، މާލޭގެ މާހައުލަށް އެންމެ ރަނގަޅު ބާވަތް ދެނެގަތުމަށް މި 2 ނިޒާމުވެސް މޮނިޓަރ ކުރަމުންދާކަމަށެވެ. އެއްކުރެވޭ މަޢުލޫމާތުގެ އަލީގައި އެހެން ޕަމްޕް ސްޓޭޝަންތަކުގައި ވައިސާފުކުރާ ނިޒާމު ޤާއިމުކުރުމުގެ މަސައްކަތް ކުރިއަށް ގެންދާނެކަމަށްވެސް އޭނާ ވިދާޅުވިއެވެ.

އެމްޑަބްލިޔުއެސްސީން ވިދާޅުވެފައިވާ ގޮތުގައި މި ނިޒާމާއެކު ސްޓޭޝަންތަކުން ޖައްވަށް ބޭރުވާ ވައިގެ 99 އިންސައްތަ ސާފުވާނެއެވެ. އަދި މި ނިޒާމު ހިންގުމަށް ބޭނުންކުރާނީ އިޢާދަކުރަނިވި ހަކަތައިން އުފައްދާ ކަރަންޓުކަމަށާއި، މިކަމަށްޓަކައި ސޯލަރ ސިސްޓަމްތަކެއް ހަރުކުރާނެކަމަށްވެސް މަތީން ވިދާޅުވިއެވެ.

މާލޭގައި ޖުމްލަ 9 ޕަމްޕް ސްޓޭޝަން ހުރިއިރު، މި މަޝްރޫޢުގެ ދަށުން އަންނަ އަހަރުގެ ނިޔަލަށް ހުރިހާ ސްޓޭޝަނެއްގައި ވައިސާފުކުރާ ނިޒާމް ޤާއިމްކުރުމަށް ވަނީ ރޭވިފައެވެ.