ސްކޫލް ކުދިން ބައިވެރިކޮށްގެން ހިންގާ ހަރަކާތްތަކަށް އެޑިއުކޭޝަން މިނިސްޓްރީގެ ހުއްދަ ހޯދަންޖެހޭ

ސްކޫލްތަކުގެ ކުދިން ބައިވެރިކޮށްގެން ދައުލަތުގެ އެއްވެސް އިދާރާއަކުން ހަރަކާތެއް ހިންގާ ނަމަ އެ ހަރަކާތަކަށް ހުއްދަ ހޯދުމަށް އެޑިއުކޭޝަން މިނިސްޓްރީން އަންގައިފި އެވެ. މި އެންގުން އަންގާފައިވަނީ ސްޓޭޓް މިނިސްޓަރު އަހުމަދު މުހައްމަދު ސޮއިކުރައްވައި އިއްޔެ ފޮނުއްވި ސާކިއުލާއެއްގައެވެ.

ސަރުކާރުގެ ހުރިހާ އިދާރާއަކާއި ސިޓީ އަދި ލޯކަލް ކައުންސިލްތަކާއި ކްލަބް ޖަމިއްޔާ، ޖަމާއަތްތަކަށް ފޮނުވި މި ސާކިއުލާގައި ބަޔާންކޮށްފައިވަނީ ސްކޫލްތަކުގައި ހިންގާ ހަރަކާތްތަކަކީ ދުރާލައި، ރާވައިގެން ވަކި އިންތިޒާމެއްގެ ތެރެއިން ކުރިއަށް ގެންދާ ހަރަކާތަކަށް ހެދުމަށް ކޮންމެ އަހަރެއްގެ ދިރާސީ އަހަރުގެ ކަލަންޑަރާ އެއްގޮތަށް އެކްޓިވިޓީ ކަލަންޑަރު ވެސް ތައްޔާރުކުރާ ކަމަށެވެ.

ދައުލަތުގެ އިދާރާތަކުން އިންތިޒާމުކުރާ ހަރަކާތެއްގައި ސްކޫލްތަކުގެ ކުދިން ބައިވެރިކުރާ ނަމަ އެއީ ސްކޫލްތަކުގެ އެކްޓިވިޓީ ކަލަންޑަރުގައި ހިމަނާފައި އޮންނަ ހަރަކާތަކަށް ވާން ޖެހޭނެ ކަމަށް ސާކިއުލާގައި ބަޔާންކޮށްފައިވެއެވެ. އަދި މިފަދަ ހަރަކާތްތައް ހިންގާއިރު ކުދިންގެ ކިޔެވުމަށް ބުރޫ ނާރާނެ ގޮތަކަށް އެ ކަމެއް ކުރުމަށް އެޑިއުކޭޝަން މިނިސްޓްރީން އެދިފައިވެއެވެ.

ދައުލަތުގެ އިދާރާއަކުން ސްކޫލްތައް ބައިވެރި ކޮށްގެން ހަރަކާތެއް ހިންގާ ނަމަ ދިރާސީ އަހަރު ފެށުމުގެ ކުރިން މިނިސްޓްރީގެ ހުއްދަ ހޯދުމަށް ވެސް ސާކިއުލާގައި އެދިފައިވެއެވެ. އަދި މިފަދަ ހަރަކާތްތަކާ ގުޅޭގޮތުން ސްކޫލްތަކާ މުއާމަލާތް ކުރަންވާނީ މިނިސްޓްރީގެ ހުއްދަ ހޯދުމަށް ފަހު ކަމަށްވެސް ބަޔާންކޮށްފައިވެއެވެ.

މިގޮތަށް އެންގި ސަބަބެއް ކަމަށް މިނިސްޓްރީން ބުނެފައިވަނީ، ސްކޫލްގެ އެކްޓިވިޓީ ކަލަންޑަރުގައި ކަންކަން ނުހިމަނައި ނުވަތަ މިނިސްޓްރީއާ އެކު، އެކަށީގެންވާ ގޮތަކަށް މަޝްވަރާ ކުރުމެއް ނެތި ސްކޫލްތަކަށް ހުޅުވާލައިގެން އެކިއެކި ހަރަކާތްތަކާއި މުބާރާތްތައް ބައެއް އިދާރާތަކުން ރާވަމުން ގެންދާތީ ކަމަށެވެ. މިގޮތަށް ހަރަކާތްތައް ކުރިއަށް ގެންދިއުމުން ކުދިންގެ އުނގެނުމަށާއި ޓީޗަރުންނާއި ކުދިންގެ ނަފްސާނީ އަދި ޖިސްމާނީ ދުޅަހެޔޮކަމަށް އަސަރު ކުރާ ކަމަށް މިނިސްޓްރީން ފާހަގަކޮށްފައިވެއެވެ.