ޓޮޓެމްހަމްއާ ދެކޮޅަށް ތަފާތު ބޮޑުކޮށް ބަލިވި މެޗަށްފަހު ސައުތެމްޕްޓަންގެ ކޯޗު މަގާމުން ވަކިކޮށްފި

ޓޮޓެންހަމް ހޮޓްސްޕާއާ ދެކޮޅަށް ކުޅުނު މެޗުގައި ސައުތެމްޕްޓަން 5-0 އިން ބަލިވެފައިވަނިކޮށް، އެ ޓީމުގެ ކޯޗު، ރުސެލް މާޓިން ވަޒީފާއިން ވަކިކޮށްފިއެވެ.

އާދީއްތަ ދުވަހުގެރޭ ސައުތެމްޕްޓަންގެ ސެއިންޓް މޭރީސް ސްޓޭޑިއަމްގައި ކުޅުނު މެޗުގެ ފުރަތަމަ ހާފުގައި ޓޮޓެންހަމް އިން އެ ޓީމުގެ 5 ގޯލު ކާމިޔާބުކުރިއިރު، ސައުތެމްޕްޓަން މިހާރު އޮތީ ރެލިގޭޝަނުން ސަލާމަތްވުމަށް ގިނަ މަސައްކަތްތަކެއް ކުރަން ޖެހިފައެވެ. 

މި ސީޒަނުގައި ސައުތެމްޕްޓަން 16 މެޗު ކުޅެފައިވާއިރު، އެ ޓީމަށް ކާމިޔާބު ކުރެވިފައިވަނީ އެންމެ މެޗެކެވެ. އަދި ލީގުގެ 17 ވަނައިގައި އޮތް ޓީމާ ދެމެދު 9 ޕޮއިންޓުގެ ފަރަގެއް ވެސް އެބައޮތެވެ. 

ރުސެލް މަގާމުން ވަކިކުރިކަން އިއުލާން ކުރުމަށް އެ ކުލަބުން ނެރުނު ބަޔާނެއްގައި ބުނީ، ޓީމުގެ ނަތީޖާތައް ރަގަޅު ކުރުމަށް އަވަސް ފިޔަވަޅުތަކެއް އަޅަން ޖެހިފައިވާކަމަށް ޓީމުގެ މުޅި ބޯޑާއި، ރުސެލް ވެސް ގަބޫލުކުރާ ކަމަށެވެ. އަދި ޕްރިމިއަރ ލީގަކީ ދުނިޔޭގެ އެންމެ ވާދަވެރި ލީގަށް ވީހިނދު، އެ ލީގުގައި ރަގަޅު ނަތީޖާތަކެއް ހޯދޭނީ ވަރަށް ބޮޑަށް މަސައްކަތްކޮށްގެން ކަމަށެވެ. 

މީގެ އިތުރުން، އިނގިރޭސި ޗެމްޕިއަންޝިފުން ޕްރިމިއަރ ލީގަށް ޓީމު ޕްރޮމޯޓު ކޮށްދިނުމަށް ރުސެލް ކުރި މަސައްކަތަށް ސައުތެމްޕްޓަން އިން ވަނީ އޭނާ އާއި ޓީމަށް ޝުކުރު އަދާކޮށްފައެވެ.

ޓޮޓެންހަމްއާ ދެކޮޅަށް ކުޅުނު މެޗުގައި އެ ޓީމުގެ ޖޭމްސް މެޑިސަން ވަނީ ފުރަތަމަ މިނެޓުގައި އެ ޓީމަށް ލީޑު ނަގައިދީފައެވެ. އަދި ސައުތެމްޓަނަށް ރިކަވަރ ކުރާނެ އެއްވެސް ފުރުސަތެއް ނުދީ، އެ ޓީމުގެ ލީޑު ވަނީ މެޗުގެ 12 ވަނަ މިނެޓުގައި، ސޮން ހިއުން-މިންގެ ގޯލަކުން ފުޅާ ކޮށްފައެވެ. 

ޓޮޓެންހަމްގެ ތިން ވަނަ ގޯލާއި ހަތަރު ވަނަ ގޯލު ކްލުސެވްސްކީ އާއި ސާރ ކާމިޔާބުކުރިއިރު، ފުރަތަމަ ހާފުގެ އިތުރު މިނެޓުގައި ފަސް ވަނަ ގޯލު ކާމިޔާބު ކުރީ އަނެއްކާ ވެސް މެޑިސަންއެވެ.

މި ނަތީޖާއާއެކު ޓޮޓެންހަމް ލީގުގެ 10 ވަނައަށް އަރާފައިވާއިރު، ގަދަ ހަތަރަކާއި ދެމެދު އޮތީ 5 ޕޮއިންޓެވެ.