ފަތުރުވެރިކަމުގެ ދާއިރާގެ ޖީ.އެސް.ޓީ ރޭޓް ބަދަލުވުމާ ގުޅިގެން ދުރާލާ ތައްޔާރުވުމަށް މީރާއިން އިލްތިމާސްކޮށްފި

ފަތުރުވެރިކަމުގެ ދާއިރާގެ ޖީ.އެސް.ޓީ ރޭޓަށް އަންނަ ބަދަލާ ގުޅިގެން، އެ ދާއިރާގެ ޚިދުމަތްތައް ފޯރުކޮށްދޭ ފަރާތްތަކުން މިކަމަށް ދުރާލާ ތައްޔާރުވުމަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން އިލްތިމާސްކޮށްފިއެވެ.

މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް 7 ވަނަ އިޞްލާޙު ގެނައުމުގެ ޤާނޫނުގެ ދަށުން، 2025 ވަނަ އަހަރުގެ ޖުލައި މަހުގެ 1 ވަނަ ދުވަހުން ފެށިގެން ފަތުރުވެރިކަމުގެ ދާއިރާގެ ޖީ.އެސް.ޓީ ރޭޓް 16 އިންސައްތައިން 17 އިންސައްތައަށް ބަދަލުވާނެ ކަމަށް މީރާއިން މަޢުލޫމާތު ދީފައިވެއެވެ. މި ބަދަލާ ގުޅިގެން، އެ ތާރީޚުގެ ފަހުން ޖީ.އެސް.ޓީ ލާޒިމުވާ ވަގުތު އަންނަ ފަތުރުވެރިކަމުގެ ދާއިރާގެ މުދަލާއި ޚިދުމަތުގެ މުޢާމަލާތްތަކުން ޖީ.އެސް.ޓީ ނަގަންވާނީ އައު ރޭޓުގައި ކަމަށް މީރާއިން ބުނެފައިވެއެވެ.

މި ބަދަލަށް ތައްޔާރުވުމުގެ ގޮތުން، ސިސްޓަމްތަކަށް ގެންނަންޖެހޭ ބަދަލުތައް ގެނައުމަށާއި، ފަތުރުވެރިކަމުގެ ދާއިރާގެ މުދަލާއި ޚިދުމަތުގައި އެ ތާރީޚުން ފެށިގެން އައު ރޭޓުތައް ހިމަނައިގެން އަގު ޖެހުމަށްޓަކައި ކުރަންޖެހޭ ކަންތައްތައް ދުރާލާ ރާވައިގެން ކުރިއަށް ގެންދިއުމަށް މީރާއިން ވަނީ އިލްތިމާސްކޮށްފައެވެ.

މީރާއިން އިތުރަށް ފާހަގަކޮށްފައިވާ ގޮތުގައި، ފަތުރުވެރިކަމުގެ ދާއިރާގެ ޖީ.އެސް.ޓީއަށް ރަޖިސްޓަރީކޮށްފައިވާ ފަރާތަކީ 24 ގަޑިއިރުގެ އުސޫލުން ވިޔަފާރިކުރާ ފަރާތެއް ކަމުގައިވާނަމަ، 2025 ޖުލައި 1 ވަނަ ދުވަހުގެ 00:00 ގެ ކުރިން ފޯރުވައިދޭ ފަތުރުވެރިކަމުގެ ދާއިރާގެ މުދަލާއި ޚިދުމަތުގެ އަގުން ޖީ.އެސް.ޓީ ނަގަންވާނީ 16 އިންސައްތައިގެ ރޭޓުންނެވެ. އަދި އެ ދުވަހުގެ 00:00 ގައި ނުވަތަ އޭގެ ފަހުން ފޯރުވައިދޭ ފަތުރުވެރިކަމުގެ ދާއިރާގެ މުދަލާއި ޚިދުމަތުން ޖީ.އެސް.ޓީ ނަގަންވާނީ 17 އިންސައްތައިގެ ރޭޓުންނެވެ.