ޚަބަރު
ރައީސުލްޖުމްހޫރިއްޔާ ބަހުރެއިނުގެ ޤައުމީ ދުވަހުގެ މުނާސަބަތުގައި ތަހުނިޔާ ފޮނުއްވައިފި

ރާއްޖެ އަދި ބަހުރެއިންގެ ޤައުމީ ދިދަ ފޮޓޯ: ފަރުުދުން
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ބަހުރެއިނުގެ ޤައުމީ ދުވަހުގެ މުނާސަބަތުގައި އެ ޤައުމުގެ ރަސްގެފާނު އަދި ބޮޑުވަޒީރަށް ތަހުނިޔާގެ ސިޓީ ފޮނުއްވައިފިއެވެ. މި ސިޓީ ފޮނުއްވާފައިވަނީ މި މަހުގެ 16 ވަނަ ދުވަހު ފާހަގަކުރާ ބަހުރެއިނުގެ ޤައުމީ ދުވަހާ ގުޅިގެންނެވެ.
ރައީސް މުޢިއްޒު ފޮނުއްވި ސިޓީގައި، ބަހުރެއިނުގެ ރަސްގެފާނު ހިޒް މެޖެސްޓީ ކިންގް ހަމަދު ބިން އީސާ އަލް ޚަލީފާ އަދި އެ ޤައުމުގެ ބޮޑުވަޒީރު އަދި ވަލީ އަހުދު ހިޒް ރޯޔަލް ހައިނެސް ޕްރިންސް ސަލްމާން ބިން ހަމަދު އަލް ޚަލީފާއަށް ދިވެހި ސަރުކާރާއި ރައްޔިތުންގެ ހޫނު މަރުހަބާއާއި ތަހުނިޔާ އަރިސްކުރައްވާފައިވެއެވެ.
މީގެ އިތުރުން، ދެ ޤައުމުގެ ދެމެދުގައި އޮތް އަޚުވަންތަ ގުޅުމާއި އެއްބާރުލުން އިތުރަށް ހަރުދަނާވެގެންދާނެ ކަމުގެ ޔަޤީންކަން ރައީސް މުޢިއްޒު ފާޅުކުރައްވާފައިވެއެވެ. އަދި ބަހުރެއިނުގެ ރަސްގެފާނާއި ބޮޑުވަޒީރުގެ ދުޅަހެޔޮކަމަށާއި، ބަހުރެއިނުގެ ރައްޔިތުންގެ ކުރިއެރުމާއި ފާގަތިކަމަށް އެދި ދުޢާ ކުރައްވާފައިވެއެވެ.
ބަހުރެއިނުގެ ޤައުމީ ދުވަސް ފާހަގަކުރަނީ ކޮންމެ އަހަރެއްގެ ޑިސެމްބަރު 16 ވަނަ ދުވަހުއެވެ. ދިވެހިރާއްޖެއާއި ބަހުރެއިނާ ދެމެދު ޑިޕްލޮމެޓިކް ގުޅުން ޤާއިމުކޮށްފައިވަނީ 1980 ވަނަ އަހަރުގެ މާރިޗު 24 ވަނަ ދުވަހުއެވެ.