ރާއްޖޭގައި މެޑިކަލް ޓޫރިޒަމް ކުރިއެރުވުމަށް އެމްއެމްޕީއާރުސީއާއި އޭޑީކޭ ހޮސްޕިޓަލް އެއްބަސްވުމަކަށް

ރާއްޖޭގެ މެޑިކަލް ޓޫރިޒަމްގެ ޚިދުމަތް އިޝްތިހާރުކުރުމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި އޭޑީކޭ ހޮސްޕިޓަލާ ދެމެދު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި އެމްއެމްޕީއާރުސީގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަދި އެމްޑީ އިބްރާހިމް ޝިއުރީ އެވެ. އަދި އޭޑީކޭގެ ފަރާތުން ސޮއިކުރެއްވީ މެނޭޖިންގ ޑިރެކްޓަރު އަހުމަދު އައްފާލް އެވެ.

މި އެއްބަސްވުމާ ގުޅޭގޮތުން އެމްއެމްޕީއާރުސީގެ އެމްޑީ އިބްރާހީމް ޝިއުރީ ވިދާޅުވީ، ޒަމާނުއްސުރެ ރާއްޖެއަކީ ފަތުރުވެރިކަމުގެ ދާއިރާއިން ލަގްޒަރީ ފެންވަރުގެ ޚިދުމަތް ލިބެމުންދާ ޤައުމެއް ކަމަށެވެ. އަދި ފަތުރުވެރިކަމުގެ ސިނާޢަތުގައި މެޑިކަލް ޓުއަރިޒަމް ހިމެނުމަށް ފަތުރުވެރިކަމުގެ ހުށަހެޅުންތައް ސިންދަފާތުކޮށްގެން ދުނިޔޭގެ ޓްރެވަލް ޑެސްޓިނޭޝަނެއްގެ ގޮތުގައި ރާއްޖޭގެ  މަޤްބޫލުކަން އިތުރުކުރުމުގެ އިތުރުން ރާއްޖޭގެ ޞިއްޙީ ޚިދުމަތުގެ އިންފްރާސްޓްރަކްޗަރ ތަރައްޤީކުރުމަށްވެސް އެހީތެރިކަން ފޯރުކޮށްދެމުން ދާނެ ކަމަށް ޝިއުރީ ވިދާޅުވިއެވެ.

މި އެއްބަސްވުމުގެ ދަށުން އެމްއެމްޕީއާރުސީ އާއި އޭޑީކޭ ހޮސްޕިޓަލް ގުޅިގެން މަތީ ފެންވަރުގެ ބޭސްފަރުވާގެ ޚިދުމަތް ދޭ މަންޒިލެއްގެ ގޮތުގައި ރާއްޖެ ޕްރޮމޯޓުކުރަން މަސައްކަތް ކުރާނެއެވެ. މި ޕާޓްނަރޝިޕްގެ ސަބަބުން ރާއްޖޭގެ އިޤްތިޞާދީ ކުރިއެރުމަށް މެޑިކަލް ޓުއަރިޒަމްގެ ޙިއްޞާ އިތުރުވެ ފަތުރުވެރިންނަށް ބައިނަލްއަޤްވާމީ ފެންވަރުގެ ޞިއްޙީ ޚިދުމަތްތައް ލިބިގެންދާނެކަމަށް އެމްއެމްޕީއާރުސީން ވަނީ ބުނެފައެވެ.

އޭޑީކޭގެ މެނޭޖިންގ ޑިރެކްޓަރު އަހުމަދު އައްފާލް ވިދާޅުވީ، އެ ކުންފުނީގެ އަމާޒަކީ އެމްއެމްޕީއާރުސީއާ ގުޅިގެން، ރާއްޖޭގެ ގުދުރަތީ ރީތިކަމާއި، ދުނިޔޭގެ ފެންވަރުގެ ޞިއްޙީ ޚިދުމަތްދޭ ތަންތަނާއި، ފެންވަރު ރަނގަޅު ބޭސްފަރުވާ ލިބެން ހުންނަ ފަތުރުވެރިން ޝައުޤުވެރިކުރުވުން ކަމަށެވެ. މީގެ ސަބަބުން ހަމައެކަނި ފަތުރުވެރިކަމުގެ ސިނާއަތަށް ފައިދާވުމުގެ އިތުރުން ރާއްޖޭގެ މުޅި އިޤްތިޞާދަށްވެސް ކުރިއެރުންތަކެއް ލިބިގެންދާނެކަމުގެ ޔަޤީންކަން އެބައޮތްކަމަށް އޭނާ ވިދާޅުވިއެވެ.

An MOU was signed today with @mmprc_corporate to enhance medical tourism in the Maldives. This partnership will contribute to extent not only medical tourism but also the overall economic development. pic.twitter.com/04hUsMUONF

— ADK Hospital (@ADKHospital) December 12, 2024