އުފެދިފައިވާ ދެކޮޅިގަނޑެއްގެ ސަބަބުން މިމަހު 18އިން ކުރިއަށް އޮތް ފަސްދުވަހަށް މޫސުން ގޯސްވާނެ

ރާއްޖެއާއި ކައިރިން އުފެދިފައިވާ ދެކޮޅިގަނޑެއްގެ ސަބަބުން މިހިނގާ ޑިސެންބަރު މަހުގެ 18 ވާ ބުދަދުވަހުން ފެށިގެން ކުރިއަށް އޮތް ފަސް ދުވަހު ރާއްޖޭގެ މޫސުން ގޯސްވާނެ ކަމަށް މޫސުމާއި ބެހޭ ޤައުމީ އިދާރާއިން ބުނެފިއެވެ. 

މޫސުމާއި ބެހޭ ޢިދާރާއިން ބުނެފައިވަނީ މިދުވަސްވަރަކީ ރާއްޖޭގެ ސަރަޙައްދަށް ހުޅަނގު މޫސުން ނިމި އިރުވައި މޫސުން ފެށޭ ދުވަސްވަރުކަމަށެވެ. މޫސުން ބަދަލުވާދުވަސްވަރު މިސަރަހައްދުގައި ކޮޅިގަނޑު އުފެދުމުގެ ފުރުސަތު އޮންނަ ކަމަށްވެސް އެއިދާރާއިން ވަނީ ބުނެފައެވެ. 

އެގޮތުން ބަންގާޅު ކަނޑުގައި މިއަދުގެ ވަގުތެއްގައި ކޮޅިގަނޑެއް އުފެދި ކުރިއަށް އޮތް ދެދުވަސްތެރޭ އިންޑިއާގެ ޓެމިލްނާޑޫގެ އައްސޭރިފަށާ ދިމާއަށް ޖެހޭނެ ކަމަށް ލަފާކުރެވޭ ކަމަށާއި، މިހަފްތާތެރޭ ރާއްޖެއާ ދުރުން ދެކުނުގައިވެސް ކޮޅިގަނޑެއް އުފެދު ހުޅަނގަށް ޖެހެމުންދާނެ ކަމަށް ލަފާކުރެވޭ ކަމަށް މެޓް އޮފީހުން ވަނީ ބުނެފައެވެ.

މި ދެކޮޅިގަނޑާ ގުޅިގެން 18 ޑިސެންބަރު ވާ ބުދަދުވަހުން ފެށިގެން ކުރިއަށް އޮތް ފަސް ދުވަހު ރާއްޖޭގެ ސަރަހައްދުގެ އާންމު ވައި ގަދަވާނެ ކަމަށް ބެލެވޭ ކަމަށް އެއިދާރައިން ބުނެފައިވެއެވެ. 

އެގޮތުން އާންމު ގޮތެއްގައި ދެކުނާއި މެދުރާއްޖެތެރޭގެ އަތޮޅުތަކަށް ގަޑިއަކު 17 މޭލާއި 27 މޭލާ ދެމެދުގެ ބާރު މިނުގައި އަދި އުތުރުގެ އަތޮޅުތަކަށް ގަޑިއަކު 13 މޭލާއި 23 މޭލާއި ދެމެދުގެ ބާރު މިނުގައި ވައިޖެހޭނެ ކަމަށް ބެލެވޭ ކަމަށް މޫސުމާ ބެހޭ އިދާރާއިން ވަނީ ބުނެފައެވެ. 

މި ދެކޮޅިގަނޑާއި ގުޅިގެން އުތުރުގެ އަތޮޅުތަކުގައި ކަނޑުތައް ގަދަވާނެ ކަމަށް ބެލެވޭ ކަމަށާއި، ދެކުނާއި މެދުރާއްޖެތެރޭގެ ކަނޑުތައް ވަރަށް ގަދަވާނެ ކަމަށް މޫސުމާ ބެހޭ އިދާރާއިން ބުނެއެވެ.

މީގެެއިތުރުން މިދުވަސްވަރު ގަދަވަޔާއެކު ވިއްސާރަކޮށް ގުގުރުމާއެކު ވިލާގަނޑުގައި ގާތްގަނޑަކަށް ގަޑިއަކު 40 މޭލާއި 55މޭލަށް ވައިގަދަވުން އެކަށީގެންވާ ކަމަށާއި، ދެކުނާއި މެދުރާއްޖެތެރޭގެ ސަރަޙައްދަށް އުދައިގެ އަސަރުކުރުންވެސް އެކަށީގެންވާކަމަށް މެޓް އޮފީހުން ވަނީ ބުނެފައެވެ.