ޚަބަރު
ތައިލެންޑްގައި ހުންނަވާ ދިވެހި ސަފީރުކަމަށް ފުވާދު ތައުފީޤް އައްޔަނު ކުރައްވައިފި

ފުވާދު ތައުފީޤް އަށް ސަފީރުކަމުގެ ފަތޮކޮޅު އެރުވުމަށް ބޭއްވި ރަސްމިއްޔާތުގެ ތެރެއިން. ފޮޓޯ: ރައީސް އޮފީސް
ތައިލެންޑްގައި ހުންނަވާ ދިވެހި ސަފީރުކަމަށް ފުވާދު ތައުފީޤް އައްޔަނު ކުރައްވައިފިއެވެ.
ތައިލަންޑަށް ރާއްޖެއިން ކަނޑައަޅުއްވައިފައި ހުންނަވާ ސަފީރު ކަމުގެ ފަތްކޮޅު ފުވާދު އަށް އަރުވައިފައިވަނީ މިއަދު ރައީސް އޮފީހުގައި އެކަމަށްޓަކައި ބޭއްވުނު ރަސްމިއްޔާތެއްގައެވެ. ފަތްކޮޅު ހަވާލުކޮށްދެއްވީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒެވެ.
ތައިލެންޑަށް ކަނޑައަޅުއްވައިފައި ހުންނަވާ ދިވެހި ސަފީރުގެ މަޤާމަށް އައްޔަނު ކުރެއްވުމުގެ ކުރިން ފުވާދު ހުންނެވީ އެމްބަސިޑަރ އެޓް ލާޖްގެ މަޤާމުގައެވެ.
ފުވާދު ތައުފީޤަކީ ގިނަ ދުވަސްތަކެެއް ވަންދެން އިލެކްޝަންސް ކޮމިޝަންގައި އަގުހުރި ޚިދުމަތްތަކެއް ކޮށްދެއްވައިފައިވާ ބޭފުޅެކެވެ. އެގޮތުން ފުވާދު ތައުފީޤު އެންމެ ފުރަތަމަ އިލެކްޝަންސް ކޮމިޝަނާ ގުޅިވަޑައިގަތީ 2008 ވަނަ އަހަރު، ކޮމިޝަންގެ މެންބަރެއްގެ ގޮތުގައެވެ. އެއް އަހަރު ދުވަހު ކޮމިޝަންގެ މެންބަރުކަމުގެ މަޤާމު ފުރުއްވުމަށްފަހު، 2009 ވަނަ އަހަރު ކޮމިޝަންގެ ރައީސްކަމަށް ފުވާދު އައްޔަންކުރެވުނެވެ.
2009 ވަނަ އަހަރުން ފެށިގެން 2014 ވަނަ އަހަރުގެ މާރިޗު މަހާ ހަމައަށް އިލެކްޝަންސް ކޮމިޝަންގެ ރައީސްކަމުގެ މަޤާމު ފުރުއްވުމަށްފަހު އެކޮމިޝަނުން ވަކިވެވަޑައިގެންނެވިއެވެ. އަދި ދެވަނަ ފަހަރަށް އެ ކޮމިޝަނާ ގުޅިވަޑައިގެންނެވީ 2019ވަނަ އަހަރުއެވެ.
ފުވާދު ވަނީ އިލެކްޝަންސް ކޮމިޝަނުގެ ރައީސްގެ މަޤާމުގައި ހުންނަވައިގެން ކާމިޔާބު މަސައްކަތްތަކެއް ކުރައްވާފައެވެ. 2019 އަހަރު ފުވާދު ފެއްޓެވި އިލެކްޝަންސް ކޮމިޝަންގެ ދައުރު ހަމަވެފައިވަނީ މިހިނގާ 2024 ވަނަ އަހަރުއެވެ.
ތައިލެންޑަށް ކަނޑައަޅުއްވާ ދިވެހި ސަފީރަކަށް ފުވާދު ތައުފީޤް އައްޔަނު ކުރުމަށް ރައީސް ޑރ މުޢިއްޒު މަޖިލީހަށް ނަން ފޮނުއްވުމުން ފާސްވެފައިވަނީ ވޯޓުގައި ބައިވެރިވި 58 މެމްބަރުންގެ ވޯޓުންނެވެ.