ނަސް ހެދިކާ ، ރަހަޔަށް ބަދަލެއް ނައިސް 20 އަހަރު!

ދިރިއުޅުމުގެ ގޮންޖެހުންތަކާ ކުރިމަތިލުމަކީ ކޮންމެ އިންސާނެއްގެ ހަޔާތުގައިވެސް ކުރިމަތިވާނެ ކަމެކެވެ. މި ގޮންޖެހުންތަކުން އަރައިގަތުމަށް އެކި މީހުން އެކި ގޮތްތައް ޚިޔާރުކުރެއެވެ. ގއ ވިލިގިއްޔަށް އުފަން ނަސްރިއްޔާ އަކީ މިފަދަ ގޮންޖެހުންތަކާ ކުރިމަތިލައި، އަމިއްލަ މަސައްކަތުން ކުރިއަށް ދިއުމަށް ނިންމި ފަރާތެކެވެ.

ނަސްރިއްޔާ

2003 ވަނަ އަހަރު،ދަރިން ކުޑައިރު، ދިރިއުޅުމުގެ ޙާލަތު ރަނގަޅުކުރުމަށް ފެށި މަސައްކަތް މިއަދު ވަނީ ވަރަށް ބޮޑަށް ކާމިޔާބުވެފައެވެ. ފުރަތަމަ ފެށީ ދިރިއުޅޭ ގޭގައި ހުޅުވާފައި ހުންނަ ފިހާރައަކަށް "ގުޅަ" ތައްޔާރުކުރުމުންނެވެ. އޭގެ ފަހުން ގިނަ ބަޔަކަށް ކަމުދިޔުމާއެކު އިތުރު ބާވަތްތައް ތައްޔާރުކުރަން ފެށިއެވެ.

ފުރަތަމަ ފެށުމަކަށް ދިރިއުޅޭ ގޭގަ ހުޅުވާފަ ހުންނަ ފިހާރައަކަށް ހަދަން ފެށީ ގުޅަ، ދެން އެގުޅަ ވަރަށް ގިނަ ބަޔަކަށް ކަމުގޮސްގެން އިތުރު ބާވަތްތައް ހަދަން ފެށީ

ހެދިކާއަކީ ދިވެހީންގެ ސަގާފަތާއި އާދަކާދައިގެ މުހިންމު ބައެކެވެ. ނަސްރިއްޔާ ފަދަ ދިވެހި ހެދިކާ ހަދާ ފަރާތްތަކުން އެންމެ ބޮޑު އަހައްމިއްޔަތުކަމެއް ދެނީ ހެދިކާގެ ރަހަ އެއްގޮތަކަށް ހިފެހެއްޓުމަށެވެ. ނަސްރިއްޔާގެ ހެދިކާގެ ރަހަ 20 އަހަރު ފަހުންވެސް ބަދަލުނުވާކަމަށް ކަސްޓަމަރުން ފާހަގަކުރެއެވެ.

ނަސްރިއްޔާގެ މަސައްކަތް ފެށުނީ ރޯމަސް ގަނެގެން ކައްކައިގެން ހެދިކާ ހެދުމުންނެވެ. ނަމަވެސް މަސައްކަތް ކުރިއަރަމުން ދިޔަވަރަކަށް ލުއިފަސޭހަ ގޮތްތައް ހޯދުމަށް މަސައްކަތްކުރިއެވެ. މިހާރު ހެދިކާ ހަދަނީ ވެކިއުމްކޮށްފައި ހުންނަ މަހާއި ފެލިވަރު މަސްދަޅު ބޭނުންކޮށްގެންނެވެ.

ނަސްރިއްޔާ ތައްޔާރުކުރާ ޑޯނަޓް ރިހަފޮޅި އަދި މިނީ ޕިއްޒާ

އަބަދުވެސް ބޯކިބާ އެއްޗެހީގަ އެއްވަރަކަށް ރަހަ ބަހައްޓަން އެއްމިނަކަށް އެއްޗެހި އަޅައިގެން ހެދިކާ ހަދަނީ ، މާލޭގައި ދިރިއުޅުނު އިރު އޭރުގަ ހެދިކާ ކޭމީހުން ބުނަނީ މިހާރުވެސް ހެދިކާކައިފަ  ރަހައަކަށް ތަފާތެއް ނާދެއެވެ، އޭރުގެ ރަހައޭ މިހާރުވެސް ލަނީ ، ވަރަށް ގިނަމީހުންނަށް ކަމުދޭ ހެދިކާ

ނަސްރިއްޔާ ތައްޔާރުކުރާ ފޮނި ބާވަތްތަކުގެ ތެރެއިން ދަނޑި އަލުވި ބޯކިބަލަކީ ގިނަބައެއްގެ މަޤްބޫލުކަން ލިބިފައިވާ އެންމެ ގިނަމީހުން ހޯދަން އަންނަ އެއް ބާވަތެވެ.

"ނަސްރިއްޔާ ތައްޔާރުކުރާ "ދަނޑިއަލުވި ބޯކިބާ

ނަސްރިއްޔާ ފާހަގަކުރި ގޮތުގައި ހެދިކާގެ އަގުތަކަށް މިހާރު ވަނި ބަދަލުގެނެސްފައެވެ. އަދި މިބަދަލާއެކުވެސް ހެދިކާއަށް އޮތް ޑިމާންޑަކަށް އެއްވެސް ބަދަލެއް ނާދެއެވެ.

ދުވާލަކަށް 2000 ވަރަކަށް ރުފިޔާ ހަރަދު ނުކަނޑާ ލިބޭ ، ހަރަދު ކަނޑާފަވިޔަސް 1000 ވަރަކަށް ރުފިޔާ ހަމަ ފައިދާ ގޮތުގަ ލިބޭ، ބައެއް ދުވަސްތަކުގަ 2000އަށް ވުރެން ގިނައިން ވެސް ލިބޭ

ނަސްރިއްޔާ ދެކޭގޮތުގައި ކޮންމެ މަސައްކަތެއްވެސް ކުރަންވާނީ ވަރަށް ފުރިހަމައަށެވެ. ހެދިކާގެ ފެންވަރާއި ރަހަ ދަށްވެގެން ކަސްޓަމަރުންނަށް ގެއްލުންވުމަކީ އެއްވެސް ގޮތަކަށް ގަބޫލުކުރެވޭނެ ކަމެއް ނޫނެވެ.

ހެދިކާ ގަންނަން އަންނަ މީހާ ލާރިދީފަ ހެދިކާ ގަނެގެން ގޮސް ނުކެވި އޭތި އުކާލީމާ އަޅުގަނޑަށް އަދި ލާރިލިބުނަސް އެމިހާ އަށް ވަރަށް ބޮޑު ގެއްލުމެއް ވާނީ ، އެހެންވީމަ ރަހަތައް ރަނގަޅުކޮށްގެން މިކަން ކުރިއަށް ދާނީ

ނަސްރިއްޔާގެ ވިޔަފާރިން ތާޒާ ހެދިކާގެ އިތުރުން ފްރީޒްކޮށްގެން ގިނަދުވަހު ބެހެއްޓޭ ގޮތަށް ހެދިކާ ތައްޔާރުކޮށްދެއެވެ. މިގޮތުން ރާއްޖެއިން ބޭރަށް ގެންދިއުމަށާއި ރަމަޟާން މަހަށް ޚާއްޞަކޮށް އޯޑަރު ތައްޔާރުކުރެއެވެ.

ނަސްރިއްޔާ ތައްޔާރުކުރާ ހެދިކާގެ ބައެއް ބާވަތްތައް

ރާއްޖެއިން ބޭރަށް ގެންދަން ތައްޔާރުކުރާ ކޮންމެ ބާވަތަކީ ގިނަދުވަހު ބެހެއްޓޭގޮތަށް ތައްޔާރުކޮށްފައި ހުންނަ ބާވަތްތަކެވެ. އަދި އޯޑަރު ދެއްވާ ފަރާތްތަކުން އެދޭ ގޮތަކަށް ޕެކް ކޮށްލުމަށްފަހު ނަސްރިއްޔާ އޯޑަރު ތައްޔާރުކޮށްދެއެވެ.

ރޯދަމަހުގެ އޯޑަރު ތަކަށް ތައްޔާރުވާން ނަސްރިއްޔާ 15 ދުވަސް ކުރިން ފަށައެވެ. ސަބަބަކީ ކުރިއާ ބަލާފަ ގިނަދުވަހު ބެހެއްޓޭ ގޮތަށް ތައްޔާރުކުރާ ހެދިކާއަށް ލިބޭ އޯޑަރު ގިނަވުމެވެ. 

ނަސްރިއްޔާގެ މަސައްކަތުގެ ދުވަސް ފެށެނީ ފަތިހު 4 ޖަހާއިރުއެވެ. ހަވީރު 3 ޖަހަންދެން މަސައްކަތް ކުރެއެވެ. މި މަސައްކަތުގައި އޭނާއަށް އެންމެ ބޮޑު އެހީތެރިކަމެއް ލިބެނީ ފިރިމީހާ އަދި ދަރިންގެ ފަރާތުންނެވެ.

ނަސްރިއްޔާ ފިރިކަލުންނާއި އެކު އުފަންދުވަސް ފާހަގަ ކުރަނީ

ނަސްރިއްޔާ ހެދިކާ ތައްޔާރުކުރުމުގައި އެންމެ ބޮޑު އަހައްމިއްޔަތުކަމެއް ދެނީ ސާފުތާހިރުކަމަށެވެ. ކޮންމެ ދުވަހަކު ބޭނުންކުރާ ހުރިހާ ސާމާނެއް ރަނގަޅަށް ސާފުކުރުމަކީ އޭނާގެ އާދައެކެވެ. ހެދިކާ ތެލުލުމަށް ބޭނުންކުރާ ތެޔޮ ވެސް ކޮންމެ ދުވަހަކު އައުކުރެއެވެ.

ނަސްރިއްޔާ ދަރިންނާއި އެކު

ނަސްރިއްޔާގެ ވިޔަފާރި "ނަސް ހެދިކާ ކިއޮސްކް" ގެ ނަމުގައި ހުޅުމާލޭގައި ހިންގަމުން ގެންދެއެވެ. ހެދިކާ ތައްޔަރުކޮށް ނިމިގެން ނަސްރިއްޔާ ހަވީރު 128 ވަނަ ފްލެޓް ކައިރީގައި ހުންނަ އޭނާގެ ހެދިކާ "ކިއޮސްކް" ގައި ހެދިކާ ވިއްކުމުގެ މަސައްކަތް ފަށައެވެ. މީގެ އިތުރުން ވައިބަރ ކޮމިއުނިޓީ މެދުވެރިކޮށްވެސް އޯޑަރު ބަލައިގަނެއެވެ. ދުވާލަކު 16 އިން 20 އަށް ވުރެ ގިނަ ބާވަތުގެ ހެދިކާ ނަސްރިއްޔާ ތައްޔާރުކުރެއެވެ.

ނަސްރިއްޔާ ތައްޔާރުކުރާ ހެދިކާގެ ބައެއް ބާވަތް

ހުޅުމާލޭގައި 7 އަހަރު ވަންދެން މެދުނުކެނޑި ހެދިކާ ހަދަމުން ގެންދާއިރު، ގިނަ އަދަދެއްގެ ވަފާތެރި ކަސްޓަމަރުން ލިބިފައިވެއެވެ. ބައެއް ކަސްޓަމަރުން ހެދިކާ ނުލިބި ހިނގައިދާނެތީ މެންދުރުފަހު 2 ޖެހުމުގެ ކުރިން އެޑްވާންސްކޮށް އޯޑަރު ދެއެވެ.

ނަސްރިއްޔާގެ މަސައްކަތުގެ ކާމިޔާބީއަކީ އޭނާގެ ހިތްވަރާއި، ކެތްތެރިކަމާއި، ފެންވަރު ހިފެހެއްޓުމަށް ކުރާ މަސައްކަތުގެ ނަތީޖާއެކެވެ. އޭނާގެ ވިޔަފާރި މިހާރު އޮތް މިންވަރުގައި ދެމެހެއްޓުމަށް އިސްކަންދެއެވެ. ވިޔަފާރި އިތުރަށް ފުޅާކުރުމަށް ގިނަ މީހުންގެ އެހީތެރިކަން ބޭނުންވާނެތީ، މިހާރު އޮތް މިންވަރުގައި ހިފަހައްޓައިގެން ކުރިއަށް ދިއުމަށް ނިންމާފައިވެއެވެ.

ނަސްރިއްޔާގެ މި ކާމިޔާބު ވިޔަފާރިއަކީ ދިވެހި އަންހެނުންނަށް ހިތްވަރަކަށް ވާނެ ނަމޫނާއެކެވެ. އަމިއްލަ މަސައްކަތުން ކުރިއަށް ދިއުމަށް ބޭނުންވާ ފަރާތްތަކަށް މިއީ ރަނގަޅު މިސާލެކެވެ. ދިވެހި ކާނާ އާއި ސަގާފަތް ދިރުވައި އާލާކުރުމުގައި ނަސްރިއްޔާ ކުރަމުންދާ މަސައްކަތަކީ ފާހަގަކޮށްލެވޭ މުހިންމު މަސައްކަތެކެވެ.
 

ނަސްރިއްޔާ ތައްޔާރުކުރާ ޕެޓީޒް އަދި ބަޖިޔާ