ދުނިޔެ
ޝަހީދުންގެ ޢަދަދު 45،000 މައްޗަށް، މިއަދުވެސް އަނިޔާވެރި އެތަށް ހަމަލާއެއް

ބައިތް ލާހިޔާ ސަރަހައްދަށް ދިން ހަމަލާތަކުގައި ޝަހީދުވި ބައެއްގެ ހަށިތައް. ފޮޓޯ: ޤުދުސް ނެޓްވޯކް
7 އޮކްޓޯބަރު 2023 ގައި އިޒްރާއިލް ސިފައިން ޣައްޒާއަށް ދޭން ފެށި ޢުދުވާނީ ހަމަލާތަކުގައި ޝަހީދުވި މީހުންގެ ޢަދަދު 45،000 މައްޗަށް އަރައިގެން ގޮސްފިއެވެ.
ފަލަސްޠީނުގެ ޞިއްޙީ ވުޒާރާއިން ހާމަކޮށްފައިވާ އެންމެ ފަހުގެ އަދާހަމަތަކުގައި ބުނެެފައިވާ ގޮތުގައި މިހާތަނަށް އިޒްރާއިލްގެ ހަމަލާތަކުގެ ސަަބަބުން ޝަހީދުވި މީހުންގެ ޢަދަދު 45،028 އަށް އަރައިފައިވާ ކަމަށާއި ޒަޚަމްވީ މީހުންގެ ޢަދަދު 106،952 އަކަށް އަރައިފައިވާ ކަމަށެވެ.
އެޢަދަދުގެ ތެރެއިން 52 ޝަހީދުންނަކީ ފާއިތުވި 24 ގަޑިއިރުތެރޭ ޝަހީދުވިމީހުން ކަމަށާއި ޒަޚަމްވީ 203 މީހަކީވެސް ފާއިތުިވި 24 ގަޑިއިރިތެރޭގައި ރިޕޯޓު ކުރެވިފައިވާ ޢަދަދެއްކަމަށް ޞިއްޙި ވުޒާރާއިން ވަނީ ބުނެފައެވެ.
ޣައްޒާގެ އެންމެ ފަހުގެ އަދާހަމަތައް ގެނެސްދެމުން އަލްޖަޒީރާގައި ބުނެފައިވަނީ މިއަދުގެ ހެނދުނަކީ ލޭއޮހޮރުވުންތައް ގިނަ ހެނދުނެއް ކަމަށެވެ.
އެގޮތުން ނުޞައިރަތް ރެފިޔުޖީ ކޭމްޕުގައި ނުރައްކާތެރި ގޮވުންތަކެއް ގޮއްވާލައިފައިވަނީ ކުރީބައިގައި އިންޒާރު ދިނުމެއްވެސް ނެތި ކަަމަށް އަލްޖަޒީރާއިން ވަނީ ބުނެފައެވެ.
ނުޞައިރަތްގެ އިތުރުން ޣައްޒާގެ އުތުރު ފަރާތުަގައި އޮންނަ ބައިތް ލާހިޔާ ކިޔުނު ސަރަހައްދުގައި ހުންނަ ޢާންމުން ދިރިއުޅޭ ގެއަކަށް ދިން ވަރުގަދަ ހަމަލާއެއްގެ ސަބަބުން ފަސް މީހަކު ޝަހީދުވެފައިވާ ކަމަށް ވަނީ ބުނެފައެވެ.
އޭގެ އިތުރުން ކަމަލް އަދްވަން ހޮސްޕިޓަލުން ލިބުނު މަޢުލޫމާތައް ހަވާލާދީ އަލްޖަޒީރާގައި ބުނެފައިވަނީ ހެނދުނު ހެނދުނާ އިޒްރާއިލުން ދިން ނުރައްކާތެރި ހަމަލާތަކުގެ ސަބަބުން އެހޮސްޕިޓަލް ޒަޚަމްވެފައިވާ މީހުންނާއި އެކު ތޮއްޖެހިފައިވާކަމަށެވެ. މީގެއިތިުރުން އެހޮސްޕިޓަލާއި ކައިރި ސަރަޙައްދުތަކަށް ދިން ހަމަލާތަކުގައި ބަޔަކު ޝަހީދުވެފައިވާއިރު ޒަޚަމްވީ މީހުންނަށް ފަރުވާދިނުމަށް މެޑިކަލް ޓީމްތަކަށް ނުދެވިފައިތިބި ކަން ވަނީ ފާހަގަކޮށްފައެވެ. އެއީ އިޒްރާއިލް ސިފައިން އަދިވެސް ހުއްޓުމެއް ނެތި ހަމަލާދެމުންދާތީ ކަމަށްވެސް އަލްޖަޒީރާގައި ބުނެފައިވެއެވެ.