ޚަބަރު
އެއިޑްސް ބަލިފަދަ ކަންކަމުން އަރައިގަނެވޭނީ ޤައުމެއްގެ ގޮތުގައި އެކުއެކީ އެންމެން މަސައްކަތް ކޮށްގެން: ވަޒީރު ނާޒިމް
ޞިއްޙި ވަޒީރު ޢަބްދުﷲ ނާޒިމް އިބްރާހިމް.
އެއިޑްސް ބަލިފަދަ ކަންކަމުން އަރައިގަނެވޭނީ ޤައުމެއްގެ ގޮތުގައި އެކުއއެކީ އެންމެން މަސައްކަތް ކޮށްގެން ކަމަށް ޞިއްޙި ވަޒީރު ޢަބްދުﷲ ނާޒިމް އިބްރާހިމް ވިދާޅުވެއްޖެއެވެ.
ނާޒިމް މިހެން ވިދާޅުވީ ދުނިޔޭގެ އެއިޑްސް ދުވަސް ފާހަގަ ކުުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
މިރަސްމިއްޔާތުގައި ވާހަކަފުޅު ދައްކަވަމުން ވަޒީރު ވަނީ އެއިޑްސް ބަލި ކުރިން ދެނެގަތުމުގެ މުހިންމުކަން ފާހަގަކުރައްވައި އެފަދަ ކަމަކަށް ޝައްކުކުރެވޭނަމަ ވީހާވެސް އަވަހަށް ޓެސްޓް ކުރުމަށް އިލްތިމާސްކުރައްވާފައެވެ. އަދި މިފަދަ ކަންކަމުން އަރައިގަނެވޭނީ ޤައުމެއްގެ ގޮތުގައި އެކުއެކީގައި އެންމެން މަސައްކަތްކޮށްގެން ކަމަށްވެސް ވަޒީރު ނާޒިމް ވިދާޅުވިއެވެ. މީގެއިތުރުން ސަރުކާރުގެ މިއަދުގެ އަމާޒަކީ މައިމީހާގެ ފަރާތުން އެޗްއައިވީ އާއި ސިފިލިސް އަދި ހެޕަޓައިޓިސް ބީ ވާރުތަވުން ނައްތާލެވިފައިވާ ޤައުމަކަށް ރާއްޖެ ހެދުންކަމަށް ވަޒިރު ނާޒިމް ވިދާޅުވިއެވެ.
އަދި މިހާރު ކުރައްވަމުންގެންދަވާ މަސައްކަތުން އަންނަ އަހަރު ނިމުމުގެ ކުރިން އެކަން ހާސިލުކުރެވޭނެ ކަމަށް އެމަނިކުފާނު ވިދާޅުވިއެވެ.ސިއްޙީ ލަނޑުދަނޑިތައް ހާސިލުކުރެވޭނީ ފަންނުވެރި އަދި ޢިލްމީ ދާއިރާގެ ބޭފުޅުންގެ ލަފަޔާއެކުގައި ކަމަށް ވަޒީރު ނާޒިމް ވިދާޅުވިއެވެ.
ސިއްޙީ ދާއިރާއިން ކޮންމެހެން ނިންމަންޖެހޭ ނިންމެވުންތައް ސަރުކާރުން ނިންމަވަމުންދާ ކަމަށްވެސް އެމަނިކުފާނު ވިދާޅުވިއެވެ. އެގޮތުން ވޭޕް ބޭނުންކުރުމާއި ގެންގުޅުން މަނާކުރުމަކީ އެފަދަ މުހިންމު ފިޔަވަޅެއް ކަމަށާއި އެކަމުގައި ސަރުކާރަށް އާންމުންގެ އެއްބާރުލުން ލިބޭނެ ކަމަށް އުއްމީދުކުރައްވާ ކަމަށް ވަޒީރު ވިދާޅުވިއެވެ.
އެއިޑްސް ދުވަސް ފާހަގަ ކުރުމަށް ބޭއްވި ރަސްމިއްޔާތުގައި އެއިޑްސްފަދަ ބަލިތަކަށް ފަރުވާ ދިނުމަށް ތިން ގައިޑްލައިނެއް ވެސް އިފްތިތާޙްކޮށްފައެވެ. އެއީ " ނޭޝަނަލް ގައިޑްލައިންސް އޮން އެޗް.އައި.ވީ، ވައިރަލް ހެޕަޓައިޓިސް ސެކްޝުއަލީ ޓްރާންސްމިޓެޑް އިންފެކްޝަންސް" ގައިޑްލައިނެވެ.
މި ގައިޑްލައިން އިފްތިތާޙްކޮށްދެއްވީ ރައީސުލްޖުމުހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދެވެ.
