ބަންގްލަދޭޝްގެ ޢާންމު އިންތިޚާބު 2025 ގެ ފަހުކޮޅުގައި ނުވަތަ 2026ގެ ކުރީކޮޅުގައި ބާއްވަން މަޝްްވަރާކުރަނީ

އަވަށްޓެރި ބަންގްލަދޭޝްގެ ޢާންމު އިންތިޚާބު މިފެށޭ 2025ގެ ކުރީ ކޮޅުގައި ނުވަތަ 2026ގެ ފެށޭ ހިސާބުގައި ބާއްވަން މަޝްވަރާތައް ފަށައިފިއެވެ.

ވަރުގަދަ ހަމަނުޖެހުން ތަކަކަށްފަހު ޝައިޚް ހަސީނާގެ ވެރިކަން ވެއްޓި މިހާރު އުފެދިފައިވާ އިންތިޤާލީ ސަރުކާރުގެ ހިންގެވުމާއި ހަވާލުވެ ހުންނެވި މުޙައްމަދު ޔޫނުސް ވިދާޅުވެފައިވަނީ އިންތިޚާބުތައް 2025ގެ ނިމުމަށް ނުވަތަ 2026ގެ ފެށުމަށް ތާވަލުކުރެވިދާނެ ކަމަށެވެ. 

ހަސީނާގެ މަަޤާމުން ދުރުކުރުމަށް ޤައުމުގެ ހަމަޖެހުން ނަގާލައި މުޒާހަރާތައް ހިންގި ދަރިވަރުންގެ ފަރާތުން މިހާރު މުޙައްމަދު ޔޫނުސް އަށް ދަނީ އިންތިޚާބުތައް ލަސްކުރަމުންދާތީ ވަރަށް ބޮޑަށް ޕްރެޝަރު ކުރަމުންނެވެ.

ބަންގްލަދޭޝްގެ ދަރިވަރުންތަކެއް ހަސީނާގެ ވެރިކަމާ ދެކޮޅުހަދައި ކުރަންް ފެށި މުޒާހަރާތަކުގައި ހަސީނާއަށް ވާގިވެރިނުވެ ދަރިވަރުންނާއި އެއްކޮޅަށް އެރި އާމީ ޗީފް ވަޤާރް އުޒް ޒަމާން ވިދާޅުވެފައިވަނީ 12 މަހާއި 18 މަހާއި ދެމެދުގެ މުއްދަތެއްގެ ތެރޭގައި ޑިމޮކްރަސީ އިއާދަވާން ޖެހޭނެކަމަށެވެ.

ބަންގްލަދޭޝްގެ އިދިކޮޅު މައި ދެޕާޓީގެ ތެރެއިން އެންމެ ނަންހިނގާ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) ހިމެނޭ ގޮތަށް އިދިކޮޅު ޕާޓީތަކުން ވެސް ވަނީ ވީހާވެސް އަވަހަކަށް އިންތިޚާބު ބޭއްވުމަށް ގޮވާލާފަ އެވެ.

ނޮބެލް ޕީސް ޕްރައިޒް ލިބިވަޑައިގެންފައިވާ މުޙައްމަދު ޔޫނުސް ޤައުމަށް ގެނައުމަށް ވިދާޅުވާ އިސްލާހުތަކުގެ ކަންކަން ބަލަހައްޓަން ކޮމިޝަންތަކެއް ބަންގްލަދޭޝްގައި މިހާރު ވަނީ ފަށައިފައެވެ. އިންތިޚާބުގެ ތާރީޚެއް ކަނޑައެޅުމަކީ ސިޔާސީ ޕާޓީތަކުން އެއްބަސްވާ ކަންކަމުގެ މައްޗަށް ބިނާވެފައިވާ ކަމެއްކަން ފާހަގަކޮށްލަން ޖެހެއެވެ.

ޔޫުނުސް ވިދާޅުވެފައިވަނީ އޭނާ ބާރުއަޅުއްވަމުން ގެންދަވަނީ އިންތިޚާބެއްގެ ކުރިން ޤައުމުގައި އިސްލާޙު ކުރަން ހުރި ކަންކަން އިސްލާޙު ކުރުމަށް ކަމަށެވެ. 

ހަރުދަނާ ކަމާއި އެކު އެކުލަވައިލެވިފައިވާ ވޯޓާސް ލިސްޓެއް ފަދަ އިންތިޚާބީ އިސްލާޙުތައް ގެނެސް އިންތިޚާބު ބާއްވަން ޕާޓީތަކުން އެއްބަސްވެއްޖެނަމަ 2025 ނިމޭއިރު އިންތިޚާބު ބާއްވައިލެވޭވަރުވާނެ ކަމަށް ޔޫނުސް ވިދާޅުވެފައިވެއެވެ.

އެކަމަކު އިންތިޚާބީ އިސްލާޙުތަކުގެ ފުރިހަމަ ލިސްޓު ހިމަނާލުމުން މަދު މަސްކޮޅެއްގެ ތެރޭގައި އިންތިޚާބު ލަސްވާނެ ކަމަށްވެސް އޭނާ ވިދާޅުވި އެވެ. ޔޫނުސް ކުރިއަށް ގެންދަވާ އިސްލާހުތަކުގެ ތެރެއިން މުހިއްމު ކަމަކީ ވޯޓާސް ލިސްޓެއް އަޕްޑޭޓް ކުރުމެވެ.

ހަސީނާ ވަކިކުރުމަށް ހިންގި ހަމަނުޖެހުމުގެ ތެރޭގައި އެތައް ސަތޭކަ ބަޔަކު މަރުވެފައިވެއެވެ. އޭގެތެރެއިން ގިނަ މީހުން މަރުވެފައިވަނީ ފުލުހުން ބަޑިޖެހުމުގެ ސަބަބުންނެވެ.