ތިންވުޒާރާގެ އަލިފާނުގެ ހާދިސާއާއި ގުޅިގެން ސިފައިންނާއި ފުލުހުން 241 ކޮމިޓީއަށް ހާޒިރުކުރަނީ

ދައުލަތުގެ ތިން ވުޒާރާ ކަމުގައިވާ ގެދޮރުވެރިކަމާ ބިމާއި ޢުމްރާނީ ތަރައްޤީއާ ބެހޭ ވުޒާރާ، ޢިމާރާތްކުރުމާ ބިނާރާ ބެހޭ ވުޒާރާ އަދި މޫސުމީ ބަދަލުތަކާ ތިމާވެއްޓާ ހަކަތައާއި ބެހޭ ވުޒާރާގައި ހިނގި އަލިފާނުގެ ހާދިސާއާއި ގުޅިގެން ސިފައިންނާއި ފުލުހުން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށް ހާޒިރުކުރުމަށް ނިންމައިފިއެވެ.

ސިފައިންނާއި ފުލުހުން ހާޒިރުކޮށް ބާއްވާ އެކޮމިޓީގެ މިބައްދަލުވުމަކީ އެ ކޮމިޓީގެ މުޤައްރިރު، އަދި ރައްޔިތުންގެ މަޖިލިހުގެ އޭދަފުށީ ދާއިރާގެ މެމްބަރު އަހުމަދު ސަލީމް ގެ އެދިވަޑައިގަތުމަކަށް ބޭއްވުމަށް ހަމަޖެހިފައިވާ ބައްދަލުވުމުކެވެ. މިބައްދަލުވުން ބާއްވަން ހަމަޖެހިފައިވަނީ އަންނަ ބުރާސްފަތި ދުވަހުގެ ހެނދުނު 10 ޖަހާއިރަށެވެ.

އަލިފާންގަނޑު އެހާ ބޮޑުވާން ދިމާވީ އެމްއެންޑީއެފްގެ އިހުމާލުން ކަމަށް ބުނެ، އެމްޑީޕީން ވަނީ ސަލާމަތީ ޚިދުމަތްތަކާ ބެހޭ ކޮމިޓީން އެ ކަން ތަހުޤީޤު ކުރުމަށް ވެސް ގޮވާލައިފައިވެއެވެ. އަދި އެ މައްސަލައިގައި މަޖިލިހުގެ ކުއްލި ޖަލްސާއެއް ބާއްވަން އެދޭނެ ކަމަށް އެ ޕާޓީން ވަނީ ބުނެފައެވެ.

ދައުރުން ބޭރުން ޖަލްސާއެއް ބާއްވާ ނަމަ، މަޖިލިހުގެ 31 މެމްބަރުންގެ ސޮއި ބޭނުންވެއެވެ. އެ ޕާޓީގެ މެމްބަރުންގެ ގޮތުގައި މަޖިލިހުގައި ތިއްބެވީ 12 މެމްބަރުންނެވެ. އެކަން އެމްޑީޕީއަށް ކުރެވެން އޮތީ ޕީއެންސީގެ ބައެއް މެމްބަރުންގެ އެހީއާއެކުގައިކަން ފާހަގަކޮށްލަން ޖެހެއެވެ. 

މިފާއިތުވި ހަފްތާގެ ބުރާސްފަތި ދުވަހު ހިނގައިދިޔަ މި އަލިފާނުގެ ހާދިސާއާއި ގުޅިގެން ތިން ވުޒާރާގެ މަސައްކަތްތައް ހުއްޓި މެދުކަނޑާލައިފައިވެއެވެ. ނަމަވެސް މިހާރު ދަރުބާރުގޭގައި ތިން ވުޒާރާގެެ މަސައްކަތް ތައް ކުރިއަށް ގެންދެވޭނެ އިންތިޒާމް މިހާރު ވަނީ ހަމަޖައްސައިފައެވެ. އަލިފާނުގެ ހާދިސާގައި ސިސްޓަމްތަކަށް ލިބިފައިވާ ގެއްލުންތަކުގެ ސަބަބުން ސަރވާތަކަށް ގެއްލުންވެ އިޢާދަ ކުރެވޭތޯ މަސައްކަތްތައް ދަނީ ކުރަމުންނެވެ.

ދައުލަތުގެ ތިން ވުޒާރާއެއްގައި އަލިފާން ރޯވެ ބޮޑެތި ގެއްލުންތަކެއް ދިމާވެފައިވާ މިދަނޑިވަޅުގައިވެސް އިދިކޮޅު ބައެއް ފަރާތްތަކުން ދަނީ ރައްޔިތުންގެ ހިތްތަކުގައި ސަރުކާރާއިމެދު ނަފްރަތު އުފެދޭފަދަ ވާހަކަތައް ފަތުރަމުންނެވެ. 

މިއަލިފާންގަނޑަކީ ބަޔަކު ގަސްދުގައި ރޯކޮށްލި އަލިފާން ގަނޑެއްކަމަށް ދޭހަވާ ގޮތައްވެސް އެއްބަޔަކު ވާހަކަތައް ފަތުރައިފައިވެއެވެ.