ކުޅިވަރު

ގޯލްޑް ކަޕް: މާލޭ ސިޓީ ކޮޅަށް މައްސަލަ ނިމި، އެ ގްރޫޕްގެ ފަހު މެޗު އަލިފުށިން ކާމިޔާބުކޮށްފި

ގޯލްޑް ކަޕް: މާލޭ ސިޓީ ކޮޅަށް މައްސަލަ ނިމި، އެ ގްރޫޕްގެ ފަހު މެޗު އަލިފުށިން ކާމިޔާބުކޮށްފި

މާލޭ ސިޓީ ކޮޅަށް އަހުމަދު ހުސާމް (ހުސާންކޮ) ކާމިޔާބުކުރި ގޯލަށްފަހު އުފާފާޅު ކުރަނީ، ފޮޓޯ: މިހާރު

މިފްތާޙް މުޙައްމަދު

މިފްތާޙް މުޙައްމަދު

17 ޑިސެމްބަރު 2024، 09:20

17 ޑިސެމްބަރު 2024، 09:20

ހުލާސާ

މުބާރާތުގެ ޑިސިޕްލިނަރީ ކޮމެޓީއިން މި މައްސަލަ ބެލުމަށްފަހު ނިންމީ، އެ ޓީމުން މުބާރާތުގެ ގަވާއިދާ ހިލާފުވެފައި ނުވާ ކަމަށާއި އަދި ކުރެންދޫއިން ފާހަގަކުރި ދެ ކުޅުންތެރިންނަކީ މާލެއަށް ނިސްބަތްވާ ދެ ކުޅުންތެރިން ކަމަށް.

ނައިންޓީ ޕްލަސް ގޯލްޑް ކަޕްގެ ގްރޫޕް-އެޗްގައި އަލިފުއްޓާއި މާލޭ ސިޓީ އާދީއްތަ ދުވަހު ބައްދަލު ކުރުމަށް ހަމަޖެހިފައި އޮތް  މެޗު، އެ ގްރޫޕުގައި ދެން ހިމެނޭ ކުރެންދޫއިން މާލޭ ސިޓީއާ ދެކޮޅަށް ހުށަހެޅި މައްސަލައަކާ ގުޅިގެން ފަސްކުރުމަށްފަހު، އެ މައްސަލަ މާލޭ ސިޓީ ކޮޅަށް ނިންމައި، ފަސްކުރި މެޗު ހޯމަ ދުވަހު ކުޅެފިއެވެ. އެ މެޗު 3-1 އިން އަލިފުށިން ވަނީ ކާމިޔާބުކޮށްފައެވެ.

ކުރެންދޫއިން ހުށަހެޅި މައްސަލައިގައި ބުނެފައިވަނީ، މިދިޔަ ބުރާސްފަތި ދުވަހު މާލޭ ސިޓީއާ ދެކޮޅަށް އެ ޓީމުން ކުޅުނު މެޗުގައި، ރަށުން ބޭރުން ކުޅުންތެރިންޖެހޭ އުސޫލާ މާލޭ ސިޓީއިން ހިލާފުވެފައިވާ ކަމަށެވެ. އެގޮތުން ރަށުން ބޭރު ދެ ކުޅުންތެރިން ހިމެނުމުގެ އިހްތިޔާރު މުބާރާތުގައި ވާދަކުރާ ހުރިހާ ޓީމަކަށް ލިބިފައިވީ ނަމަވެސް، މާލޭ ސިޓީގައި ރަށުން ބޭރު ހަތަރު ކުޅުންތެރިން ހިމެނޭ ކަމަށާއި، މާލެ ޓީމުގެ އަހްމަދު މާއިޝް ރަޝީދާއި އަހްމަދު ނާހިލް އިބްރާހިމްއަކީ ވެސް ރަށުން ބޭރު ކުޅުންތެރިން ކަމަށާއި، މި ދެ ކުޅުންތެރިން ނިސްބަތްވަނީ ދ އަތޮޅު ހުޅުދެއްޔަށް ކަމަށެވެ. 

އަދި އެ ޓީމުން ވަނީ މެޗު ނިމުމާ ހަމައަށް އެ ކުޅުންތެރިންގެ މައުލޫމާތު ފެންނަން ހުރި ގޮތުގެ ސްކްރީން ޝޮޓެއް ވެސް ހިއްސާކޮށްފައެވެ. އެ ސްކްރީންޝޮޓްގައި ބުނާގޮތުން އެ ދެ ކުޅުންތެރިން އޮތީ ދ. ހުޅުދެލީގެ ރެޖިސްޓްރީގައެވެ. 

މި ތުހުމަތު ދޮގުކޮށް މާލޭ ސިޓީ ޓީމުގެ ފަރާތުން ބުނިކަމަށް ހަވީރު ނޫހުގައި ރިޕޯޓުކޮށްފައިވަނީ، އެ ދެ ކުޅުންތެރިން ރަޖިސްޓަރީކޮށްފައި ވަނީ ހެންވޭރު ހޮސްޓޮކް ގެއަށެވެ. މާލެ ޓީމުން ވަނީ އެ ދެ ކުޅުންތެރިންގެ އުފަންދުވަހުގެ ސެޓްފިކެޓްތަކުގެ ފޮޓޯ ވެސް ހުށަހަޅައިފައެވެ. 

މުބާރާތުގެ ޑިސިޕްލިނަރީ ކޮމެޓީއިން މި މައްސަލަ ބެލުމަށްފަހު ނިންމީ، އެ ޓީމުން މުބާރާތުގެ ގަވާއިދާ ހިލާފުވެފައި ނުވާ ކަމަށެވެ. އަދި ކުރެންދޫއިން ފާހަގަކުރި ދެ ކުޅުންތެރިންނަކީ މާލެއަށް ނިސްބަތްވާ ދެ ކުޅުންތެރިން ކަމަށެވެ. 

އެހެންކަމުން ފަސްކުރި މެޗު ހޯމަ ދުވަހު ހަވީރު ކުޅުނު އިރު، މި މެޗު ކާމިޔާބު ކުރުމުން އަލިފުށި ކުއާޓާ ފައިނަލަށް ދަތުރުކުރީ ގްރޫޕްގެ އެއްވަނަ ޓީމުގެ ގޮތުގައެވެ.

މި މެޗުގައި ފުރަތަމަ ލީޑު ނެގީ މާލޭ ސިޓީއިންނެވެ. މިއީ އެ ޓީމަށް ލިބުނު ކޯނަރެއްގެ ބޭނުން ހިފައި، އަލީ ޝަރީފް ބޮލުން ކާމިޔާބުކުރި ގޯލެކެވެ. އެ ޓީމުގެ ލީޑު ފުޅާ ކުރުމަށް ލިބުނު ފުރުސަތުގައި، މިސްރުގެ މިޑްފީލްޑަރު، ހަލީލް ޖަމާލް ފޮނުވާލި ޕެނަލްޓީ ވަނީ އަލިފުށި ގޯލްކީޕަރު އަބްދުއްސައްދާދު އާދަމް މަތަކޮށްފައެވެ. 

އަލިފުއްޓަށް މެޗުގެ ނަތީޖާ ހަމަހަމަ ކޮށްދިނީ، ތަޖުރިބާކާރު ކުޅުންތެރިޔާ މުހައްމަދު ރަޝީދު (ހޮކޭ) އެވެ. 

އަލިފުއްޓަށް މެޗުގެ އޮއެވަރު އެއްކޮށް އަނބުރާލުމަށް ފަސޭހަވީ، ދެވަނަ ހާފުގެ ކުޅުން ފެށުނުތާ ކައިރީގައި، މާލެ ސިޓީގެ ޑިފެންޑަރު، ހުސެއިން ފަޔާޒް (ފަޔާ) އަށް ދެވަނަ ރީނދޫ ކާޑަކާއެކު ރަތް ކާޑެއް ދެއްކުމުންނެވެ. 

އޭގެ ފަހުން އިބްރާހިމް ސަލާމް އަލިފުއްޓަށް ލީޑު ނަގައިދިން އިރު، އެ ޓީމުގެ ލީޑު ފުޅާކޮށްދިނީ މާލޭ ސިޓީ ކީޕަރު ތޮލާލް ހަސަން ކައިރިން ނައްޓާލުމަށްފަހު ޓީމުގެ ފޯވާޑް، އަހުމަދު ހުސާމް (ހުސާންކޮ) އެވެ.

މުބާރާތުގެ ކުއާޓާ ފައިނަލް މެޗުތައް ކުޅޭނީ 18 އަދި 19 ޑިސެމްބަރު ގައެވެ. ކުއާޓާގައި އަލިފުށިން ފުވައްމުލަކު ސިޓީއާ ކުރިމަތިލާން ޖެހޭއިރު، މާލޭ ސިޓީއިން ނިކުންނާނީ ގުރައިދޫއާ ދެކޮޅަށެވެ.

މި ލިޔުން ކިޔާލުމުން

Ads by MSS