ވޯލްޑް އެކުއަޓިކްސް މުބާރާތުގައި ދެ އިވެންޓަކުން ތިން ފަހަރަށް ގައުމީ ރެކޯޑު ހަމްނާ އާކޮށްފި

ހަންގޭރީގެ ބުޑަޕެސްޓުގައި މިހާރު ކުރިޔަށްދާ ވޯލްޑް އެކުއަޓިކްސް ސްވިމިން ޗެމްޕިއަންޝިޕް (25 މީޓަރު) ގައި  ދެ އިވެންޓަކުން ތިން ފަހަރަށް ރާއްޖޭގެ ގައުމީ ރެކޯޑު ހަމްނާ އަހްމަދު އާކޮށްފިއެވެ. 

އެންމެ ފަހުން ހަމްނާ އާކޮށްފައިވަނީ އަންހެނުންގެ ޝޯރޓްކޯސް 50 މީޓަރ ބްރެސްޓްސްޓްރޯކް އިވެންޓުންނެވެ. މި ރެކޯޑު އޭނާ އާކޮށްފައިވަނީ 00:36.55 ސިކުންތުން ރޭސް ނިންމައިގެންނެވެ. އޭގެ ކުރިން، ހަމަ މި މުބާރާތުގައި އޭނާ މި ރެކޯޑު އާކުރީ 100  މީޓަރ ބްރެސްޓްސްޓްރޯކު އިވެންޓުގެ ފުރަތަމަ 50 މީޓަރު 00:36.84 ސިކުންތުން ނިންމައިގެންނެވެ. 

މި މުބާރާތަށް ދިއުމުގެ ކުރިން ވެސް މި އިވެންޓުގެ ރެކޯޑު އޮތީ ހަމްނާގެ އަތުގައެވެ. މިއީ ހަމަ މިއަހަރު ހަންގޭރީގައި ބޭއްވުނު ހާޖޮސް އަލްފްރެޑް ކުޕާ 3 ގައި 00:37.13 ސިކުންތުން ރޭސް ފުރިހަމަކޮށްގެން އޭނާ އާކުރި ރެކޯޑެކެވެ.

މިހާރު ކުރިޔަށްދާ ވޯލްޑް އެކުއަޓިކްސް ސްވިމިން ޗެމްޕިއަންޝިޕްގައި ދެން ހަމްނާ އާކޮށްފައިވަނީ އަންހެނުންގެ ޝޯޓްކޯސް 100 މީޓަރު ބްރެސްޓްސްޓްރޯކް އިވެންޓުގެ ގައުމީ ރެކޯޑެވެ. ހަމްނާ މި ރެކޯޑު އާކުރީ، 01:20.69 އިން ރޭސް  ނިންމައިގެންނެވެ. މިއީ ވެސް ކުރިން ހަމްނާގެ އަތުގައި އޮތް ރެކޯޑެކެވެ. އެއީ މިދިޔަ މަހު ހަންގޭރީގައި ބޭއްވުނު އެ ޤައުމުގެ 20 ވަނަ ނެޝަނަލް ޝޯޓް-ޓްރެކް ޗެމްޕިއަންޝިޕްގައި ވާދަކޮށް،01:22.65   އިން ރޭސް ނިންމައިގެން އޭނާ ހެދި ރެކޯޑެކެވެ. 

މި މުބާރާތުގައި ހަމްނާގެ އިތުރުން މުހައްމަދު އާން ހުސެއިން އާއި މުހައްމަދު ރިހާން ޝިހާމް ވެސް ވަނީ އެ ފެތުންތެރިންގެ އިވެންޓުން ގައުމީ ރެކޯޑު އައުކޮށްފައެވެ. އޭގެ ތެރެއިން އާން ވަނީ ދެ އިވެންޓަކުން ގައުމީ ރެކޯޑު އައުކޮށްފައެވެ.