ވޯލްޑް އެކުއަޓިކްސް މުބާރާތުގައި ދެ އިވެންޓަކުން އާން ގައުމީ ރެކޯޑު އާކޮށްފި

ހަންގޭރީގެ ބުޑަޕެސްޓުގައި މިހާރު ކުރިޔަށްދާ ވޯލްޑް އެކުއަޓިކްސް ސްވިމިން ޗެމްޕިއަންޝިޕް (25 މީޓަރު) ގައި  ދެ އިވެންޓަކުން މުހައްމަދު އާން ހުސެއިން ރާއްޖޭގެ ގައުމީ ރެކޯޑު އާކޮށްފިއެވެ. 

މި މުބާރާތުގައި އާން އެންމެ ފަހުން އާކުރީ ފިރިހެނުންގެ ޝޯރޓްކޯސް 50 މީޓަރ ފްރީސްޓައިލް އިވެންޓުގެ ގައުމީ ރެކޯޑެވެ. އޭނާ  މި ރެކޯރޑް އާކޮށްފައިވަނީ 00:23.35 އިން ރޭސް ނިންމައިގެންނެވެ.

މިއީ ކުރިންވެސް އާން އާކޮށްފައިވާ ރެކޯޑެކެވެ. އެއީ މިދިޔަމަހު ހަންގޭރީގައި ބޭއްވުނު އެޤައުމުގެ 20 ވަނަ ނެޝަނަލް ޝޯރޓްޓްރެކް ޗެމްޕިއަންޝިޕް ގައި 00:23.76 އިން ރޭސް ފުރިހަމަކޮށްގެންނެވެ.

މި މުބާރާތުގައި އޭނާ ދެން އާކޮށްފައިވަނީ ފިރިހެނުންގެ ޝޯރޓްކޯސް 100 މީޓަރ ފްރީސްޓައިލް އިވެންޓުގެ ޤައުމީ ރެކޯރޑެވެ. އެއީ 00:52.29 އިން ރޭސް ނިންމައިގެންނެވެ.

މި އިވެންޓުގެ ރެކޯޑު ކުރިން ވެސް އޮތީ ހަމަ އާންގެ އަތުގައެވެ. ފިރިހެނުންގެ ޝޯރޓްކޯސް 50 މީޓަރ ފްރީސްޓައިލް ރެކޯޑެކޭ އެއްގޮތަށް، ފިރިހެނުންގެ ޝޯރޓްކޯސް 100 މީޓަރ ފްރީސްޓައިލް އިވެންޓުގެ ޤައުމީ ރެކޯރޑު ވެސް އޭނާ އާކުރީ މިދިޔަމަހު ހަންގޭރީގައި ބޭއްވުނު އެޤައުމުގެ 20 ވަނަ ނެޝަނަލް ޝޯރޓްޓްރެކް ޗެމްޕިއަންޝިޕް ގައެވެ. އެއީ 00:53.45 އިން ރޭސް ފުރިހަމަކޮށްގެންނެވެ. 

ވޯލްޑް އެކުއަޓިކްސް ސްވިމިން ޗެމްޕިއަންޝިޕްގައި ރާއްޖޭގެ ހަމްނާ އަހްމަދު ދެ އިވެންޓަކުން ތިން ފަހަރަށް ގައުމީ ރެކޯޑު އާކޮށްފައި ވެއެވެ. އެއީ އަންހެނުންގެ ޝޯރޓްކޯސް 50 މީޓަރ ބްރެސްޓްސްޓްރޯކް އިވެންޓުންނާއި، އަންހެނުންގެ ޝޯޓްކޯސް 100 މީޓަރު ބްރެސްޓްސްޓްރޯކް އިވެންޓުންނެވެ. 

މި ދެ ފެތުންތެރިންގެ އިތުރުން މުހައްމަދު ރިހާން ޝިހާމް ވެސް ވަނީ މި މުބާރާތުގައި ގައުމީ ރެކޯޑު އައުކޮށްފައެވެ. ގައުމީ ރެކޯޑު އޭނާ އާކުރީ ފިރިހެނުންގެ ޝޯޓްކޯސް 200 މީޓަރު ބަޓަފްލައި އިވެންޓުންނެވެ.