ޚަބަރު
ޖޫރިމަނާ ކުރެވޭކަން އަންގާނީ މޯބައިލް ފޯނުގެ ޛަރީޢާއިން ކުރު މެސެޖެއް މެދުވެރިކޮށް: ފުލުހުން

ވޭޕް އަދި އޭގެ ބައިތައް މަނާކުރެއްވުން ފޮޓޯ: އިންޓަނެޓް
ދުންފަތް ކޮންޓްރޯލުކުރުމާބެހޭ ޤާނޫނަށް ގެނެވުނު އިޞްލާޙާ ގުޅިގެން، އިލެކްޓްރޯނިކް ސިނގިރޭޓް ނުވަތަ ވޭޕް ބޭނުންކުރާ ފަރާތްތަކާމެދު ޤާނޫނީ ފިޔަވަޅު އެޅުމަށް ދިވެހި ފުލުހުންގެ ޚިދުމަތުން ނިންމައިފިއެވެ.
ދިވެހި ފުލުހުންގެ ޚިދުމަތުން މިއަދު ނެރުނު ބަޔާނެއްގައި ބުނެފައިވަނީ، ދުންފަތް ކޮންޓްރޯލުކުރުމާބެހޭ ޤާނޫނު (ޤާނޫނު ނަންބަރު 15/2010) އަށް 1 ވަނަ އިޞްލާޙު ގެނައުމުގެ ޤާނޫނުގެ ދަށުން ގެނެވުނު އިޞްލާޙާ ގުޅިގެން، އެ ޤާނޫނު ތަންފީޛު ކުރުމުގައި ޢަމަލުކުރަމުން ގެންދާނެ ގޮތް އާންމުންގެ ސަމާލުކަމަށް ގެނެސްދޭން ބޭނުންވާ ކަމަށެވެ.
މި ޤާނޫނާ އެއްގޮތްވާ ގޮތުގެ މަތިން، އިލެކްޓްރޯނިކް ސިނގިރޭޓް ނުވަތަ ވޭޕްކުރުމަށް ބޭނުންކުރާ އާލާތްތައް ވިއްކުމާއި، ހިލޭ ދިނުމާއި، ބެހުމާއި، އަދި އެކަކު އަނެކަކަށް ދޭ ފަރާތްތަކާމެދު ދިވެހި ފުލުހުންގެ ޚިދުމަތުން ޤާނޫނީ ފިޔަވަޅު އަޅައި، ޖޫރިމަނާކުރުމުގެ މަސައްކަތް ކުރަމުން ގެންދާނެ ކަމަށް ފުލުހުން ބުނެއެވެ. އަދި މީގެ އިތުރުން، މިފަދަ އާލާތްތައް ބޭނުންކުރާ ފަރާތްތަކާ ދެކޮޅަށްވެސް ހަމަ އެފަދައިން ޤާނޫނީ ފިޔަވަޅު އަޅަމުން ގެންދާނެ ކަމަށް ފުލުހުން ވަނީ ހާމަކޮށްފައެވެ.
ޖޫރިމަނާ ކުރެވޭ ފަރާތްތަކަށް އެކަމުގެ މަޢުލޫމާތު މޯބައިލް ފޯނުގެ ޛަރީޢާއިން ކުރު މެސެޖެއް މެދުވެރިކޮށް ފޮނުވޭނެ ކަމަށާއި، މި މެސެޖުގައި ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ހިމެނިފައި ވާނެ ކަމަށްވެސް ފުލުހުން ބުނެއެވެ.
ފުލުހުންގެ ބަޔާނުގައި، ދުންފަތް ކޮންޓްރޯލުކުރުމާބެހޭ ޤާނޫނަށް ގެނެވުނު އިޞްލާޙަށް ހުރިހާ ފަރާތްތަކުންވެސް ފުރިހަމައަށް ޢަމަލުކުރެއްވުމަށާއި، މި ޤާނޫނު ތަންފީޛުކުރުމުގައި ދިވެހި ފުލުހުންގެ ޚިދުމަތަށް ފުރިހަމަ އެއްބާރުލުން ދެއްވުމަށް އިލްތިމާސްކޮށްފައިވެއެވެ. އަދި އެންމެންގެ ވެސް އަމާޒަކަށް ވާންވާނީ ދުންފަތުގެ އިސްތިޢުމާލުކުރުމުން ދުރުހެލިވެފައިވާ ދުޅަހެޔޮ މުޖުތަމަޢެއް ބިނާކުރުން ކަމަށް ފުލުހުން ވަނީ ބަޔާނުގައި ފާހަގަކޮށްފައެވެ.