މީޑިއާ ކައުންސިލްގެ އައު ރައީސަކަށް ސަޤީފް އިންތިޚާބުވެއްޖެ

މޯލްޑިވްސް މީޑިއާ ކައުންސިލްގެ އައު ދައުރުގެ ރައީސަކަށް ތިލަދުން އޮންލައިންގެ ހުސައިން ސަޤީފް މިއަދު އިންތިޚާބުކޮށްފިއެވެ. މީޑީއާ ކައުންސިލްގައި ބޭއްވުނު ވޯޓުލުމުގައި ސަޤީފަށް 8 ވޯޓު ލިބުނު އިރު، އޭނާގެ ވާދަވެރިޔާ "މިހާރު" ނޫހުގެ ފާތިމަތު ޝަނާ މުހައްމަދަށް ލިބުނީ 7 ވޯޓެވެ.

މީޑިއާ ކައުންސިލްގެ އައު ދައުރު ފެށުނީ މިއަދުއެވެ. އިއްޔެ ބޭއްވުނު ފުރަތަމަ ވޯޓުލުމުގައި ދެ ކެންޑިޑޭޓުންގެ ވޯޓު އެއްވަރުވުމާ ގުޅިގެން  އަލުން ވޯޓުލުން ބޭއްވުނެވެ.

މޯލްޑިވްސް މީޑިއާ ކައުންސިލްގެ ނައިބު ރައީސް

މީގެ އިތުރުން، ކައުންސިލްގެ ނައިބު ރައީސަކަށް  އަމިއްލަ ގޮތުން ކައުންސިލަށް ހޮވުނު މެންބަރު އިބްރާހީމް މުޙައްމަދު 9 ވޯޓު ހޯދައިގެން އިންތިޚާބުވިއެވެ.

މޯލްޑިވްސް މީޑިއާ ކައުންސިލްގައި ޖުމްލަ 15 މެންބަރުން ހިމެނެއެވެ. މީގެ ތެރޭގައި މީޑިއާތަކަށް ނިސްބަތްވާ 8 ނޫސްވެރިންނާއި އަމިއްލަ ގޮތުން ހޮވާ 7 މެންބަރުން ހިމެނެއެވެ. ކައުންސިލްގެ މެންބަރުންގެ ދައުރަކީ ދެ އަހަރު ދުވަހެވެ.

މި އައު ދައުރުގައި މީޑިއާ ކައުންސިލްގެ މަސައްކަތްތައް އިތުރަށް ހަރުދަނާކޮށް، ރާއްޖޭގެ މީޑިއާގެ މިނިވަންކަން ކަށަވަރުކުރުމަށް މަސައްކަތްކުރާނެ ކަމަށް އައު ރައީސް ސަޤީފް ވަނީ ވިދާޅުވެފައެވެ.