ދުނިޔެ
ކަޕިލް ޝަރްމާގެ ނަސްލީ ފުރައްސާރައަށް އެޓްލީ ދިން ރައްދު ވައިރަލްވެއްޖެ

ކަޕިލް ޝަރުމާ އަދި އެޓްލީ ފޮޓޯ: އިންޓަނެޓް
ބޮލީވުޑްގެ މަޝްހޫރު ކޮމީޑިއަން ކަޕިލް ޝަރްމާގެ ޝޯއެއްގައި ފިލްމް ޑައިރެކްޓަރ އެޓްލީއަށް ކުރި ނަސްލީ ފުރައްސާރައަކަށް އެޓްލީ ދިން ރައްދު މިހާރު ވަނީ އިޖުތިމާޢީ މީޑިއާގައި ވައިރަލްވެފައެވެ.
ނެޓްފްލިކްސްގެ "ދަ ގްރޭޓް އިންޑިއަން ކަޕިލް ޝޯ" ގެ ސީޒަން ފައިނަލް އެޕިސޯޑްގައި އެޓްލީގެ އަންނަން އޮތް ފިލްމް "ބޭބީ ޖޯން" ޕްރޮމޯޓް ކުރުމަށް އެޓްލީއާއި ފިލްމުގެ ލީޑް އެކްޓަރުންކަމުގައިވާ ވަރުން ދަވަން، ކީރްތީ ސުރެޝް އަދި ވަމީގާ ގައްބީ ބައިވެރިވިއެވެ.
ޝޯގައި އެޓްލީއާ މުޚާތަބުކޮށް ކަޕިލް ބުނި ގޮތުގައި "ފުރަތަމަ ފަހަރަށް ސްޓާރަކާ ބައްދަލުވާއިރު، އެޓްލީ ކޮބައިތޯ އެމީހުން އަހާތަ؟" މިއީ އެޓްލީގެ ސިފަތަކަށް އަމާޒުކޮށް ކުރި ފުރައްސާރައެކެވެ.
ނަމަވެސް އެޓްލީ މިއަށް ދިން ޖަވާބުގައި ބުނި ގޮތުގައި "މީހުން ޖަޖްކުރަންވާނީ އެމީހުންގެ ސިފައިން ނޫނެވެ. އެމީހުންގެ ހިތުންނެވެ." އޭނާ އިތުރަށް ބުނި ގޮތުގައި އޭނާގެ ފުރަތަމަ ފިލްމް ޕްރޮޑިއުސްކުރި އޭއާރް މުރުގަދާސްއަށް ޝުކުރުވެރިވާ ކަމަށާއި، އެއީ އޭނާގެ ސިފަތަކަށް ބެލުމެއްނެތި އޭނާގެ ސްކްރިޕްޓް ނެރޭޝަނަށް ކަމުދިޔަ ކަމަށެވެ.
މި މަންޒަރުގެ ކްލިޕް އިޖުތިމާޢީ މީޑިއާގައި ވައިރަލްވުމާ ގުޅިގެން ކަޕިލް ޝަރމާއަށް ގިނަ ފާޑުކިޔުންތަކެއް އަމާޒުވަމުންދެއެވެ.
އެޓްލީގެ އަންނަން އޮތް ފިލްމް "ބޭބީ ޖޯން" އަކީ އޭނާގެ ކުރީގެ ހިޓް ފިލްމް "ތެރީ" ގެ ރީމޭކެކެވެ. މި ފިލްމް ތިއޭޓަރުތަކަށް ނެރުމަށް ހަމަޖެހިފައިވަނީ މިއަހަރުގެ ޑިސެމްބަރު 25 ވަނަ ދުވަހުއެވެ.