ޚަބަރު
ސައިބަރ ކްރައިމަކީ ޤާނޫނުން ކުށެއް ކަމުގައި ކަނޑައަޅާ ބިލު ރައީސް ތަސްދީޤު ކުރައްވައިފި
ސައިބަރ ކްރައިމް އަށް އަހުލުވެރިކުރުމަށް ހަދައިފައިވާ ޕޯސްޓަރެއް.
ސައިބަރ ކްރައިމަކީ ޤާނޫނުން ކުށެއް ކަމަށް ކަނޑައަޅާ ބިލު ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތަސްދީޤުކުރައްވައިފިއެވެ.
މިއަދު ރައީސް ޑރ މުޢިއްޒު ތަސްދީޤުކޮށްދެއްވި މިބިލަކީ ދިވެހިރާއްޖޭގެ ޤާނޫނުލްޢުޤޫބާތަށް 6 ވަނަ އިޞްލާޙު ގެނައުމުގެ ބިލެވެ.
މި ބިލަކީ، 2024 ޑިސެންބަރު 9 ވީ ހޯމަ ދުވަހު ބޭއްވެވި ރައްޔިތުންގެ މަޖިލީހުގެ 2024 ވަނަ އަހަރުގެ ތިންވަނަ ދައުރުގެ 58 ވަނަ ޖަލްސާއިން ފާސްކުރެއްވި ބިލެކެވެ.
މި ބިލުގެ މައިގަނޑު މަޤްޞަދެއް ކަމުގައި ބުނެފައިވަނީ ސައިބަރ ކްރައިމަކީ ޤާނޫނުން ކުށެއް ކަމުގައި ކަނޑައަޅައި، އަންނަނިވި ކުށްތައް ސައިބަރކްރައިމްގެ ގޮތުގައި ޤާނޫނުލްޢުޤޫބާތަށް އިތުރުކުރުމެވެ.
- ހުއްދަ ނެތި ކޮމްޕިއުޓަރ ސިސްޓަމަކަށް އެކްސެސްވުން.
- ކުށެއް ކުރުމަށް މަގުފަހި ކުރުމުގެ ނިޔަތުގައި ހުއްދަ ނެތި ކޮމްޕިއުޓަރ ސިސްޓަމަކަށް އެކްސެސްވުން.
- ހުއްދަ ނެތި ކޮމްޕިއުޓަރ ޑޭޓާ އިންޓަސެޕްޓް ކުރުން.
- ހުއްދަ ނެތި ކޮމްޕިއުޓަރ ސިސްޓަމަކަށް އިންޓަފިއަރ ކުރުން.
- ނަހަމަ ގޮތެއްގައި ޑިވައިސްތައް ބޭނުން ކުރުން.
- ސައިބަރ ވަޔަލަންސްގެ އަމަލުތައް.
- ކޮމްޕިއުޓަރާ ގުޅުން ހުރި ފޯޖަރީގެ އަމަލުތައް.
- ކޮމްޕިއުޓަރާ ގުޅުން ހުރި އޮޅުވާލުމުގެ އަމަލުތައް.
- ކޮޕީރައިޓާއި އެއާ ގުޅޭ އެހެނިހެން ހައްގުތަކަށް އަރައިގަތުމުގެ އަމަލުތައް.
ދިވެހިރާއްޖޭގެ ޤާނޫނުލްޢުޤޫބާތު އަށް 6 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ މިއަދު ތަޞްދީޤުކުރެއްވުމާއި ގުޅިގެން މި ޤާނޫނު މިއަދު ވަނީ ދިވެހި ސަރުކާރުގެ ގެޒެޓުގައި ޝާއިޢުކޮށްފައެވެ. އަދި މިއަދުން ފެށިގެން މިޤާނޫނަށް ޢަމަލުކުރަން ފެށޭނެއެވެ.
