މެގްނިޓިއުޑް 7.4 ގެ ބިންހެލުމެއް ވެނުއަޓޫގެ ވެރިރަށް ކައިރިއަށް އަރައިފި

 ވެނުއަޓޫގެ ޕޯޓް ވިލާ ކައިރިއަށް 7.4 މެގްނިޓިއުޑްގެ ބިންހެލުމެއް އައިސްފި ކަމަށް އެމެރިކާގެ ޖިއޮލޮޖިކަލް ސާވޭއިން ހާމަކޮށްފިއެވެ.

 އަންގާރަ ދުވަހު ބިންހެލުން އައިސްފައި ވަނީ ވެނައަޓޫގެ ވެރިރަށާއި 37 ކިލޯމީޓަރު ދުރުގައި 10 ކިލޯމީޓަރު (6.2 މޭލު) ފުންމިނުގައި އޮންނަ ތަނަކަށެވެ.

މިބިންހެލުމާއި ބެހޭ ފަހުގެ މަޢުލޫމާތުތައް ބުނާ ގޮތުން ބިންހެލުމުގެ ބާރު 43 ކިލޯމީޓަރު (26.7 މޭލު) އަޑިއަށް އަރާފައިވާއިރު، އޭގެ ފަހުން ހަމަ އެތަނާ ކައިރިއަށް 5.5 މެގްނިޓިއުޑްގެ އަފްޓާޝޮކެއް އައިސްފައިވެ އެވެ. 

ސޯޝަލް މީޑިއާގައި އާންމުކުރި ބިންހެލުމުގެ އަސަރުކުރި ސަރަހައްދުތަކުގެ ފޫޓޭޖުތަކުން ފެންނަ ގޮތުގައި ޕޯޓް ވިލާގައި ހުންނަ ބޭރުގެ އެމްބަސީތައް ހުންނަ އިމާރާތެއްގެ ކުޑަދޮރުތަކާއި ކޮންކްރީޓް ތަނބުތައް ވެއްޓިފައިވެއެވެ. 

 އޭގެ ތެރޭގައި އެމެރިކާ، ފްރާންސް، ނިއުޒީލެންޑް އަދި އިނގިރޭސިވިލާތުގެ އެމްބަސީ ހިމެނެއެވެ.

ވަނުއަޓޫ ސްޓޭޓްގެ ބްރޯޑްކާސްޓަރު ވީބީޓީސީން ރިޕޯޓްކޮށްފައިވާ ގޮތުގައި ބިންހެލުން އައިސްގެން ވެއްޓިފައިވާ އިމާރާތެއްގައި ތާށިވެގެން އެކަކު ވަނީ މަރުވެފައެވެ.

ބިންހެލުމުގައި އިތުރު ގެއްލުންތަކެއް ލިބިފައިވާ ކަމަށާއި، ރަށުގެ އިމާރާތްތަކުގައި މީހުންތައް ތާށިވެފައި ތިބި ކަމަށާޢި، މަރުވެފައިވާ އެހެން މީހުންގެ ހަށިތައްވެސް ފެނިފައިވާ ކަމަށް ޕޯޓް ވިލާގެ ރައްޔިތެއް ކަމަށްވާ މައިކަލް ތޮމްޕްސަން ސެޓެލައިޓް ފޯނުން އޭއެފްޕީއަށް ބުނެފައިވާ ކަމަށް އަލްޖަޒީރާއިން ރިޕޯޓު ކޮށްފައިވެއެވެ.

ވަނުއަޓޫގައި ދިރިއުޅޭ ނޫސްވެރިއެއް ކަމަށްވާ ޑޭން މެކްގަރީ ބުނީ މި ބިންހެލުމަކީ 20 އަހަރު ތެރޭގައި އޭނާއަށް ފެނުނު އެންމެ ބޮޑު ބިންހެލުން ކަމަށެވެ.

ސޯޝަލް މީޑިއާގައި ކުރި ޕޯސްޓެއްގައި މެކްގަރީ ވަނީ ބިންހެލުމަކީ "މާސް ކެޒުއަލިޓީ އިވެންޓެއް" ކަމަށް ސިފަކޮށްފައެވެ. އެމަޖެންސީ ވޯޑުގެ ބޭރުގައި ޓްރައިއޭޖް ސެންޓަރެއް ގާއިމްކޮށްފައިވާ ވިލާ ސެންޓްރަލް ހޮސްޕިޓަލުން މީހަކު މަރުވިކަން ކަށަވަރުކޮށްދީފައިވާކަމަށްވެސް އޭނާ ބުނެފައިވެއެވެ.

ބިންހެލުމުގެ ފަހުން ވަނުއަތޫ ސަރުކާރުގެ ވެބްސައިޓްތައް ވަނީ އޮފްލައިންވެފައެވެެ. ފުލުހުންނާއި އާންމު އެހެން އިދާރާތަކުގެ ފޯނު ނަންބަރުތަކަށްވެސް ނުގުޅޭ ކަމަށް އަލްޖަޒީރާގައި ވަނީ ބުނެފައެވެ. ވަނުއަތޫ ޖިއޮހެޒާޑްސް އެޖެންސީ އާއި ބޮޑުވަޒީރުގެ އޮފީހުގެ ސޯޝަލް މީޑިއާ ތަކަށްވެސް މިކަމާ ގުޅޭ އެއްވެސް އަޕްޑޭޓެއް އަދިއެއް އައިސްފައެއް ނުވެއެވެ. 

ހޮނޮލޫލޫގެ ޕެސިފިކް ސުނާމީ އިންޒާރުދޭ މަރުކަޒުން ބުނީ ބިންހެލުމަށް ފަހު ރާޅުތައް ފެނުނު ނަމަވެސް ފަހުން ފިޖީ، ކަރްމަޑެކް އައިލެންޑްސް، ކިރިބާޓީ، ނިއު ކެލެޑޯނިއާ، ޕަޕުއާ ނިއު ގިނީ، ސޮލޮމަން އައިލެންޑްސް، ޓޫވާލޫ އަދި ވަލިސް ފަދަ އަވަށްޓެރި ޖަޒީރާތަކަށް ސުނާމީގެ ނުރައްކާ ފިލައިގެން ގޮސްފައިވާކަމަށެވެ.

 އޮސްޓްރޭލިއަން ބިއުރޯ އޮފް މީޓިއޮރޮލޮޖީން ބުނެފައިވަނީ އެގައުމަށް ސުނާމީގެ ނުރައްކަލެއް ނެތް ކަމަށެވެ. ނިއުޒީލެންޑްގެ ކަމާބެހޭ ފަރާތްތަކުން ވެސް ބުނެފައި ވަނީ ސުނާމީގެ ނުރައްކަލެއް ނެތް ކަމަށެވެ. އޮސްޓްރޭލިއާގެ ރެޑްކްރޮސްގެ ތަރުޖަމާނަކާއި ހަވާލާދީ އަލްޖަޒީރާގައި ބުނެފައިވަނީ އެހިތެރިކަމަށް ގޮވާލައިފިނަމަ އިޖާބަދިނުމަށް ތައްޔާރަށް އޮތް ކަމަށެވެ.

 "ތަމްރީނު ލިބިފައިވާ އަދި ތަޖުރިބާކާރު ރެޑްކްރޮސްގެ ޓީމުތައް ތިބީ ތައްޔާރީ ޙާލަތުގައި، ކުރިންސުރެ ތައްޔާރުކޮށްފައިހުރި ރިލީފް އައިޓަމްތަކުން އަސަރުކުރި ކޮމިއުނިޓީތަކަށް އެހީތެރިވުމަށް ތައްޔާރަށް،" އޮސްޓްރޭލިއާގެ ރެޑްކްރޮސް އިން ހާލަތު ގާތުން މޮނިޓަރ ކުރަމުން ގެންދާނެ.” އޮސްޓްރޭލިޔާގެ ތަރުޖަމާނު ވިދާޅުވެފައިވެއެވެ. 

ވަނުއަޓޫ އަކީ ދެކުނު ޕެސިފިކް ކަނޑުގައި އޮންނަ މެލޭނޭޝިއާގެ ޖަޒީރާ ޤައުމެކެވެ. މި ޖަޒީރާއަކީ އޮސްޓްރޭލިއާގެ އުތުރުން 1،750 ކިލޯމީޓަރު (1،090 މޭލު) އިރުމަތިން، ނިއު ކެލެޑޯނިއާގެ އިރުއުތުރުން 540 ކިލޯމީޓަރު (340 މޭލު) ދުރުގައި، ނިއު ގިނީގެ އިރުމައްޗާއި، ސޮލޮމަން އައިލެންޑްސްގެ އިރުދެކުނުން އަދި ފިޖީގެ ހުޅަނގުން އޮންނަ ޤައުމެކެވެ.