ކުޅިވަރު
މިދިޔަ އަހަރު ބާއްވަން އުޅެ ނުބޭއްވުނު ސައުތު އޭޝިއަން ގޭމްސް އަނެއްކާ ވެސް ފަސްކޮށްފި

އައިއޯއައިޖީ 2019

ފަރުދުން
17 ޑިސެމްބަރު 2024، 11:15
17 ޑިސެމްބަރު 2024، 11:15
ހުލާސާ
ޕާކިސްތާން އޮލިމްޕިކް އެސޯސިއޭޝަން/ކޮމިޓީ އިން މިހާރު ނިންމާފައި ވަނީ އަންނަ އަހަރުގެ އޮކްޓޫބަރު މަހު ތެރޭ ޕާކިސްތާންގެ ނެޝަނަލް ގޭމްސް ބޭއްވުމަށް ފަހު، ނޮވެމްބަރު މަހު ސައުތު އޭޝިއަން ގޭމްސް ބޭއްވުމަށް.
ޕާކިސްތާނުގައި ނިމިދިޔަ 2023 ވަނަ އަހަރު ބޭއްވުމަށް މަސައްކަތް ކުރި ސައުތު އޭޝިއަން ގޭމްސް މި އަހަރު ވެސް ނުބޭއްވި، އަނެއްކާ މިއަންނަ އަހަރަށް ފަސްކޮށްފިއެވެ. ޕާކިސްތާން އޮލިމްޕިކް އެސޯސިއޭޝަން/ކޮމިޓީ (ޕީއޯއޭ) އިން މިހާރު އެ މުބާރާތް ބޭއްވުމަށް ތާވަލުކޮށްފައި އޮތީ 2025 ވަނަ އަހަރުގެ ނޮވެމްބަރު މަހުއެވެ.
މި އަންނަ އަހަރުގެ ފެބުރުވަރީ މަހަކީ ވެސް، މި ސަރަހައްދުގެ އެންމެ ބޮޑު ކުޅިވަރު މުބާރާތް ބޭއްވުމަށް ކުރިން މަޝްވަރާކުރި ތާރީހެކެވެ. އެ މުއްދަތުގައި މުބާރާތް ބޭއްވުމަށް ޕީއޯއޭ އިން ބަޖެޓު ވެސް ތައްޔާރު ކުރިއެވެ.
ނަމަވެސް، ޕީއޯއޭ އިން ހެދި ދެ މިލިއަން ޑޮލަރުގެ ބަޖެޓާމެދު ޕާކިސްތާން ސަރުކާރުގެ އިކޮނޮމިކް ކޯޑިނޭޝަން ކޮމިޓީ (އީސީސީ) އިން ބުނެފައިވަނީ، އެއީ ބޮޑު އަދަދެއް ކަމަށާއި، އެ ހަރަދުތަކުގެ އަންދާޒާގެ ތަފްސީލީ ރިޕޯޓެއް ބޭނުންވާނެ ކަމަށެވެ.
މީގެ އިތުރުން، ބަޖެޓުގައި އިތުރަށް ފައިސާ ހިމަނާފައިވާކަމަށް ވެސް އީސީސީގެ ބައެއް މެމްބަރުން ތުހުމަތުކުރިއެވެ. މި ސަބަބާ ހެދި ގޭމްސް ބޭއްވުމުގެ މަސައްކަތް މަޑުޖެހި، މިއަންނަ އަހަރުގެ އޭޕްރީލް މަހަށް ފަސްކުރަން ވެސް ވާހަކަދެކެވިފައި ވެއެވެ.
ނަމަވެސް ރިޕޯޓުތައް ބުނާ ގޮތުން، ޕީއޯއޭ އިން މިހާރު ނިންމާފައި ވަނީ އަންނަ އަހަރުގެ އޮކްޓޫބަރު މަހު ތެރޭ ޕާކިސްތާންގެ ނެޝަނަލް ގޭމްސް ބޭއްވުމަށް ފަހު، ނޮވެމްބަރު މަހު ސައުތު އޭޝިއަން ގޭމްސް ބޭއްވުމަށެވެ.
ސައުތު އޭޝިއަން ގޭމްސް އެންމެ ފަހުން ބާއްވާފައިވަނީ 2019 ވަނަ އަހަރު ޑިސެމްބަރު މަހު ނޭޕާލުގެ ކަތުމަންޑޫ އާއި ޕޮކާރާގައެވެ. އެ ފަހަރު ވެސް ގޭމްސް ބޭއްވުނީ އެކި ފަހަރު މަތިން ޝެޑިއުލްކޮށްގެންނެވެ.