ނާއުއްމީދުވެ މާޒިޔާއިން ޕްރެކްޓިސްތައް މެދުކަނޑާލަނީ

ފުޓުބޯޅަ ސީޒަނަށް ތައްޔާރުވުމުގެ ގޮތުން، ނޮވެމްބަރު މަހުގެ 27 ވަނަ ދުވަހުން ފެށިގެން ފަރިތަކުރަމުން އައި މާޒިޔާ ސްޕޯޓްސް އެންޑް ރެކްރިއޭޝަނުން އެ ޓީމުގެ ފަރިތަކުރުންތައް މެދުކަނޑާލައިފިއެވެ. މާޒިޔާއަކީ ސީޒަނަށް ތައްޔާރުވުމަށް ފަރިތަކުރަމުން އައި ހަމައެކަނި ޓީމު ވެސް މެއެވެ.

މާޒިޔާއިން ފަރިތަކުރުންތައް ފަށާފައިވަނީ، ފުޓްބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) އިން ކްލަބްތަކަށް ފޮނުވާފައިވާ ޑްރާފްޓް ކަލަންޑަރުގައިވާ ގޮތުން، ޖެނުއަރީ މަހު ފަހުކޮޅު ފުޓުބޯޅަ ސީޒަން ފަށާނެކަމަށް ތާވަލުކޮށްފައި އޮތުމުންނެވެ. އެގޮތުން ސީޒަން ހުޅުވުމުގެ ގޮތުން ކުޅޭ ޗެރިޓީ ޝީލްޑް މެޗު ޖެނުއަރީ 24 ވަނަ ދުވަހަށް ތާވަލުކޮށްފައި އޮތްއިރު، ސީޒަނުގެ ފުރަތަމަ މުބާރާތެއްގެ ގޮތުން ކުޅޭ ޕްރެޒިޑެންޓްސް ކަޕް ފަށާނެ ތާރީހަކަށް ކަނޑައަޅާފައިވަނީ ޖެނުއަރީ 29 ވަނަ ދުވަހުއެވެ. 

މީގެ އިތުރުން، ގިނަ ދުވަސްތަކަކަށް މެދުކެނޑިފައި އޮތް ދިވެހި ޕްރިމިއަރ ލީގު ފަށާނެ ދުވަހަކަށް އެ ކަލަންޑަރުގައި ބުނެފައިވަނީ ފެބުރުވަރީ މަހުގެ 25 ވަނަ ދުވަހެވެ.

ޑްރާފްޓް ކަލަންޑަރުގައި މިހެން އޮތް ނަމަވެސް، މަންޒަރުތައް ފެންނަ ގޮތުން ކަނޑައަޅާފައި އޮތް ތާވަލާ އެއްގޮތަށް ސީޒަން ފެށޭނެކަމުގެ އުއްމީދެއް ނެތެވެ.

މާޒިޔާއިން ޕްރެކްޓިސް މެދުކަނޑާލުމަށް ނިންމި އެންމެ ބޮޑު އެއް ސަބަބަކީ، އެފްއޭއެމްގެ ޑްރާފްޓް ކަލަންޑަރާ އެއްގޮތަށް ޖެނުއަރީގައި ސީޒަން ފެށޭނެ ކަމަށް ނުބެލެވޭތީކަމަށް، އެ ކްލަބުގެ އޮފިޝަލަކު 'އަދަދު ސްޕޯޓްސް' އަށް ދިން އިންޓަވިއުއެއްގައި ވެސް ބުނެފައި ވެއެވެ. 

އަދި މި ބްރޭކާއެކު އެ ޓީމުގެ ކޯޗު، ޑްރަގަން ޑުކަނޯވިޗް ޗުއްޓީއަކަށް އެނބުރި ގައުމަށް ދިއުމަށް ވެސް ވަނީ ނިންމާފައެވެ. ޑުކަނޯވިޗް ނިސްބަތްވަނީ ސާބިއާއަށެވެ. 

ޑުކަނޯވިޗް މާޒިޔާ އާއި ހަވާލުވެފައި ވަނީ މިދިޔަ އޯގަސްޓު މަހުއެވެ.  ޔުއެފާ ޕްރޯ ލައިސަންސް އޮންނަ ޑުކަނޯވިޗް މިހާތަނަށް ކޯޗެއްގެ ގޮތުގައި 18 އަހަރު ތަފާތު 5 ގައުމެއްގައި ހޭދަކޮށްފައިވެއެވެ. 

މާޒިޔާއިން ވަނީ ވާދަވެރި މެޗުތަކަކާ ނުލައި އޭއެފްސީ ޗެލެންޖު ކަޕްގައި ވެސް މި އަހަރު ވާދަކޮށްފައެވެ. މާޒިޔާގެ ގްރޫޕްގައި ހިމެނުނީ ކުވެއިތުގެ އަލް އަރަބީ ސްޕޯޓްސް ކްލަބް، ތުރުކުމެނިސްތާންގެ އެފްސީ އަކްރަޑަގް އަދި ކިރްގިސްތާން އެފްސީ އަބްދީޝް އާޓާއެވެ. ނަމަވެސް އެ މުބާރާތުގެ އެއްވެސް މެޗަކުން މާޒިޔާ މޮޅުވެފައެއް ނުވެއެވެ.