އެފްރިކާގެ އެންމެ މޮޅު ކުޅުންތެރިއަކަށް ލުކްމަން ހޮވިއްޖެ

އިޓަލީގެ އެޓަލާންޓާއަށް ކުޅެމުން އަންނަ ނައިޖީރިއާގެ ކުޅުންތެރިޔާ، އަޑެމޮލާ ލުކްމަންއަށް 2024 ވަނަ އަހަރުގެ އެފްރިކާގެ އެންމެ މޮޅު ކުޅުންތެރިޔާގެ މަގާމު ލިބިއްޖެއެވެ. 

ކޮންފެޑެރޭޝަން އޮފް އެފްރިކަން ފުޓްބޯލް އިން ހޮވާ މި އެވޯޑު ލުކްމަންއަށް ލިބުނުއިރު، މި އެވޯޑަށް އޭނާއާ އެންމެ ކައިރިން ވާދަކޮށްފައި ވަނީ އައިވޮރީ ކޯސްޓުގެ ސައިމޮން އަޑިންގްރާ، ގިނީގެ ސެހޫ ގިރާސީ، މޮރޮކޯގެ އަޝްރަފް ހަކީމީގެ އިތުރުން ސައުތު އެފްރިކާގެ ރޮންވެން ވިލިއަމްސްއެވެ. 

މިދިޔަ އަހަރު ވެސް މި މަގާމު ހޯދާފައިވަނީ ނައިޖީރިއާއަށް ނިސްބަތްވާ ކުޅުންތެރިއެކެވެ. 2023 ވަނަ އަހަރުގެ އެފްރިކާގެ އެންމެ މޮޅު ކުޅުންތެރިއަކަށް ހޮވުނީ ވިކްޓަރ އޮސިމޭންއެވެ. 

އެފްރިކާގެ މޮޅު ކުޅުންތެރިން ހޮވަނީ ވޯޓަކުންނެވެ. އެގޮތުން އެފްރިކާގެ ފުޓުބޯޅަ ކޮންފެޑެރޭޝަންގެ މާހިރުން ހިމެނޭ ޓެކްނިކަލް ޓީމަކުންނާއި، އެފްރިކާގެ މީޑިއާތަކާއި ކުޅުންތެރިން އަދި ކޯޗުންނަށް މި އެވޯޑުތަކަށް ވޯޓު ދެވޭނެއެވެ. 

މި އަހަރު މި އެވޯޑު ހާސިލްކުރާނެކަމަށް އެންމެ ގިނަ ބަޔަކު ގަބޫލުކުރީ ވެސް ލުކްމާންއެވެ. ސަބަބަކީ ނިމިދިޔަ ސީޒަނުގައި އޭނާ ތަފާތު މޮޅު ކުޅުމެއް ދައްކާފައިވުމެވެ. 

ނިމުނު ސީޒަނުގައި އެޓަލާންޓާއިން އަލަށް ޔޫރަޕްގެ ތައްޓެއް ހޯދުމުގައި އެނާ ވަނީ މުހިންމު ދައުރެއް އަދާކޮށްފައެވެ. އޭނާ ވަނީ ޔޫރޮޕާ ލީގުގެ ފައިނަލުގައި ބެޔާ ލެވަކޫސަންއާ ދެކޮޅަށް ހެޓްރިކެއް ވެސް ހަދާފައެވެ. މި ހެޓްރިކާއެކު އޭނާއަކީ ޔޫރަޕްގެ ފައިނަލެއްގައި ހެޓްރިކެއް ހެދި ހަ ވަނަ ކުޅުންތެރިޔާއެވެ. އެންމެ ފަހުން ޔޫރަޕްގެ ބޮޑު މުބާރާތެއްގެ ފައިނަލެއްގައި ހެޓްރިކެއް ހަދާފައި ވަނީ 1975 ވަނަ އަހަރެވެ.

މީގެ އިތުރުން، މި އަހަރު އައިވޮރީ ކޯސްޓުގައި ބޭއްވި އެފްރިކަން ކަޕް އޮފް ނޭޝަންސްގެ ޑްރީމް ޓީމުގައި ވެސް އޭނާ ވަނީ ހިމެނިފައެވެ. އެ މުބާރާތުގެ ފައިނަލުން އެ ޓީމު ބަލިވީ، މުބާރާތް ބޭއްވި އައިވޮރީ ކޯސްޓުއާ ބައްދަލުކޮށްގެންނެވެ. 

އިނގިރޭސި ޕްރިމިއަރ ލީގުގެ އެވަޓަން، ފުލަމް އަދި ލެސްޓަރ ސިޓީއަށް ކުޅެފައިވާ ލުކްމާންއަކީ މި އަހަރު ހޮވި ބެލަން ޑިއޯރއަށް ޝޯޓު ލިސްޓުވި ހަމައެކަނި އެފްރިކާގެ ކުޅުންތެރިޔާ ވެސް މެއެވެ. ފުޓުބޯޅައިގެ އެންމެ ޝަރަފުވެރި އެ އެވޯޑުގައި އޭނާއަށް ލިބުނީ 14 ވަނައެވެ.

ކޮންފެޑެރޭޝަން އޮފް އެފްރިކަން ފުޓްބޯލް އެވޯޑްސް 2024 ގައި ހޮވި ބައެއް މަގާމުތައް:

އެންމެ މޮޅު ކުޅުންތެރިޔާ – ފިރިހެން: އަޑެމޮލާ ލުކްމަން (ނައިޖީރިއާ އަދި އެޓަލާންޓާ)

އެންމެ މޮޅު ކުޅުންތެރިޔާ – އަންހެން: ބާރބާ ބަނޑާ (ޒެމްބިއާ އަދި އޯލަންޑޯ ޕްރައިޑް)

ކޯޗް އޮފް ދަ އިޔަރ – ފިރިހެން: އެމާސް ފައެ (އައިވޮރީ ކޯސްޓް)

ކޯޗް އޮފް ދަ އިޔަރ – އަންހެން: ލެމިއާ ބޯމެހްދީ (ޓީޕީ މެޒެމްބެ)

އެންމެ މޮޅު ޓީމް – ފިރިހެން: އަލް އަހްލީ (މިސްރު)

އެންމެ މޮޅު ޒުވާން ކުޅުންތެރިޔާ – ފިރިހެން: ލެމިން ކެމެރާ (ސެނެގާލް އަދި މޮނާކޯ)

އެންމެ މޮޅު ގައުމީ ޓީމު – ފިރިހެން: އައިވޮރީ ކޯސްޓު