ޚަބަރު
ވެމްކޯއިން ރަށްރަށުގެ ގޭބިސީތަކުގެ ކުނި ބިލު ކަރަންޓު ބިލާ އެއްކޮށްލަނީ

ވެމްކޯގެ ކުނި ނަގާ ޓްރަކް ފޮޓޯ: ޕީއެސްއެމް
ވެމްކޯއިން ޚިދުމަތްދެމުންއަންނަ ރަށްރަށުގެ ގޭބިސީތަކުގެ ކުނި ބިލް، އަންނަމަހުން ފެށިގެން ކަރަންޓު ބިލުގައި ހިމަނައިގެން އަގުނެގުމަށް އެކުންފުނިން ނިންމައިފިއެވެ. މިކަން އިޢުލާންކޮށްފައިވަނީ ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވެމްކޯގެ އިސްވެރިންނެވެ.
ވެމްކޯގެ އެސިސްޓެންޓް މެނޭޖަރ، ސޭލްސް އެންޑް ޕްރޮޖެކްޓް މުޙައްމަދު އަކްރަމް ވިދާޅުވިގޮތުގައި ކުނި ބިލު ކަރަންޓު ބިލާ އެއްކޮށްލުމުން ބިލްދައްކާ މީހުންނަށް ފަސޭހަވާނެއެވެ. އަދި މި ބަދަލު ގެނެވޭނީ މީޓަރަށް 34 ޔުނިޓް އެރާ ގޭބިސީތަކަށެވެ.
ވެމްކޯއިން މިހާރު ޚިދުމަތް ދެމުންދަނީ މާލެ ސަރަޙައްދުގެ އިތުރުން ސިޓީތަކާއި ލ. ފޮނަދޫއާއި ކ. މާފުށީގައެވެ. މިހާތަނަށް މި ޚިދުމަތް ދެމުންއައީ އެއްވެސް އަގެއް ނުނަގައެވެ. ނަމަވެސް އަންނަ މަހުން ފެށިގެން އަގު ނަގަން ވަނީ ނިންމާފައެވެ.
ވެމްކޯގެ ޖެނެރަލް މެނޭޖަރ، ސަދަން އޮޕަރޭޝަންސް އަޙްމަދު ޝާފިޢު ވިދާޅުވިގޮތުގައި މި ބަދަލު ގެނައުމަށް ނިންމާފައިވަނީ ކަމާ ބެހޭ ފަރާތްތަކާއެކު މަޝްވަރާ ކުރުމަށްފަހުގައެވެ. އަދި އަންނަމަހުން ފެށިގެން ކޮންމެ ދުވަހަކުވެސް ވެމްކޯގެ ޚިދުމަތް ދޭ ރަށްތަކުގައި އެޚިދުމަތް ދެމުންގެންދާނެކަމަށް އޭނާ ވިދާޅުވިއެވެ.
ވެމްކޯއިން ކުނީގެ ޚިދުމަތްދޭ އަގުތަކަށް ބަލާއިރު ކޮންމެ ގޭބިސީއަކަށް އަގު ކުރަނީ 150 ރުފިޔާއެވެ. އަދި ވިޔަފާރީތަކަށް ނަގަނީ ކޮންމެ ދުވަހަކަށް ލިޓަރަކަށް 20 ލާރިއެވެ. ގޭޓް ފީގެ ގޮތުގައި ޓަނަކަށް 212 ރުފިޔާ ނެގުމަށް ވަނީ ކަނޑައަޅާފައެވެ.