ސާރާ ޝަރީފް މަރާލީ ބައްޕަ އާއި ދޮންމަންމަ، ތަހައްމަލްކުރީ އަނިޔާވެރިކަމުގެ އިންތިހާ

ސާރާ މަރުވީ މިދިޔަ އަހަރުގެ އޮގަސްޓް 8 ވަނަ ދުވަހުއެވެ. އަދި އޭގެ ދެ ދުވަސް ފަހުން "ވޯކިންގ ސަރޭ" ގައި ހުންނަ އޭނާގެ ގޭގައި ހުރި ޑަބަލް ބަންކު އެނދެއްގައި އޮތް ސާރާގެ ފުރާނަނެތް ހަށިގަނޑު ފެނުނެވެ. އޭރު އުރުފާން ޝަރީފް (42) ޕާކިސްތާނުން ފުލުހުންނަށް ގުޅުމަށް ފަހު ސާރާ މަރުވެއްޖެކަން އަންގާ އޭނާ އާއިލާގެ އެހެން މެމްބަރުންނާއެކު ޕާކިސްތާނަށް ވަނީ ފިލާފައެވެ.

ސާރާ މަރާލުމުގައި ބައިވެރިވި އޭނާގެ ބައްޕަ ، ދޮންމަންމަ އަދި ބޮޑުބެ

ސާރާ މަރުވުމުގެ ހަފްތާތަކެއް ކުރިން، އޭނާ ބަނދެފައި ބޭއްވުމާއި، ކްރިކެޓް ބެޓަކުން ސާރާ ގައިގައި ތަޅާފައިވުމާއި، އިސްތިރި ޖެއްސުމާއި، އަދި ދަތް އަޅާފައި ވެއެވެ. މިއީ "އަނިޔާވެރި" ކަމުގެ އިންތިހާ ކަމުގައި ކޯޓުން ވަނީ ފާހަގަ ކޮށްފައެވެ.

އުރުފާން ޝަރީފް ގެ ފޯނު ކޯލުގައި ރޮމުން ބުނެފައިވަނީ "އަހަރެން އަހަރެންގެ ދަރިފުޅު މަރާލައިފިން" އަދި "އަހަރެން އޭނާއަށް އަނިޔާކުރެވުނީ މާގަދައަށް" މިހެންނެވެ. ސަބަބަކީ " އޭނާ ނުކިޔަމަންތެރިވީމަ" ކަމަށް ބުނެފައިވެއެވެ. އަދި އިތުރަށް ބުނެފައިވަނީ "އަހަރެންނަށް ޤާނޫނީ ގޮތުން އަދަބުދީ،  އޭނާ މަރުވެއްޖެ" މިހެންނެވެ.

ސާރާ މަރާލާފައި ބާއްވާފަ އޮތް އެމީހުން ދިރިއުޅުނު ގެ

ފުލުހުންނަށް ފެނުނީ ސާރާގެ ބާލީހުގެ ދަށުގައި އަތުން ލިޔެފައިވާ ތިން ސަފުހާގެ ނޯޓެކެވެ. އޭގައި ޝަރީފް ލިޔެފައިވަނީ "ލަވް ޔޫ ސާރާ" އަދި "އަހަރެން އަހަރެންގެ ދަރިފުޅު މަރާލީ ތަޅައިގެން" މިހެންނެވެ. "އަހަރެން މިފިލަނީ ބިރުގަންނާތީ، އެކަމަކު އަހަރެން ވަޢުދުވަން އަހަރެން އަމިއްލައަށް ފުލުހުންނާ ހަވާލުވާނަން އަދި އަދަބު ބަލައިގަންނާނަން" މިހެންނެވެ. "އަހަރެން މާތްﷲ ގަންދީ ހުވާކުރަން އަހަރެންގެ ނިޔަތަކީ އޭނާ މަރާލުމެއް ނޫން، އެކަމަކު އަހަރެން ކޮންޓްރޯލް ގެއްލުނީ" މިހެންނެވެ.

ޝަރީފް، އޭނާގެ އަނބިމީހާ ބެއިނާޝް ބަތޫލް (30) އަދި އޭނާގެ ބޭބެ، މެކްޑޮނަލްޑްސްގެ މުވައްޒަފު ފައިސަލް މަލިކް (29)، 5 ކުދިންނާއެކު، ހީތްރޯ އެއަރޕޯޓުގައި އުޅެނިކޮށް ސީސީޓީވީން ފެނިފައިވެއެވެ. އެތަނުން އެމީހުން އިސްލާމާބާދަށް ދަތުރުކުރި ފްލައިޓަކަށް އެރީ ސާރާ މަރުވި ދުވަހުގެ ޖެހިގެން އައި ދުވަހުއެވެ.

ފިލައިގެން އުޅުނު ވަގުތު، ސާރާގެ ބައްޕައާއި ދޮންމަންމަ ސްކައި ނިއުސްއަށް ވީޑިއޯ ބަޔާނެއް ދީފައިވެއެވެ. އޭގައި އޭނާގެ ދޮންމަންމަ ސާރާގެ މަރު ސިފަކޮށްފައިވަނީ "ހާދިސާއެއް" ގެ ގޮތުގައެވެ. އަދި ބުނެފައިވަނީ އެމީހުން "ޔޫކޭގެ އޮތޯރިޓީތަކާއެކު އެއްބާރުލުން ދޭން ތައްޔާރަށް ތިބިކަމަށާއި އަދި ކޯޓުގައި އެމީހުންގެ މައްސަލަ ކުރިއަށް ގެންދަން ބޭނުންވާ" ކަމަށެވެ.

ޝަރީފް، ބަތޫލް އަދި މަލިކް ހައްޔަރުކުރެވުނީ ސެޕްޓެމްބަރ 13 ވަނަ ދުވަހު ގެޓްވިކް އެއަރޕޯޓަށް އެނބުރި އައިސްފައިވަނިކޮށެވެ. އަދި އެ އެންމެން ވެސް ސާރާ މެރުމުގެ ދަޢުވާއަށާއި އެހެން ގޮތަކަށް ނަމަ ކުއްޖަކު މަރުވުމަށް މަގުފަހިކުރުމުގެ ދަޢުވާއަށް އިންކާރުކޮށްފައިވެއެވެ.

ސާރާ މަރާލުމަށްފަހު އޭނާގެ އާއިލާ ފިލައިގެން ދިއުމަށް އެއަރޕޯޓުގައި

މިހާރު ޝަރީފް އަދި ބަތޫލްގެ މައްޗަށް ސާރާ މެރުމުގެ ކުށް ވަނީ ސާބިތު ވެފައެވެ. ޙުކުމް އިއްވުމުން ސާރާގެ ދޮންމަންމަ ބަތޫލް ވަނީ ރޯން ފެށިއެވެ. މަލިކް މީހަކު މެރުމުގެ ކުށުން ބަރީއަވެފައިވާއިރު، އޭނާގެ މައްޗަށް ކުއްޖަކު މެރުމަށް މަގުފަހި ކުރުމުގެ ކުށްވަނީ ސާބިތުވެ ހުކުމްކޮށްފައެވެ.

ފަނޑިޔާރު، މިސްޓަރ ޖަސްޓިސް ކަވަނާ  އަދި ޖޫރީ މެމްބަރުން މިމައްސަލަ ސިފަކޮށް ވިދާޅުވީ މި މައްސަލައަކީ "ވަރަށް ބޮޑަށް ސްޓްރެސްފުލް އަދި ޓްރޯމެޓިކް" މައްސަލައެއް ކަމަށެވެ.

ގެވެށި އަނިޔާގެ ތާރީޚް:

މީގެ ކުރިން ޝަރީފް ހައްޔަރުކޮށްފައިވަނީ 2007 އާއި 2010 އާ ދެމެދު ތިން ޕޯލިޝް އަންހެނުން، އޭގެ ތެރޭގައި ސާރާގެ މަންމަ އޯލްގާ ޝަރީފް ހިމެނޭގޮތަށް، ކުރި ތުހުމަތުތަކާ ގުޅިގެންނެވެ. އޭގެ ތެރޭގައި ގެވެށިއަނިޔާ އަދި މަރުގެ އިންޒާރު ދިނުން ހިމެނެއެވެ. ނަމަވެސް އޭނާގެ މައްޗަށް ދަޢުވާއެއް އުފުލިފައެއް ނުވެއެވެ.

ސާރާ އުފަންވީ 2013 ގައެވެ. ނަމަވެސް އޭނާގެ މައިންބަފައިން ވަރިވީ އޭގެ ކުޑަ މުއްދަތެއްގެ ފަހުންނެވެ. އެއީ ދަރިފުޅުގެ ބެލެނިވެރިކަމުގެ މައްސަލައިގައި އެކަކު އަނެކަކަށް އަނިޔާގެ ތުހުމަތުތައް ކުރަމުން ދިޔަ ވަގުތެއްގައެވެ.

2019 ގައި ފެމިލީ ކޯޓުން އެންމެ ފަހުން ބެލެނިވެރިކަން ޙަވާލުކުރީ ޝަރީފްއާއެވެ. އޭރު އޭނާ ސާރާގެ މަންމައާ ވަރިވެ، ބަތޫލްއާ ކައިވެނިކޮށްފައިވެއެވެ.

އެމީހުންގެ ކުޑަ ފްލެޓުގެ ކައިރީ ދިރިއުޅޭ އަވަށްޓެރިން ބުނެފައިވަނީ ވަރަށް ބާރު އަޑުތަކެއް އިވޭ ކަމަށެވެ. އެއީ މީހެއްގައިގަ ތަޅާ އަޑާއި ތަދާއި ވޭނުގެ އަޑުކަމުގައި އަވައްޓެރިން ބުނެއެވެ.

މިދިޔަ އަހަރު، އެމީހުން ހެމަންޑް ރޯޑް، ވޯކިންގ ގައި ހުރި ތިން ކޮޓަރީގެ ގެއަކަށް ބަދަލުވިއެވެ. އެއީ މަލިކް އަދި ޖުމްލަ 6 ކުޑަކުދިންނާއެކުގައެވެ. އާ އަވަށްޓެރިއެއް ކަމަށްވާ ޖުޑިތް ލޮޒެރޯން ބުނެފައިވަނީ އެ އާއިލާއަކީ އާދަޔާ ޚިލާފަށް މަޑުމައިތިރި ބައެއް ކަމަށެވެ.

އޭނާ ސްކައި ނިއުސްއަށް މައުލޫމާތު ދިން ގޮތުގައި އޭނާއަށް ހީވަނީ ސާރާއާމެދު ކަންތައް ކުރަނީ " ޚާދިމެއްގެ ގޮތުގައި" ކަމަށެވެ. އެއީ އޭނާ އަށް ފެނިފައިވަނީ ސާރާ ގޭގެ މަސައްކަތްތައް ކުރާތަން، މިސާލަކަށް ދޮވެފައި ހުންނަ ހެދުން ނެރުމާއި އެހެން ކުދިން ބެލެހެއްޓުން ފަދަ ކަންކަމެވެ.

"އެއީ 10 އަހަރުގެ ކުއްޖަކު ކުރަންވާނެ ކަމެއް ނޫން،" އޭނާ ބުނެފައިވެއެވެ.

"އަހަރެން އެއްވެސް ފަހަރަކު އޭނާ ހިނިތުންވާތަނެއް ނުދެކެން. އަހަރެން އެއްވެސް ފަހަރަކު އޭނާ ދުވެއުޅޭތަނެއް، ކުޅެއުޅޭތަނެއް ، ހިނިއައިސްގެން އުޅޭތަނެއް ނުވަތަ ގޯތިތެރޭގައި އެހެން ކުދިންނާއެކު އެއްވެސް ކަމެއް ކުރާތަނެއް ނުދެކެން."

ދަޢުވާކުރާ ފަރާތުން ބުނެފައިވަނީ ސާރާ ބުރުގާ އަޅަން ފެށީ އޭނާގެ އަނިޔާތައް ފޮރުވުމަށް ކަމަށެވެ. އަދި ކޯޓުގައި އަޑުއިއްވި ގޮތުގައި 2023 ގެ އޭޕްރީލް މަހު ސާރާ ސްކޫލުން ވަކިކުރީ ޓީޗަރުންނަށް ސާރާގެ މޫނުގައި ތަޅައިގެން އަނިޔާ ލިބިފައިވާ ޒަހަމްތައް ފާހަގަވެ، ސޯޝަލް ސަރވިސަސްއަށް ރިޕޯޓް ކުރުމުންނެވެ. ނަމަވެސް އެ މައްސަލަ ވަނީ  6 ދުވަހުގެ ތެރޭގައި ތާކުންތާކު ނުޖެހި ނިންމާލާފައެވެ.

ސްކޫލް އެންމެންގެ ހިތްއަތުލާފައިވާ ޚާއްސަ ކުއްޖެއް

ސާރާ އާއި އެކު ސްކޫލުގައި ކިޔަވާ ރައްޓެއްސެއް ބުނެފައިވަނީ އޭނާ ސާރާގެ ގެއަށް ކުޅެން ދިޔައިރު ކޮޓަރިތަކުގެ ދޮރުގައި ތަޅުލާފައި ހުރި ތަން ފެނުނު ކަމަށެވެ.

"ސާރާއަކީ ވަރަށް އުފާވެރި އަދި މީހުންނާއިގުޅޭ ކުއްޖެއް. އަދި އޭނާ އަބަދުވެސް އަހަރެންކައިރީ ބުނަމުން ދިޔައީ، އޭނާ ބޮޑުވެއްޖެއްޔާ، ލޮސް އެންޖެލެސްއަށް ދާން ބޭނުންވާ ކަމަށާއި މޮޑެލްއަކަށް ވާން ބޭނުންވާ ކަމަށް،" އޭނާ ސްކައި ނިއުސްއަށް ކިޔައިދިނެވެ.

ސާރާ ބުރުގާ އަޅުވާފައި ހުރީ އަނިޔާތައް ފޮރުވަން

އޭނާ ބުނެފައިވަނީ ސާރާ ސްކޫލަށް އައިއިރު މޫނުގައި ހުރި އަނިޔާތަކާއި ބެހޭގޮތުން ސުވާލުކުރުމުން، ބުނެފައިވަނީ ބައިސްކަލުން ވެއްޓިގެން ކަމަށެވެ. އަދި އިތުރަށް ބުނެފައިވަނީ، "އޭނާގެ ފައިގައި ނުވަތަ އަތުގައިވެސް އަނިޔާތައް ހުރެދާނެކަމަށް. އެކަމަކު އަހަރެންނަކަށް އެއަނިޔާ ތަކެއް ނުފެނޭ. އެއީ އޭނާ ލާފައި ހުންނަނީ އަތްދިގު ޓީޝާޓު އަދި ސްކާޓުގެ ދަށުން ލެގިންގްސް ލައިގެން ހުންނާތީ."

ސާރާގެ ހެޑްޓީޗަރ ޖެކީ ޗެމްބަރސް ބުނެފައިވަނީ އޭނާއަކީ "ވަރަށް އޯގާތެރި، ވަރަށް ހިލްމު ހުރި ކުޑަ އަންހެން ކުއްޖެއް" ކަމަށެވެ. އަދި އޭނާގެ އެންމެ ޙާއްސައީ އެރީތި ހިނިތުންވުން ކަމުގައެވެ. ޓީޗަރ ބުނެފައިވަނީ ސާރާ ގާރާ ގާތު ގިނަފަހަރަށް ވާހަކަދައްކަނީ އެކްސް ފެކްޓަރ ކާމިޔާބުކުރުމުގެ ހުވަފެނުގެ ވާހަކަ ކަމަށެވެ. އަދި މިހާރު ސްކޫލުން ވަނީ އޭނާގެ ހަނދާނުގައި ކިޔަވައިދިނުމުގެ އެވޯޑެއް ތަޢާރަފުކޮށްފައެވެ.

"އަހަރެން ހިތުން މިކަމެއް ނުފިލާނެ ، އަހަރެން މިހާ ބޮޑަށް ހިތާމަކުރަން ޖެހުން އެހެން ކަމެއް ނެތް. އަދި އަހަރެން މިހެން މިބުނަނީ ހުރިހާ މުވައްޒަފުންނާއި މުޖުތަމަޢުގެ ފަރާތުންވެސް. އަހަރެން ހިތް އަދިވެސް މިކަން ޤަބޫލެއް ނުކުރޭ"

70 އަށްވުރެ ގިނަ އަނިޔާ

ސާރާއަށް 70 އަށްވުރެ ގިނަ އަނިޔާ ލިބިފައިވާކަން ފާހަގަކުރެވުނެވެ. އޭގެ ތެރޭގައި ދަތް އެޅުމުން ލިބިފައިހުރި އަނިޔާ ، 25 ތަނެއްގެ ކަށިގަނޑު ބިންދައިގެން ދިއުން، އަދި ސިކުނޑިއަށް  ލޭއެޅުން ހިމެނެއެވެ. އަދި އޭނާ މަރުވި ސަބަބު ކަމަށް ބުނެފައިވަނީ "ގިނަ އަނިޔާތަކާއި އިހުމާލުގެ ސަބަބުން " ކަމަށެވެ.

ދަޢުވާކުރާ ފަރާތުން ބުނެފައިވަނީ ގޭގައި ތިބި ހުރިހާ މީހުންނަކީ ސާރާގެ މަރުގައި ޒިންމާ އުފުލަންޖެހޭ ފަރާތްތަކެއް ކަމަށެވެ. އެއީ އެކަކު ނުވަތަ ދެމީހަކަށް މި އަނިޔާވެރި ކެމްޕޭން ކުރިއަށް ނުގެންދެވޭނެތީ އަދި އެހެން މީހުންގެ އެހީތެރިކަމާއި ބައިވެރިވުން ނެތި މިކަން ނުކުރެވޭނެތީއެވެ. އަދި އެއްވެސް މީހަކު ސާރާއަށް އެހީތެރިވުމަށް އެއްވެސް ކަމެއް ނުކުރާތީއެވެ.

ޝަރީފް ފުރަތަމަ ބުނެފައިވަނީ ހުރިހާ އަނިޔާއެއް ހިނގީ އޭނާ މަސައްކަތުގައި އުޅެނިކޮށް ކަމަށެވެ. އަދި ސާރާ ގެ މަންމަ ، އޭނާގެ ކުރީގެ އަނބިމީހާއަކީ "ނުބައި އަދި ސައިކޯ" މީހެއް ކަމުގައި ބުނެ އޭނާގެ ބޮލުގައި އެޅުވިއެވެ.

ނަމަވެސް އޭނާގެ ބެރިސްޓަރ ކެރޮލައިން ކާބެރީ ކޭސީ ހުށަހެޅި ގޮތުގައި އޭނާއަކީ "އޯގާތެރި" އަދި "އޮނަރ ބޭސްޑް އެބިއުސް" ގެ ޝިކާރައަކަށްވެފައިވާ މީހެކެވެ. މިއާއެކު ޝަރީފް ހެކިބަސް ދެމުން ހައިރާންކުރުވަނިވި އިޢުތިރާފެއްވިއެވެ. އޭނާ އިޢުތިރާފުވީ އޭނާގެ ދަރިފުޅު މަރާލީ ކްރިކެޓް ބެޓަކުން ތަޅައިގެން ކަމަށެވެ. އެއީ އޭނާ ޕެކިންގ ޓޭޕުން ބަނދެފައި އޮތް ބެޓެކެވެ. އަދި އަތުން ކަރުގައި ހިފައި، މޯބައިލް ފޯނަކުން ބޮލުގައި ޖަހައި، އަދި އޭނާ މަރުވަމުންދަނިކޮށް ދަގަނޑު ހޮޅިއަކުން ޖަހާފައިވާ ކަމަށް ބުނެފައިވެއެވެ.

"އަހަރެންނަށް ފުރިހަމަ ޒިންމާ ނެގިދާނެ. އަހަރެން ކުރި ކޮންމެ ކަމެއް އަހަރެން ޤަބޫލުކުރަން،" އޭނާ ބުނެފައިވެއެވެ. އަދި މީހަކު މެރުމުގެ ދަޢުވާ އަލުން އޭނާގެ މައްޗަށް އުފުލުމަށް އެދުނެވެ.

ނަމަވެސް ހުސްވަގުތުކޮޅަކަށްފަހު، ޝަރީފް ބުނެފައިވަނީ އޭނާ މި ދަޢުވާއަށް ކުށްވެރިނުވާ ކަމަށެވެ. އޭނާ ބުނެފައިވަނީ "އަހަރެން އޭނާއަށް ގެއްލުމެއް ދޭކަށް ބޭނުމެއް ނުވޭ" މިހެންނެވެ.

އޭނާ އިންކާރުކޮށްފައިވަނީ ދަތް އެޅުމާއި ސާރާ ފިއްސާލުމަށް ދިން އަނިޔާތަކަށެވެ. އަދި ބަތޫލް އާއި މަލިކް ދެމީހުންވެސް ހެކިބަސް ދޭން ނިންމާފައިނުވާ ކަމަށެވެ.

ސަރޭ ޕޮލިސް އިން ބުނެފައިވަނީ އިންކުއެސްޓެއް އަދި ސޭފްގާޑިންގ ރިވިއުއެއް ހަދާނެ ކަމަށެވެ. އެއީ ސާރާއަށް ފުލުހުން، ސޯޝަލް ސަރވިސަސް، ކޯޓުތައް ނުވަތަ ތަޢުލީމީ ނިޒާމުން އިހުމާލުވެފައިވޭތޯ ބެލުމަށެވެ.

އޯލްޑް ބެއިލީ  ޙުކުމް އިއްވުމަށްފަހު ވާހަކަދައްކަމުން، ޑިޓެކްޓިވް ޗީފް އިންސްޕެކްޓަރ ކްރެއިގް އެމަރސަން ބުނެފައިވަނީ މި މައްސަލައިން ދުނިޔޭގެ އެކި ކަންކޮޅުތަކުގައި ތިބި މީހުން "ޝޮކްވެ އަދި ހައިރާންވެފައިވާ" ކަމަށެވެ.

އޭނާ ބުނެފައިވަނީ ސާރާގެ މައުސޫމު ދިރިއުޅުން ނިމުމަކަށް ގެނެސްފައިވަނީ ބަޔާންނުކުރެވޭފަދަ އަނިޔާވެރިކަމެވެ.އަދި އެއީ ޝަރީފް އާއި ބަތޫލް ކުރި ކަމެއް ކަމަށާއި، މަލިކް މިކަން ހުއްޓުވުމަށް އެއްވެސް ކަމެއް ނުކުރާ ކަން ފާހަގަކުރިއެވެ.

"ކުޑަކުއްޖަކު މެރުމަކީ ވަރަށް ޝޮކިންގ ކަމެއް. އެކަމަކު ސާރާގެ ކުރު ދިރިއުޅުމުގައި އޭނާ ތަޙައްމަލުކުރަންޖެހުނު އަނިޔާގެ މައްސަލަ ވަކިން ޚާއްޞަ ގޮތަކަށް ކަންބޮޑުވާންޖެހޭ މައްސަލައަކަށް ހަދާފައިވާކަމަށް ވަނީ ބުނެފައެވެ.

ކްރައުން ޕްރޮސިކިއުޝަން ސަރވިސް (ސީޕީއެސް) ގެ ސްޕެޝަލިސްޓް ޕްރޮސިކިއުޓަރ ލިބީ ކްލާކް ބުނެފައިވަނީ "ސާރާއަކީ އުފާވެރި، އައުޓްގޯއިންގ އަދި ދިރުންހުރި ކުއްޖެއް. އަބަދުވެސް ހިނިއައިސްގެން އުޅޭ ކުއްޖެއްގެ ގޮތުގައި ސިފަކުރެވުނު ކުއްޖެއް. އެކަމަކު އޭނާގެ އެންމެ ގާތް މީހުން އޭނާއަށް އަނިޔާކޮށް މަރާލާފައިވަނީ ވަރަށް އަނިޔާވެރި ގޮތަކަށް."

"އަހަރެމެންގެ ތެރެއިން އެއްވެސް މީހަކަށް ސާރާގެ ކުރު ދިރިއުޅުމުގެ ފަހު ހަފްތާތަކުގައި އޭނާއަށް ކުރިމަތިވި އަނިޔާވެރި އަދި ރަހުމުކުޑަ އަނިޔާތަކުގެ މިންވަރު ޚިޔާލަކަށްވެސް ނުގެނެވޭނެ. އޭނާއަށް ދީފައިވާ އަނިޔާތަކަކީ ވަރަށް ބިރުވެރި އަނިޔާތަކެއް."