ޤަތަރުގެ ޤައުމީ ދުވަހާ ގުޅިގެން ރައީސް މުޢިއްޒު ތަހުނިޔާ ފޮނުއްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޤަތަރުގެ ޤައުމީ ދުވަހުގެ މުނާސަބަތުގައި އެޤައުމުގެ ޢަމީރު ޝެއިޚް ތަމީމް ބިން ޙަމަދު އަލް-ޘާނީއަށާއި ޤަތަރުގެ ބޮޑުވަޒީރު ޝެއިޙް މުހައްމަދު ބިން އަބްދުއްރަހްމާން ބިން ޖާސިމް އަލް-ޘާނީއަށް ތަހުނިޔާ ފޮނުއްވައިފިއެވެ.

ކޮންމެ އަހަރެއްގެވެސް ޑިސެމްބަރު 18 ވަނަ ދުވަހު ފާހަގަކުރާ ޤަތަރުގެ ޤައުމީ ދުވަހާ ގުޅިގެން ރައީސުލްޖުމްހޫރިއްޔާ ވަކިވަކިން ފޮނުއްވި ސިޓީފުޅުގައި، ދިވެހި ސަރުކާރާއި ދިވެހި ރައްޔިތުންގެ ފަރާތުން ޤަތަރުގެ ރަސްގެފާނަށާއި ބޮޑުވަޒީރާއި އެޤައުމުގެ ރައްޔިތުންނަށް ދުވަހުގެ ތަހުނިޔާ އަރިސްކުރެއްވިއެވެ.

ރައީސް މުޢިއްޒުގެ ސިޓީފުޅުގައި، ޤަތަރާއި ރާއްޖެއާއި ދެމެދުގައި އޮތް ވަރުގަދަ ގުޅުން އިތުރަށް ދަމަހައްޓާ އާލާ ކުރެވޭނެ ކަމަށް ޔަޤީންކުރައްވާ ކަމަށް ވިދާޅުވިއެވެ. އަދި ޤަތަރަކީ ރާއްޖޭގެ ތަރައްޤީގެ ބައިވެރިއެއްކަން ފާހަގަކުރައްވާ، އެކުވެރިކަމުގެ ގުޅުން އިތުރަށް ބަދަހިވެ މީހުންގެ މެދުގައި އޮތް ގުޅުން ހަރުދަނާ ކުރެވޭނެ ކަމަށްވެސް ވިދާޅުވިއެވެ.

މީގެއިތުރުން، ރައީސްގެ ސިޓީފުޅުގައި ޤަތަރުގެ ޢަމީރު އަދި ބޮޑުވަޒީރަށް ފުރިހަމަ ޞިއްޙަތަކަށް އެދިވަޑައިގެން، ޤައުމުގެ އަމާންކަމާއި ފާގަތިކަން ދެމެހެއްޓުމަށް އެދިވަޑައިގެންފައިވެއެވެ.