ވަނައަޓޫއަށް އައި ބިންހެލުމާއި ގުޅިގެން މަރުވި މީހުންގެ ޢަދަދު 14 އަށް އަރައިފި

ވަނައަޓޫއަށް އައި ބިންހެލުމާއި ގުޅިގެން މަރުވި މީހުންގެ ޢަދަދު 14 އަށް އަރައިފިއެވެ.

ޕެސިފިކް އައިލެންޑުގެ ޤައުމެއް ކަމަށްވާ ވަނައަޓޫއަށް އައި މި ބިންހެލުން އައިސްފައިވަނީ ވެނައަޓޫގެ ވެރިރަށާއި 37 ކިލޯމީޓަރު ދުރުގައި 10 ކިލޯމީޓަރު (6.2 މޭލު) ފުންމިނުގައި އޮންނަ ތަނަކަށެވެ.

މިބިންހެލުމާއި ބެހޭ ފަހުގެ މަޢުލޫމާތުތައް ބުނާ ގޮތުން ބިންހެލުމުގެ ބާރު 43 ކިލޯމީޓަރު (26.7 މޭލު) އަޑިއަށް އަރާފައިވާއިރު، އޭގެ ފަހުން ހަމަ އެތަނާ ކައިރިއަށް 5.5 މެގްނިޓިއުޑްގެ އަފްޓާޝޮކެއް އައިސްފައިވެ އެވެ. 

މި ހާދިސާއާއި ގުޅިގެން ލިބިފައިވާ އެންމެ ފަހުގެ އަދާހަމަތަކުން އެނގޭ ގޮތުގައި މި ބިންހެލުމުގައި މިހާތަނަށް 14 މީހުން މަރުވެފައިވެއެވެ. ވަނައަޓޫ އަށް އައި މި ބާރުގަދަ ބިންހެލުމެއްގައި ސަލާމަތްވި މީހުން ހޯދުމަށް ރެސްކިޔު ވޯކަރުން ދަނީ މަސައްކަތް ކުރަމުންނެވެ. 

އިންޓަނޭޝަނަލް ފެޑެރޭޝަން އޮފް ރެޑް ކްރޮސް އެންޑް ރެޑް ކްރެސެންޓް ސޮސައިޓީސްގެ އޭޝިއާ ޕެސިފިކްގެ ވެރިޔާ ކޭޓީ ގްރީންވުޑް ބުދަ ދުވަހު ވިދާޅުވީ ވަނައަޓޫގެ ޕޯޓް ވިލާގެ މައި ހޮސްޕިޓަލުގައި 200 މީހަކަށް އަނިޔާވެގެން ފަރުވާ ދެމުންދާކަމަށެވެ.  

ނޫސްވެރިޔާ ޑޭން މެކްގަރީ ބުނެފައިވަނީ މަރުވި މީހުންގެ ޢަދަދު 14 އަށް ވުރެ އިތުރަށް އިތުރުވުމަކީ އެކަށީގެންވާކަމެއް ކަމަށެވެ. 

މެކްގަރީ ވިދާޅުވީ ބިންހެލުން އައި ސަރަހައްދުން ވެއްޓުނު ޢިމާރާތްތަކުގެ ދަށުގައި ތާށިވެފައި ތިބި ކަމަށް ލަފާކުރާ މީހުން ސަލާމަތްކުރުމަށް މީހުން ސަލާމަތް ކުރާ ފަރާތްތަކުން މަސައްކަތްކުރަމުންދާކަމަށެވެެ. 

އޮސްޓްރޭލިޔާ އާއި ނިއުޒިލެންޑުން ވަނީ ވަނައަޓޫ އިން އެހީތެރިކަމަށް ބޭނުންވާނަމަ އެހީތެރިކަން ފޯރުކޮށްދިނުމަށް ތައްޔާރަށް އޮތްކަން އިޢުލާނުކޮށްފައެވެ. އެގޮތުން މެޑިކަލް ޓީމް ތަކާއި ރެސްކިޔު ޓީމްތައް ފޮނުވައިދޭނެ ކަން އެދެޤައުމުން ވަނީ އިޢުލާނުކޮށްފައެވެ. 

އދ.އިން ބުނެފައިވަނީ ވަނައަޓޫގެ މުވާސަލާތީ ގުޅުންތަކަަށް އަދިވެސް ބުރޫއަރާފައިވާ ކަަމަށާއި، ބިންހެލުން އެރި ސަރަޙައްދުތަކުން ސީދާ ޚަބަރުތައް ހޯދުމަށް އަދިވެސް ދަތިވެފައިވާ ކަަމަށެވެ. އދ.އިން ލަފާކޮށްފައިވަނީ އެސަރަހައްދުގެ އާބާދީގެ ތިންބައިކުޅަ އެއްބަޔަށް އެހާދިސާގެ އަސަރުކޮށްފައިވާކަމަށެވެ. 

އެއާޕޯޓާއި ވޯޓާ ޕޯޓަށް ވަދެވޭނެ މަގުތައް ބަންދުވެފައިވާތީ އެސަރަހައްދަށް ވަނުމަށް ދަތިވެފައިވާ ކަމަށް އދ.އިން ވަނީ ބުނެފައެެވެ. މިވަގުތަށް ބޭނުންވާ މުހިންމު އެހީގެ ގޮތުގައި އދ.އިން ފާހަގަ ކޮށްފައިވާ ކަންތައްތަކުގެ ތެރޭގައި ޞިއްޙި ފަރުވާއާއި ވަގުތީ ބޯހިޔާވަހިކަމާއި، ސާފު ފެނާއި ވީ އެންމެ އަވަހަކަށް މުވާސަލާތީ ވަސީލަތްތަކުގެ ގުޅުން ގާއިމް ކުރުމެވެ.

ވަނުއަޓޫގައި ޒިޕް ލައިން އެޑްވެންޗާ ވިޔަފާރިއެއް ހިންގާ އޮސްޓްރޭލިއާގެ ރައްޔިތެއް ކަމަށްވާ މައިކަލް ތޮމްޕްސަން ފޭސްބުކްގައި ކުރި ޕޯސްޓެއްގައި ބުނީ އޭނާ މީހުން ސަލާމަތް ކުރުމުގެ މަސައްކަތުގައި އެހީތެރިވަމުން އަންނަ ކަމަށެވެ. ރޭގެ ވަގުތެއްގައި ވެއްޓިފައިވާ އިމާރާތެއްގެ ގައުކުނޑިތަކުގެ ތެރެއިން ތިން މީހަކު ދިރިތިއްބާ ފެނިފައިވާ ކަމަށެވެ. 

 އިނގިރޭސިވިލާތާއި ފްރާންސް، ނިއުޒީލެންޑް އަދި އެމެރިކާގެ ޑިޕްލޮމެޓިކް މިޝަންތައް ހިމެނޭ ކޮމްޕްލެކްސްއަކަށް ބޮޑެތި ގެއްލުންތަކެއް މި ބިންހެލުމުގައި ވަނީ ލިބިފައެވެ. އޭގެ ތެރެއިން ބައެއް ޢިމާރާތްތައް ވެއްޓިފައިވާކަމަށްވެސް އަލްޖަޒީރާގައި ވަނީ ރިޕޯޓުކޮށްފައެވެ. 

ނޫސްވެރިޔާ މެކްގަރީ ވިދާޅުވީ މި ކާރިސާގެ ގެއްލުން ޖަޒީރާ ޤައުމެއްކަމުގައިވާ ވަނައަޓޫ އަށް އައި މިބިންހެލުމުގެ އަސަރު އެޤައުމުގެ އެންމެންނަށް އިހުސާސް ކުރެވޭނެ ކަމަށެވެ. ް މެކްގަރީ ވިދާޅުވީ ވަނުއަޓޫގެ މީހުންނަށް ތޫފާން ފަދަ ގުދުރަތީ ކާރިސާތަކުގެ ގިނަ ތަޖުރިބާތަކެެއް ލިބިފައިވީ ނަމަވެސް މިހާތަނަށް އިންސާނީ ގެއްލުން ލިބުނު ހާދިސާތައް ވަރަށް މަދު ކަމަށެވެ.