ދުންފަތް ކޮންޓްރޯލް ކުރުމުގެ ޤާނޫނާ ޚިލާފުވި 4 ފަރާތެއް ޖޫރިމަނާކޮށްފި

ދުންފަތް ކޮންޓްރޯލް ކުރުމުގެ ޤާނޫނާ ޚިލާފުވި 4 ފަރާތެއް ޖޫރިމަނާ ކޮށްފިއެވެ. މިއީ  2024 ވަނަ އަހަރުގެ ޑިސެމްބަރ މަހުގެ 17 ވަނަ ދުވަހުގެ ނިޔަލަށް ޖޫރިމަނާ ކުރެވުނު އަދަދެވެ.

ޖޫރިމަނާ ކުރެވުނު 4 ފަރާތުގެ ޖޫރިމަނާ ފައިސާގެ ގޮތުގައި ނަގާފައިވަނީ ޖުމްލަ 20،000 ހާސް ރުފިޔާއެވެ. އެއީ ޤާނޫނާއި ޚިލާފުވި ކޮންމެ ފަރާތެއްގެ އަތުން 5000 ރުފިޔާއެވެ.

ރާއްޖޭގައި އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ބޭނުންކުރުމާއި ހިލޭބެހުމާއި ވިއްކުން މިމަހުގެ 15 ވަނަ ދުވަހުން ފެށިގެން ވަނީ މަނާވެފައެވެ. އަދި މި ގެއްލުންހުރި ޢަމަލުކުރާ މީހުންނާމެދު ޤާނޫނުގައި ބަޔާންކޮށްފައިވާ ފިޔަވަޅުތައް ތަންފީޒްކުރަން ވަނީ ފަށާފައެވެ. މިއީ މިޤާނޫނުގެ ދަށުން ޖޫރިމަނާ ކުރެވުނު ފުރަތަމަ ފަރާތްތަކެވެ.

ދުންފަތް ކޮންޓްރޯލްކުރުމާބެހޭ ޤާނޫނުގެ ދަށުން ރާއްޖެއަށް ވޭޕްގެ ބާވަތްތަކާއި އެއާއެކު ބޭނުންކުރުމަށް ތައްޔާރުކޮށްފައި ހުންނަ ބާވަތްތައް އެތެރެކޮށްފިނަމަ 50،000 ރުފިޔާއިން ޖޫރިމަނާ ކުރާނެއެވެ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕަކަށް 10،000 ރުފިޔާގެ މަގުން ޖޫރިމަނާކުރާނެއެވެ.

އަދި ވޭޕްކުރަން ބޭނުންކުރާ އެއްވެސް ބާވަތެއްގެ އާލާތެއް ރާއްޖޭގައި ވިއްކައިފިނަމަ، 20،000 ރުފިޔާއިން ޖޫރިމަނާކުރުމާއެކު ވިއްކި ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރާނެއެވެ. އަދި އެފަދަ އެއްޗެއް ހިލޭ ބަހައިފިނަމަ އެކަން ކުރި މީހަކު 10،000 ރުފިޔާއިން ޖޫރިމަނާކުރާނެއެވެ.

މީގެ އިތުރުން ވޭޕް ކުރުމަށް ބޭނުންކުރާ އެއްވެސް އާލާތެއް ކުޑަކުއްޖަކަށް ވިއްކައިފިނަމަ ނުވަތަ ހިލޭ ދީފިނަމަ އެފަދަ އާލާތްތައް ވިއްކުމުންނާއި ހިލޭ ބެހުމުންކުރާ ޖޫރިމަނާގެ އިތުރަށް 50،000 ރުފިޔާގެ ޖޫރިމަނާއެއް ކުރާނެކަމަށްވެސް މިހާރު އަމަލުކުރަން ފަށާފައިވާ އިސްލާހުގައި ވަނީ ބަޔާންކޮށްފައެވެ.