ޕީޕީއެމް އުވާލުމުގެ މަސައްކަތް އީސީއިން ފަށައިފި

ޕްރޮގްރެސިވް ޕާޓީ އޮފް މޯލްޑިވްސް (ޕީޕިއެމް) އުވާލުމުގެ މަސައްކަތް ރާއްޖޭގެ ސިޔާސީ ޕާޓީތަކުގެ ބެލެނިވެރި ފަރާތްކަމުގައިވާ އިލެކްޝަންސް ކޮމިޝަނުން ފަށައިފިއެވެ.

އެކޮމިޝަނުން ވަނީ މިކަމާ ގުޅޭ ގޮތުން އިޢުލާނެއް ނެރެފައެވެ. އެއިޢުލާނުގައި ބުނެފައިވަނީ ޕީ.ޕީ.އެމް ގެ އަސާސީ ޤަވާއިދުގެ 61 ވަނަ މާއްދާގެ (ނ) ގައިވާ ގޮތުގެމަތިން ޕާޓީ އުވާލުމަށް އެ ޕާޓީގެ ސެނެޓުން ނިންމާފައިވާތީ، ޤާނޫނު ނަންބަރު 2013/4 ގެ 30 ވަނަ މާއްދާގެ (ހ) ގެ 2 ވަނަ ނަންބަރުގައިވާ ގޮތުގެމަތީން ޕީ.ޕީ.އެމް އުވާލުމުގެ މަސައްކަތް އެ ކޮމިޝަނުން ކުރަމުންދާ ކަމަށެވެ. 

އެހެންކަމުން، ޕާޓީގެ ނަމުގައި އެއްވެސް ސިޔާސީ ޙަރަކާތެއް ހިންގުމާއި، ޕާޓީ އުވާލުމަށްޓަކައި ފުރިހަމަ ކުރަންޖެހޭ އިޖުރާއަތުތައް ފުރިހަމަކުރުމަށް ކުރެވޭ މުޢާމަލާތްތައް ފިޔަވައި އިތުރު އެއްވެސް މުޢާމަލާތެއް ކުރުމުގެ އިޚްތިޔާރު އެ ޕާޓީއަށް ލިބިގެން ނުވާކަމުގައި އީސީގެ އިޢުލާނުގައި ބުނެފައިވެއެވެ.

އަދި ޕާޓީއާ ގުޅިގެން ނިންމަންޖެހޭ އެއްވެސް ކަމެއްވާނަމަ، އުވާލުމުގެ މަރުޙަލާ ނިމުމުގެ ކުރިން އެ ޕާޓީއާ ގުޅިގެން ކުރިއަށް ގެންދިޔުން އެދޭކަމަށްވެސް އީސީ އިން ވަނީ ބުނެފައެވެ. 

ޕީޕީއެމް އުވާލުމަށް ނިންމީ އެޕާޓީ އިން ބޭއްވި ސެނެޓު ބައްދަލުވުމެއްގައެވެ. 

މިކަމަށް ބޭއްވި ސެނެޓު ބައްދަލުވުމުގައި 42 ބޭފުޅަކު ބައިވެރިވި އިރު ޕާޓީ އުވާލަން ފާސްކޮށްފައިވަނީ ބައްދަލުވުމުގައި ބައިވެރިވި މެމްބަރުންގެ އިއްތިފާޤުންނެވެ. ޕާޓީގެ ނިންމުން ނިންމަން ބޭނުންވަނީ 38 ބޭފުޅެއްގެ ވޯޓެވެ. 

ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަކީ ކުރީގެ ރައީސް އަލްއުސްތާޛު މައުމޫން އަބްދުލްޤައްޔޫމް އިސްވެ ހުންނަވާ 2011 ވަނަ އަހަރު އުފެއްދެވި ސިޔާސީ ޕާޓީއެކެވެ. އެޕާޓީ އުފެދިގެން ދިޔުމަށް ފަހު އެޕާޓީގެ ރިޔާސީ ޓިކެޓް ކާމިޔާބު ކުރައްވައި އެޕާޓީގެ ރިޔާސީ ކެނޑިޑޭޓެއްގެ ގޮތުގައި ހުންނަވާ ރާއްޖޭގެ ރައީސުލްޖުމްހޫރިއްޔާ ކަމަށް އިންތިޚާބު ވެފައިވަނީ ކުރީގެ ރައީސް އަދި ރައީސް މައުމޫނުގެ ކޮއްކޯފުޅު ޢަބްދުﷲ ޔާމީން ޢަބްދުލްޤައްޔޫމެވެ.