ޚަބަރު
ޗައިނާއަށް ކުރެއްވެވި ދަތުރުފުޅު ނިންމާލައްވައި ނައިބުރައީސް ރާއްޖެ ވަޑައިގެންފި

ނައިބު ރައީސް ހުސެއިން ޗައިނާ އަށް ފުރާ ވަޑައިގަތުމުގެ ކުރިން. ފޮޓޯ: ރައީސް އޮފީސް
ޗައިނާއަށް ކުރެއްވެވި ރަސްމީ ދަތުރުފުޅު ނިންމާލައްވައި ނައިބުރައީސް ޙުސެއިން މުޙައްމަދު ލަޠީފް އެނބުރި ރާއްޖެ ވަޑައިގެންފިއެވެ.
ނައިބު ރައީސް ޙުސެއިން ޗަައިނާ އަށް މިކުރެއްވެވި ދަތުރުފުޅަކީ "”ޗައިނާ-އިންޑިއަން އޯޝަން ރީޖަން ފޯރަމް އޮން ބްލޫ އިކޮނޮމީ ޑިވެލޮޕްމަންޓް ކޯޕަރޭޝަން"ގެ 3 ވަނަ ބައްދަލުވުމުގައި ބައިވެރިވެވަޑައިގަތުމަށް ކުރެއްވެވި ދަތުރުފުޅެކެވެ.
ޗައިނާގެ ޔުނާން ޕްރޮވިންސްގެ ކުންމިންގގައި މި ޑިސެމްބަރު މަހުގެ 15 އިން 17 އަށް ކުރިއަށްދިޔަ މި ފޯރަމަކީ ރާއްޖެއިން ކޯ-ހޯސްޓްކުރި ފޯރަމެކެވެ.
ނައިބުރައީސް ހުސެއިންގެ މި ދަތުރުފުޅުގައި އެމަނިކުފާނު ވަނީ "ޗައިނާ-އިންޑިއަން އޯޝަން ރީޖަން ފޯރަމް އޮން ބްލޫ އިކޮނޮމީ ޑިވެލޮޕްމަންޓް ކޯޕަރޭޝަން"ގެ ތިންވަނަ ބައްދަލުވުން އިފްތިތާޙުކުރެއްވުމުގެ ރަސްމިއްޔާތުގައި ވާހަކަފުޅުދައްކަވާފައެވެ.
އެގޮތުން ދުނިޔެ ހޫނުވާ މިންވަރު ކުޑަކޮށް، ކަނޑުގެ ދިރުންތައް ހިމާޔަތްކުރުމަށްޓަކައި ހުރިހާ ޤައުމުތަކުގެ ވެއްޓަށް ފެތޭ، ބަދަލުވެވޭނެ އިންސާފުވެރި މޫސުމީ ސިޔާސަތެއް، މުހިންމުކަމަށް އެމަނިކުފާނު ވިދާޅުވިއެވެ.
މި ދަތުރުފުޅުގައި ނައިބުރައީސް ޙުސެއިން ވަނީ ޗައިނާ ސަރުކާރުގެ އިސް ބޭފުޅުންނާވެސް ބައްދަލުކޮށްލައްވާފައެވެ.ނައިބރައީސްގެ މި ދަތުރުފުޅަކީ ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ (ސީ.އައި.ޑީ.ސީ.އޭ) ގެ ދައުވަތަކަށް ކުރެއްވި ދަތުރުފުޅެކެވެ.