ގޯލްޑް ކަޕް: ބޮޑު ތަފާތަކުން ނައިފަރު ބަލިކޮށް އޭދަފުށި ސެމީއަށް

ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލުގެ ފުރަތަމަ މެޗުގައި މިއަދު ހަވީރު ބޮޑު ތަފާތަކުން ނައިފަރު ބަލިކޮށް، މުބާރާތުގެ ސެމީ ފައިނަލް ޔަގީންކުރި ފުރަތަމަ ޓީމަކަށް އޭދަފުށި ވެއްޖެއެވެ.

މުބާރާތުގެ ދެވަނަ ބުރުގެ ގްރޫޕް-އެފްގެ އެއްވަނަ ޓީމުގެ ގޮތުގައި ކުއާޓާ ފައިނަލުން ޖާގަ ހޯދި އޭދަފުށިން، ގްރޫޕް-ޖީގެ ދެވަނަ ޓީމުގެ ގޮތުގައި ކުއާޓާ ފައިނަލަށް ދަތުރުކުރި ނައިފަރުގެ މައްޗަށް ކުރި ހޯދީ 5-0 އިންނެވެ. 

ދެވަނަ ބުރުގައި ނައިފަރުން ކުޅުނު ފަހު މެޗުގައި އައްޑޫ ސިޓީއާއި ބައްދަލުކުރިއިރު، އެ މެޗުން ވެސް ނައިފަރު ބަލިވެފައިވަނީ ފަސް ގޯލުގެ ތަފާތުންނެވެ. އެ މެޗުގައި އައްޑޫ ސިޓީއިން ވަނީ ނައިފަރު ކޮޅަށް 7 ގޯލު ޖަހާފައެވެ. އެ މެޗު ނިމުނީ 7-2 އިން އައްޑޫ ސިޓީ މޮޅު ވެގެންނެވެ.

ކުއާޓާ ފައިނަލު މެޗަށް އޭދަފުށިން ނިކުތީ ވަރަށް ވަރުގަދަކޮށެވެ. ރާއްޖޭގެ އެންމެ މަތީ ފަންތީގައި އެ ރަށުގެ ގިނަ ކުޅުންތެރިންތަކެއް ކުޅެމުން ދިއުން ވެގެން ދިޔައީ، ތަޖުރިބާގެ ގޮތުން އެ ޓީމަށް ލިބިފައި އޮތް ބޮޑު ފައިދާއަކަށެވެ. މި މެޗަށް އެ ޓީމުން ނިކުތީ، ގައުމީ ޓީމުގައި ހިމެނޭ ތިން ކުޅުންތެރިން ކަމަށްވާ ހައިޝަމް ހަސަން (ބިޑި)، އަލީ ފާސިރު (ސެންޓޭ) އަދި ހަމްޒާ މުހައްމަދު (ހަމްޕު) އަށް މާޒިޔާ ސްޕޯޓްސް އެންޑް ރެކްރިއޭޝަންއިން ރިލީޒް ދިނުމުން، އެ ކުޅުންތެރިންނާ އެކުއެވެ. އަދި އެ ޓީމުގެ ފުރަތަމަ އެގާރައިގައި ހައިޝަމް އާއި ސެންޓޭ ކުޅުނު އިރު، ހަމްޕު ކުޅެން އެރީ ފަހު 25 ވަރަކަށް މިނިޓަށެވެ.

އެގޮތުން އޭދަފުށިން ވަނީ މެޗުގެ ވަރަށް ކުރީކޮޅު، އެ ޓީމުގެ ކޮޅަށް މެޗުގެ އޮއިވަރު އެއްކޮށް ބަދަލުކޮށްފައެވެ. އަދި މެޗުގެ ފުރަތަމަ 30 މިނެޓު ވެސް ހަމަނުވަނީސް ތިން ގޯލުގެ ލީޑެއް އެ ޓީމުން ނެގިއެވެ. 

އޭދަފުއްޓަށް ލީޑު ލިބުނީ ނައިފަރު ކުޅުންތެރިއެއްގެ އަތުން ބައިކޮޅަށް ވަތް ގޯލަކުންނެވެ. އެއީ އޭދަފުށްޓަށް ލިބުނު ހިލޭ ޖެހުމެއް، ނައިފަރުގެ ޕެނަލްޓީ އޭރިއާ ތެރެއަށް އައިހަމް ފޮނުވާލިއިރު، އެ ބޯޅަ ސާފުކޮށްލަން މަސައްކަތް ކުރި އިބްރާހިމް ވިޝާމްގެ ބޮލުގައި ޖެހުނު ބޯޅަ ގޮސް ވަނީ އަމިއްލަ ޓީމުގެ ދާގަނޑަށެވެ. 

އޭދަފުއްޓަށް ލީޑު ލިބުނު ފަހުން، އެ ލީޑު ފުޅާ ކުރުމަށް ޕެނަލްޓީއެއް ލިބުނެވެ. ނަމަވެސް އޭދަފުށީގެ ހައިޝަމް ފޮނުވާލި ބޯޅަ، ނައިފަރުގެ ގޯލްކީޕަރު އަބްދުﷲ މުހައްމަދު ވަނީ ދިފާއުކޮށްފައެވެ. ނަމަވެސް އޭގެ ފަހުން މާގިނަ އިރުތަކެއް ނުވެ، މުހައްމަދު ފާސިރު ދިން ބޯޅައަކުން، އޭދަފުށީގެ އަލީ ފާސިރު (ސެންޓޭ) ވަނީ އޭ ޓީމަށް ލީޑު ފުޅާކޮށްދީފައެވެ. އަދި އެ ޓީމުގެ ތިން ވަނަ ގޯލު ކާމިޔާބުކުރީ އައިހަމްއެވެ. 

އޭދަފުށީގެ ހަތަރު ވަނަ ގޯލާއި ފަސްވަނަ ގޯލު ކާމިޔާބުކުރީ ދެވަނަ ހާފުގައެވެ. އެގޮތުން ހަތަރު ވަނަ ގޯލު މުހައްމަދު ފާސިރު ކާމިޔާބުކުރިއިރު، ފަހު ގޯލު ކާމިޔާބުކޮށްފައިވަނީ އިޝާން އިބްރާހިމްއެވެ. 

މި މުބާރާތުގެ ދެވަނަ ކުއާޓާ ފައިނަލް މެޗު ކުޅޭނީ މިރެއެވެ. އެ މެޗުގައި ބައްދަލުކުރާނީ ގުރައިދޫ އާއި މާލެ ސިޓީއެވެ.