ޕެނަލްޓީއިން ގުރައިދޫ ބަލިކޮށް، މާލޭ ސިޓީއިން އުނދަގޫ ސެމީއަކަށް ތައްޔާރުވާން ޖެހިއްޖެ

ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލުގެ ދެވަނަ މެޗުގައި ގުރައިދޫ އާއި މާލޭ ސިޓީ ބައްދަލުކުރި މެޗުން މާލޭ ސިޓީ މޮޅުވެއްޖެއެވެ. މާލޭ ސިޓީއިން މި މެޗު ކާމިޔާބުކުރީ، މެޗުގެ ފުރިހަމަ ވަގުތު ހަމަވިއިރު 1-1 އިން އެއްވަރުވެފައި އޮތުމުން ޕެނަލްޓީ ޖަހައިގެން 5-3 އިންނެވެ.

ދެވަނަ ބުރުގައި ގްރޫޕް-އެޗްގެ ދެވަނަ ޓީމެއްގެ ގޮތުގައި ކުއާޓާ ފައިނަލަށް މާލޭ ސިޓީއިން ދަތުރުކުރިއިރު، ގުރައިދޫ ކުއާޓާ ފައިނަލުން ޖާގަ ހޯދީ، ގްރޫޕް-އީ ގައި ހިމެނުނު ފުވައްމުލަކު ސިޓީ އާއި ތިމަރަފުށި ބަލިކުރުމަށްފަހުއެވެ. 

ގަލޮޅު ދަނޑުގައި ބުދަ ދުވަހުގެރޭ ކުޅުނު މެޗުގައި ފުރަތަމަ ލިޑު ނެގީ ގުރައިދޫއިންނެވެ. މާލޭ ސިޓީގެ ފަހަތުން ހެދި ގޯހެއްގެ ބޭނުން ހިފައި، ގުރައިދޫއަށް މި ގޯލު ކާމިޔާބުކޮށްދިނީ އެ ޓީމުގެ ބިދޭސީ ފޯވާޑް، އަހުމަދު އިބްރާހިމް އައްބާސް އެލްހަޝާޝްއެވެ. މި ފުރުސަތު ތަނަވަސްކުރީ މާލެ ސިޓީ ޓީމުގެ ޑިފެންޑަރު، ހަސަން ޝިފާއު ފަހަތަށް ކުޅެލި ބޯޅައެއް ހޯދައިގެންނެވެ.

މި ގޯލަށްފަހު ވެސް، ފުރަތަމަ ހާފުގައި ގުރައިދޫއިން ވަނީ އެ ޓީމުގެ ލީޑު ފުޅާ ކުރުމަށް ގިނަ މަސައްކަތްތަކެއް ކޮށްފައެވެ. ނަމަވެސް މާލޭ ސިޓީގެ ގޯލްކީޕަރު ތޮލާލް ހަސަން ވަނީ ހުޝިޔާރު ކަމާއެކު ގުރައިދޫގެ ހަމަލާތައް ދިފާއުކޮށްފައެވެ. 

މާލޭ ސިޓީއިން މެޗުގެ ނަތީޖާ ހަމަހަމަކުރީ ދެވަނަ ހާފުގެ ކުރީކޮޅެވެ. އެއީ މާލެ ސިޓީއަށް ލިބުނު ހިލޭ ޖެހުމެއްގައި އެ ޓީމުގެ މިސްރު މިޑްފީލްޑަރު، ހަލީލް ޖަމާލް ގޯލު ކުރިމައްޗަށް ހުރަސްކޮށްލުމުން، އެ ބޯޅަ ސާފު ކޮށްލުމަށް އުޅުމުގެ ތެރޭގައި ގުރައިދޫގެ ޑިފެންޑަރު، އަހުމަދު ނޫމާން (ހެލްމެޓް) އަތުން ބައިކޮޅަށް ވަދެފައިވާ ގޯލެކެވެ.

ޕެނަލްޓީ ޝޫޓްއައުޓްގައި މާލޭ ސިޓީގެ ކީޕަރުވަނީ ގުރައިދޫގެ ފުރަތަމަ ޕެނަލްޓީ އާއި ފަހު ޕެނަލްޓީ ދިފާއުކޮށްފައެވެ. އެއީ ގުރައިދޫގެ މުހައްމަދު ނާއިމް އާއި އެ ޓީމުގެ ބިދޭސީ ކުޅުންތެރިޔާ، މޮއާޒް ގަބޭރް ޖެހި ޕެނަލްޓީއެވެ. އެ ޓީމަށް ޕެނަލްޓީތައް ކާމިޔާބު ކޮށްދިނީ ކެޕްޓަން އަބްދުﷲ ޝަޔަމް އަދި އަހުމަދު ޝޫންއެވެ.

ގުރައިދޫގެ ކީޕަރު ވެސް ޕެނަލްޓީއެއް މަތަކޮށްފައިވެއެވެ. އެއީ މާލޭ ސިޓީގެ ހުސެއިން ޝުއައިބް ފޮނުވާލި އެ ޓީމުގެ ދެވަނަ ޕެނަލްޓީއެވެ. އެ ޓީމަށް ޕެނަލްޓީތައް ކާމިޔާބު ކޮށްދިނީ ހަލީލް ޖަމާލް އާއި އަހުނަފް މުހައްމަދު ތަސްނީމް އާއި އިސްމާއިލް ވަޖީހު އަދި ރިލްވާން ވަހީދެވެ. 

މާލޭ ސިޓީއިން ސެމީ ފައިނަލުގައި ނިކުންނަން ޖެހޭނީ އޭދަފުއްޓާއި ދެކޮޅަށެވެ. މި ދެ ޓީމު ގްރޫޕް ސްޓޭޖުގައި ބައްދަލުކޮށްފައިވާއިރު، އެ މެޗު 2-0 އިން ކާމިޔާބުކުރީ އޭދަފުއްޓެވެ. 

މި މުބާރާތުގައި ކުއާޓާ ފައިނަލުގެ ފަހު ދެމެޗު މިއަދު އޮންނާނެއެވެ. ފުރަތަމަ މެޗުގައި ބައްދަލު ކުރާނީ އަލިފުއްޓާއި ފުވައްމުލަކު ސިޓީއެވެ. އަދި ދެވަނަ މެޗުގައި މިރޭ ބައްދަލު ކުރާނީ އައްޑޫ ސިޓީ އާއި މާފުށްޓެވެ.