ކުޅިވަރު
މެކްސިކޯގެ ޕަޗުއާ ބަލިކުރުމަށްފަހު ފީފާގެ އައު މުބާރާތް ރެއާލް މެޑްރިޑުން ކާމިޔާބުކޮށްފި

ި ފީފާ އިންޓަކޮންޓިނެންޓަލް ކަޕްގެ ތަށި ރެއާލް މެޑްރިޑުން އުފުލާލަނީ--- ފޮޓޯ: ރޮއިޓާސް
ހުލާސާ
ބުދަ ދުވަހުގެރޭ ގަތަރުގެ ލުސެއިލް ސްޓޭޑިއަމްގައި ކުޅުނު މި މެޗު ފަސޭހަކަމާއެކު ރެއާލް އިން ކާމިޔާބު ކުރިއިރު، ކޮންކަކަފް ޗެމްޕިއަނުންގެ ގޮތުގައި މުބާރާތަށް ކޮލިފައިވި މެކްސިކޯގެ ޕަޗުއާއަށް ކައުންޓަރ އެޓޭކެއްގައި ނޫނީ ހަމަލާއެއް އުފެއްދިފައެވެ ނުވޭ.
ދުނިޔޭގެ ފުޓުބޯޅަ ފެޑެރޭޝަން، ފީފާއިން މި އަހަރު އަލަށް ފެށި ފީފާ އިންޓަކޮންޓިނެންޓަލް ކަޕްގެ ފުރަތަމަ ތަށި ފަސޭހަ ކަމާއެކު، ޔޫރަޕްގެ އެންމެ ކާމިޔާބު ކްލަބު ކަމުގައިވާ ރެއާލް މެޑްރިޑުން ކާމިޔާބުކޮށްފިއެވެ. އެއްކޮޅަކަށް ބުރަވެފައި އޮތް މި މެޗު ރެއާލް އިން ކާމިޔާބުކުރީ 3-0 އިންނެވެ.
މި މެޗުގައި ރެއާލްގެ ގޯލުތައް ކާމިޔާބު ކޮށްދިނީ ކީލިއަން އެމްބައްޕޭ، ރޮޑްރީގޯ އަދި ވިނީސިއަސް ޖޫނިއަރއެވެ.
ބުދަ ދުވަހުގެރޭ ގަތަރުގެ ލުސެއިލް ސްޓޭޑިއަމްގައި ކުޅުނު މި މެޗު ފަސޭހަކަމާއެކު ރެއާލް އިން ކާމިޔާބު ކުރިއިރު، ކޮންކަކަފް ޗެމްޕިއަނުންގެ ގޮތުގައި މުބާރާތަށް ކޮލިފައިވި މެކްސިކޯގެ ޕަޗުއާއަށް ކައުންޓަރ އެޓޭކެއްގައި ނޫނީ ހަމަލާއެއް އުފެއްދިފައެވެ ނުވެއެވެ.
ޔޫއެފާ ޗެމްޕިއަންސް ލީގު ކާމިޔާބު ކުރުމަށްފަހު މުބާރާތަށް ކޮލިފައިވި ރެއާލް އިން މެޗުގައި ލީޑު ނެގީ ފުރަތަމަ ހާފުގެ 37 ވަނަ މިނެޓުގައެވެ. ރީތި ޓީމު ގޯލެއްގެ ގޮތުގައި ފެނުނު މި ގޯލަކީ ބެލިންގްހަމް ވިނީސިއަސްއަށް ކުޅެލި ބޯޅައެއް، އޭނާ ގޯލްކިޕަރުގެ ކައިރިން ނައްޓާލުމަށްފަހު ހުސް ގޯލަށް ފޮނުވާލުމަށް އެމްބައްޕޭއަށް ފޮނުވާލި ބޯޅައަކުން ކަމިޔާބުކުރި ގޯލެކެވެ.
ރެއާލްއިން އެ ޓީމުގެ ލީޑު ފުޅާ ކުރީ، ދެ ޑިފެންޑަރުން ކައިރިން ނައްޓާލުމަށްފަހު މެޗުގެ 52 ވަނަ މިނެޓުގައި ރޮޑްރީ ކާމިޔާބުކުރި ގޯލުންނެވެ.
އެ ޓީމުގެ ފަހު ގޯލު، މެޗުގެ 83 ވަނަ މިނެޓުގައި ކާމިޔާބުކުރީ ޕެނަލްޓީއަކުން، އަންގާރަ ދުވަހު ފީފާ ބެސްޓު މެންސް އެވޯޑު ހާސިލްކުރި ވިނީސިއަސްއެވެ. މިއީ ރެއާލްގެ ކެޕްޓަން، ލޫކަސް ވަޒްކޭޒްއަށް ޕަޗުއާގެ އުސާމަ އިދުރީސީ ކުރި ފައުލަކަށް ލިބުނު ޕެނަލްޓީއެކެވެ.
ފީފާގެ އިންޓަކޮންޓިނެންޓަލް ކަޕަކީ ހަ ކޮންފެޑެރޭޝަންގެ ޗެމްޕިއަނުންގެ މެދުގައި ކުޅޭ މުބާރާތެކެވެ. ކޮންމެ ކޮންފެޑެރޭޝަނަކީ ވަކިވަކި ބައްރުތަކެވެ. އެގޮތުން މި މުބާރާތުގައި ވާދަކުރާނީ އެފްރިކާއަށް ނިސްބަތްވާ ގައުމުތައް ހިމެނޭ ކޮންފެޑެރޭޝަން އޮފް އެފްރިކަން ފުޓްބޯލް (ސީއޭއެފް) އާއި އޭޝިއާގެ ގައުމުތައް ނިސްބަތްވާ އޭޝިއަން ފުޓްބޯލް ފެޑެރޭޝަން (އޭއެފްސީ) އާއި ޔޫރަޕްގެ ގައުމުތައް ނިސްބަތްވާ ޔޫނިއަން އޮފް ޔޫރަޕިއަން ފުޓުބޯލް އެސޯސިއޭޝަން (ޔޫއެފާ) އާއި އުތުރު އެމެރިކާ، ސެންޓްރަލް އެމެރިކާ އަދި ކެރީބިއަނަށް ނިސްބަތްވާ ގައުމުތައް ހިމެނޭ ކޮންފެޑެރޭޝަން އޮފް ނޯތު، ސެންޓްރަލް އެމެރިކަން އެންޑް ކެރީބިއަން އެސޯސިއޭޝަން ފުޓްބޯލް (ކޮންކަކަފް) އާއި އޯޝޭނިއާއަށް ނިސްބަތްވާ ގައުމުތައް ހިމެނޭ އޯޝޭސިއާ ފުޓްބޯލް ކޮންފެޑެރޭޝަން އަދި ދެކުނު އެމެރިކާގެ ގައުމުތައް ނިސްބަތްވާ ސައުތު އެމެރިކަން ފުޓުބޯލް ކޮންފެޑެރޭޝަން (ކޮންމެބޯލް)ގެ ޗެމްޕިއަން ޓީމު ތަކެވެ.
މި މުބާރާތް ކުރިޔަށް ގެންދިއުމަށް ފީފާގެ ކައުންސިލުން ނިންމާފައިވަނީ 14 މާޗު 2024 ގައެވެ. އެގޮތުން މި މުބާރާތް ފުރަތަމަ ފަހަރަށް ބާއްވާފައި މިވަނީ މި އަހަރުގެ ސެޕްޓެމްބަރު މަހުން ޑިސެމްބަރު މަހާ ދޭތެރެއެވެ.