ކުޅިވަރު
މޮނާކޯ މެޗުގައި އިޓާލީގެ ގައުމީ ޓީމުގެ ކީޕަރު ޑޮނަރުއްމާއަށް ބޮޑު އަނިޔާއެއް ވެއްޖެ

ބޯޅަ ދޮފާއު ކުރަން އުޅުމުގެ ތެރޭގައި ޑޮނަރުއްމާއަށް ވަނީ ވަރަށް ބޮޑަށް އަނިޔާވެފައި--- ފޮޓޯ: ގެޓީ އިމޭޖަސް
ހުލާސާ
މި އަނިޔާ ލިބުނުއިރު ޑޮނަރުއްމާ މަސައްކަތް ކުރަމުން ދިޔައީ މޮނާކޯގެ ހަމަލާއެއް ދިފާއު ކުރުމަށް.
މި އަނިޔާގައި އޭނާ ހޭދަވާނީ ކިހާ ދުވަހެއްކަމެއް އަދި ޓީމުން ހާމަކޮށްފައެއް ނުވޭ.
ފްރާންސް ލީގުގައި ޕެރިސް-ސެއިންޓް ޖާމެއިން (ޕީއެސްޖީ) އާއި މޮނާކޯ ބައްދަލުކުރި މެޗުގައި މޮނާކޯގެ ފޯވާޑް، ވިލްފްރައިޑް ސިންގޯގެ ފައިން ޖެހި، ޕީއެސްޖީ އަދި އިޓަލީގެ ގައުމީ ޓީމުގެ ގޯލްކީޕަރު، ޖިއާންލޫޖީ ޑޮނަރުއްމާއަށް ބޮޑު އަނިއްޔާއެއް ވެއްޖެއެވެ.
މި ހާދިސާ ހިނގާފައިވަނީ ބުދަ ދުވަހުގެރޭ މޮނާކޯގެ ދަނޑުގައި ކުޅުނު މެޗުގެ 13 މިނެޓު ކުޅެވުނު ފަހުންނެވެ. މި އަނިޔާ ލިބުނުއިރު ޑޮނަރުއްމާ މަސައްކަތް ކުރަމުން ދިޔައީ މޮނާކޯގެ ހަމަލާއެއް ދިފާއު ކުރުމަށެވެ. މޮނާކޯގެ ކަނާތް ފަރާތުން ބޯޅަ ހިފައިގެން ދެވެފައި ދިޔަ ސިންގޯގެ ހަމަލާ ދިފާއު ކުރުމަށް ޑޮނަރުއްމާ ނިކުތީ ގޯލު އޭރިއާގެ ވާތް ފަރާތުގެ ކަނާ ދިމާލަށެވެ. އަދި ބޯޅަ ފޮނުވާލުމަށްފަހު ސިންގޯ މަސައްކަތްކުރީ ކީޕަރުގެ ގައިމަތިން ފުއްމާލުމަށެވެ. އެވަގުތު އައިވޮރީ ކޯސްޓުގެ ގައުމީ ޓީމަށް ކުޅެމުން އަންނަ ސިންގޯގެ ބޫޓުގެ އުންތައް ޑޮނަރުއްމާގެ މޫނު މައްޗަށް އަރައި، އޭނާގެ ކޯމަތިން ފުންކޮށް ވަނީ ހަލާކުވެފައެވެ.
މި އަނިޔާއަށްފަހު ޑޮނަރުއްމާ ވަނީ ބަދަލުކޮށްފައެވެ. އޭނާގެ ބަދަލުގައި ކުޅެން ނިކުތީ އެ ޓީމުގެ ދެވަނަ ކީޕަރު މެޓްވޭ ސޮފަނޯވްއެވެ.
ޑޮނަރުއްމާ ބަދަލުކުރުމަށްފަހު ކުޅުންފެށިތާ މާ ގިނައިރުތަކެއް ނުވެ ޕީއެސްޖީއިން މެޗުގައި ލީޑު ނެގިއެވެ. އެއީ އަޝްރަފް ހަކީމީގެ އެސިސްޓަކުން ޑިޒަޔަރ ޑޫ ކާމިޔާބުކުރި ގޯލެކެވެ.
ނަމަވެސް މޮނާކޯއިން ވަނީ ދެވަނަ ހާފުގެ 15 މިނެޓުގެ ތެރޭގައި އެ ޓީމުގެ ކޮޅަށް ލީޑު އަނބުރާލާފައެވެ. އެ ޓީމުގެ ފުރަތަމަ ގޯލު މެޗުގެ 53 ވަނަ މިނެޓުގައި ޕެނަލްޓީއަކުން ބެން ސެގިރު ކާމިޔާބު ކުރިއިރު، ދެވަނަ ގޯލު ޖެހީ މެޗުގެ 60 ވަނަ މިނެޓުގެ ތެރޭގައި އެމްބޯލޯއެވެ.
މޮނާކޯއިން ލީޑު ނެގިތާ ހަތަރު މިނެޓު ފަހުން އުސްމާން ޑެމްބެލޭގެ ގޯލަކުން ޕީއެސްޖީއިން މެޗުގެ ނަތީޖާ ހަމަހަމަކުރިއެވެ. އަދި މެޗު ނިމެން ހަތް މިނެޓަށް ވެފައި ވަނިކޮށް ގޮންޗާލޯ ރާމޯސްގެ ގޯލަކުން ޕީއެސްޖީއިން ލީޑު ނެގިއިރު، މެޗުގެ އިތުރު ވަގުތުގައި ޕީއެސްޖީގެ ހަތަރު ވަނަ ގޯލު ކާމިޔާބުކުރީ ޑެމްބެލޭއެވެ.
ފަރުވާ ދިނުމަށްފަހު ޑޮނަރުއްމާގެ ފޮޓޯތައް ސޯޝަލް މީޑިއާގައި އާންމުވިއިރު، އޭނާގެ މޫނު މަތިން ތިން ތަނެއް ފަހާފައި ހުއްޓެވެ. އޭގެ ތެރެއިން އެންމެ ބޮޑުކޮށް އިން ތަނުގައި ގާތްގަނޑަކަށް ދެ އިންޗި ހުއްޓެވެ. މި އަނިޔާއާ ގުޅިގެން ޑޮނަރުއްމާ ކުޅުމާ ދުރުގައި ހޭދަވާނީ ކިހާދުވަހެއް ކަމެއް އަދި ކްލަބުން ހާމަކޮށްފައެއް ނުވެއެވެ.
ލީގުގައި 40 ޕޮއިންޓާއެކު ޕީއެސްޖީ އެއްވަނައިގައި އޮތް އިރު، މޮނާކޯ އޮތީ 30 ޕޮއިންޓާއެކު ލީގު ޓޭބަލްގެ ތިން ވަނައިގައެވެ.