އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރ ފަޒީލް ރަޝީދު ސަސްޕެންޑްކޮށްފި

މާލެ ވޯޓަރ އެންޑް ސުވަރެޖް ކޮމްޕެނީ (އެމްޑަބްލިއުއެސްސީ)ގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު މިއަދު ވަނީ މަޤާމުން ސަސްޕެންޑްކޮށްފައެވެ. މި ފިޔަވަޅު އަޅާފައިވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ގުޅޭގޮތުން ދިވެހި ފުލުހުންގެ ޚިދުމަތުން ކުރިއަށްގެންދާ ތަޙުޤީޤަކާ ގުޅިގެންނެވެ.

އެމްޑަބްލިއުއެސްސީން މައުލޫމާތު ދެއްވިގޮތުގައި، ފަޒީލް ސަސްޕެންޑް ކޮށްފައިވަނީ ތަޙުޤީޤަށް ފުރިހަމަ އެއްބާރުލުން ދިނުމަށް މަގުފަހިކުރުމުގެ ގޮތުންނެވެ. މިއަދުން ފެށިގެން އޭނާގެ ހުރިހާ މަސްއޫލިއްޔަތުތަކުން ވަކިކޮށްފައިވާކަމަށްވެސް ކުންފުނިން ހާމަކުރެއްވިއެވެ. މި ނިންމުން ނިންމާފައިވަނީ ކުންފުނީގެ ބޯޑުންނެވެ.

މި މައްސަލައަކީ ގޯތި ލިބިފައިނުވާ ފަރާތްތަކަކަށް ގޯތި ދީފައިވާކަމަށް ތުހުމަތުކުރެވޭ މައްސަލައެކެވެ. މިކަމާ ގުޅިގެން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ވަނީ އެޗްޑީސީގެ ބޯޑު މެންބަރުންގެ ތެރެއިން ޗެއަރމަން ފިޔަވައި އެހެން ހުރިހާ މެންބަރުން ސަސްޕެންޑްކޮށްފައެވެ.

ފާހަގަކޮށްލެވޭ ކަމަކީ، މުޙައްމަދު ފަޒީލް ރަޝީދަކީ އެޗްޑީސީގެ މެނޭޖިން ޑިރެކްޓަރު އިބްރާހިމް ފަޟުލް ރަޝީދުގެ އަޚެއް ކަމެވެ. މި މައްސަލައާ ގުޅިގެން ސޯޝަލް މީޑިއާގައި ފަޒީލްގެ ނަމުގައިވާ ލިޔުމެއް ދައުރުވަމުންދާކަން ފާހަގަކުރެވެއެވެ.

ފުލުހުންގެ ފަރާތުން މަޢުލޫމާތު ދެއްވާފައިވާ ގޮތުގައި، މި ތަޙުޤީޤަކީ ޑޮކިއުމަންޓްތަކެއް ފޯޖުކޮށްފައިވާކަމަށް ތުހުމަތުކުރެވޭ މައްސަލައެކެވެ. އަދި މިއީ ފުލުހުންނަށް ލިބުނު މަޢުލޫމާތަކާ ގުޅިގެން އަމިއްލައަށް އިސްނަގައިގެން ފެށި ތަޙުޤީޤެއްކަމަށްވެސް ފުލުހުން ވިދާޅުވެފައިވެއެވެ.