ބިންވެރިޔާ އަދި ގެދޮރުވެރިޔާ ސްކީމުގައި ހިނގާފައިވާ އޮޅުވާލުންތައް ބެލުމަށް ޕީ.ޖީ އަމުރުކުރައްވައިފި

ސަރުކާރުން އިޢުލާނުކޮށްފައިވާ "ބިންވެރިޔާ" އަދި "ގެދޮރުވެރިޔާ" ސްކީމުގައި ހިނގާފައިވާ ކަމަށް ތުހުމަތުކުރެވޭ އޮޅުވާލުންތަކާ ގުޅޭގޮތުން ފުރިހަމަ ޖިނާއީ ތަޙުޤީޤެއް ހިންގުމަށް ޕްރޮސިކިއުޓަރ ޖެނެރަލް އަލްއުސްތާޛު ޢައްބާސް ޝަރީފު އަމުރުކުރައްވައިފިއެވެ.

މި ސްކީމުގެ ދަށުން ފޯމު ބަލައިގަތުމުގައާއި، ގޯއްޗާއި ފްލެޓް ލިބޭ ފަރާތްތައް ކަނޑައެޅުމުގައި، އަދި ގޯއްޗާއި ފްލެޓް ދޫކުރުމުގައި ކަނޑައެޅިފައިވާ އުޞޫލުތަކާއި ގަވާއިދުތަކާ ޚިލާފަށް ޢަމަލުކޮށްފައިވާކަމުގެ ކަންބޮޑުވުން ޕްރޮސިކިއުޓަރ ޖެނެރަލްގެ ސަމާލުކަމަށް އައިސްފައިވާކަމަށް ޕްރޮސިކިއުޓަރ ޖެނެރަލްގެ އޮފީހުން މިއަދު ނެރުނު ނޫސްބަޔާނެއްގައި ބުނެފައިވެއެވެ.

މި މައްސަލައަކީ ޢާންމު މަސްލަޙަތު މަތީ މިންވަރަކަށް އެކުލެވޭ ކަމަކަށްވާތީ، ޤާނޫނުއަސާސީގެ 223 ވަނަ މާއްދާގެ (ޅ) ގެ ދަށުން ޕްރޮސިކިއުޓަރ ޖެނެރަލްއަށް ލިބިދޭ ބާރުގެ ދަށުން، މި މައްސަލަ ތަޙުޤީޤުކުރުމަށް ދިވެހި ފުލުހުންގެ ޚިދުމަތަށާއި އެންޓި ކޮރަޕްޝަން ކޮމިޝަނަށް އަމުރުކުރައްވާފައިވެއެވެ.

އަދި މި މައްސަލައިގެ ތަޙުޤީޤު ހިނގަމުންދާޤު ހިނގަމުންދާ ގޮތް ކޮންމެ ހަފްތާއަކު އެއްފަހަރު ޕްރޮސިކިއުޓަރ ޖެނެރަލްއާ ޙިއްޞާކުރުމަށާއި، މައްސަލައިގެ އަވަސް ތަޙުޤީޤެއް ހިންގުމަށްވެސް ޕްރޮސިކިއުޓަރ ޖެނެރަލް ވަނީ އަމުރުކުރައްވާފައެވެ.

މި ތަޙުޤީޤުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނަމަ، އެކަން ތަޙުޤީޤުކުރުމަށްފަހު ދަޢުވާކުރުމަށްޓަކައި ޕްރޮސިކިއުޓަރ ޖެނެރަލްގެ އޮފީހަށް ހުށަހެޅުމަށްވެސް ވަނީ އަންގަވާފައެވެ.