އަޅުގަނޑުމެން ހަނގުރާމައިން ވަނީ ވަރުބަލިވެފައި: އަހުމަދު އަލް-ޝަރާ

ސީރިއާ ވަނީ ހަނގުރާމައިން ވަރުބަލިވެފައި ކަމަށާއި، އަދި އަވައްޓެރި ޤައުމުތަކަށް ނުވަތަ ހުޅަނގުގެ ޤައުމުތަކަށް ނުރައްކަލެއް ނޫން ކަމަށް އެޤައުމުގެ ޑީ ފެކްޓޯ ވެރިޔާ އަހުމަދު އަލް-ޝަރާ ވިދާޅުވެއްޖެއެވެ. ދިމިޝްޤުގައި ބީބީސީއަށް ދެއްވި އިންޓަވިއުއެއްގައި އޭނާ ގޮވާލެއްވީ ސީރިއާގެ މައްޗަށް އަޅާފައިވާ ދަތިތައް ނައްތާލުމަށެވެ.

"މިހާރު، މިހުރިހާ ކަމެއް ހިނގައިދިޔުމަށްފަހު، ދަތިތައް ނައްތާލަންޖެހޭ. އެއީ އެ ދަތިތައް އަމާޒުކުރެވިފައިވަނީ ކުރީގެ ވެރިކަމަށް ވާތީ. އަނިޔާ ލިބުނު މީހާއާއި އަނިޔާވެރިޔާއާ ދޭތެރޭ އެއްގޮތަކަށް ކަންތައް ކުރުމަކީ ރަނގަޅު ގޮތެއް ނޫން،" އޭނާ ވިދާޅުވިއެވެ.

ޝަރާއަކީ ދެ ހަފްތާއަށްވުރެ ކުރު މުއްދަތެއްގެ ތެރޭގައި ބަޝާރު އަލް-އަސަދުގެ ވެރިކަން ވައްޓާލި އަވަސް ހަމަލާގެ އިސް ވެރިޔާއެވެ. އޭނާއަކީ ބަޣާވާތްތެރިންގެ އިއްތިހާދުގެ އެންމެ ނުފޫޒު ގަދަ ޖަމާޢަތް ކަމުގައިވާ ހަޔާތު ތަހްރީރު އަލް-ޝާމް (އެޗްޓީއެސް) ގެ ލީޑަރެވެ. ކުރިން އޭނާ މަޝްހޫރުވެފައިވަނީ އަބޫ މުހައްމަދު އަލް-ޖޯލާނީގެ ނަމުންނެވެ.

އެޗްޓީއެސްއަކީ ޓެރަރިސްޓު ޖަމާޢަތެއް ނޫން ކަމަށް އޭނާ ވިދާޅުވިއެވެ. އަދި އެ ޖަމާޢަތް ޓެރަރިސްޓު ލިސްޓުން އުނިކުރަންޖެހޭ ކަމަށް ވެސް ވިދާޅުވިއެވެ. އެޗްޓީއެސްއަކީ އދ، އެމެރިކާ، ޔޫރަޕިއަން ޔޫނިއަން އަދި އިނގިރޭސިވިލާތް ފަދަ ގިނަ ފަރާތްތަކުން ޓެރަރިސްޓު ޖަމާޢަތެއްގެ ގޮތުގައި ކަނޑައަޅާފައިވާ ޖަމާޢަތެކެވެ. އެއީ އަލް-ޤާއިދާގެ ބައެއްގެ ގޮތުގައި އުފެދި، 2016 ގައި އެ ޖަމާޢަތުން ވަކިވެފައިވާ ޖަމާޢަތެކެވެ.

އިތުރަށް ޝަރާ ވިދާޅުވީ އަންހެނުންނަށް ތަޢުލީމު ދިނުމަށް އޭނާ ތާއީދުކުރައްވާ ކަމަށެވެ. "އިދްލިބުގައި އަޅުގަނޑުމެންގެ ޔުނިވަރސިޓީތައް ވަނީ 8 އަހަރަށް ވުރެ ގިނަ ދުވަހު ހިންގަމުން ގެންގޮސްފައި. އަޅުގަނޑު ހިތުން ޔުނިވަރސިޓީތަކުގައި އަންހެނުންގެ އިންސައްތައަކީ 60 އިންސައްތައަށް ވުރެ މަތި،" އޭނާ ވިދާޅުވިއެވެ.

ގިނަ ސީރިއާގެ ރައްޔިތުން އޭނާގެ ބަސްތަކަށް އިތުބާރު ނުކުރާ ކަމަށް ރިޕޯޓުތަކުން ދައްކައެވެ. ކުރިއަށް އޮތް މަސްތަކުގައި ސީރިއާގެ އާ ވެރިންގެ ޢަމަލުތަކުން އެ ބޭފުޅުން ބޭނުންފުޅުވާ ސީރިއާގެ ސިފަ ދައްކުވައިދޭނެ ކަމަށް ބެލެވެއެވެ.