ނާސާއިން ކެޕްސޫލް ނުފޮނުވުމުން ދެ އެސްޓްރޯނޯޓުން ޖައްވުން އައުން ލަސްވެއްޖެ

ނާސާއިން ބުނެފައިވާ ގޮތުގައި، ބައިނަލްއަޤްވާމީ ޖައްވީ މަރުކަޒުގައި ތިބި ދެ އެސްޓްރޯނޯޓުން އެމެރިކާއަށް އެނބުރި ނައިސް އިތުރަށް މަޑުކުރަން ޖެހިއްޖެއެވެ. ބަޗް ވިލްމޯރް އަދި ސުނީ ވިލިއަމްސް އަކީ މިދިޔަ ޖޫން މަހު ޖައްވީ މަރުކަޒަށް ފޮނުވުނު ދެ އެސްޓްރޯނޯޓުންނެވެ. އެ ދެ މީހުން އެންމެ ފުރަތަމަ ރޭވިފައިވަނީ އެއް ހަފްތާގެ ތެރޭގައި އެނބުރި އައުމަށެވެ.

ނަމަވެސް، ބޮއިންގ އިން އުފައްދާފައިވާ ސްޓާލައިނާ ނަމަކަށް ކިޔާ ތަޖުރިބާކުރެވެމުންދާ އުޅަނދުގައި ދިމާވި ޓެކްނިކަލް މައްސަލަތަކާ ގުޅިގެން، އެ ދެ މީހުންގެ މުއްދަތު އަންނަ އަހަރުގެ ފެބްރުއަރީ މަހާ ހަމައަށް އިތުރުކުރެވުނެވެ. މިހާރު، ބައިނަލްއަޤްވާމީ ޖައްވީ މަރުކަޒަށް އައު ކެޕްސިއުލްއެއް ފޮނުވުމަށް ލަސްވުމާ ގުޅިގެން، އެ ދެ މީހުން އެނބުރި އަންނާނީ މާރިޗު މަހުގެ ފަހުކޮޅު  ނުވަތަ އޭޕްރިލް މަހުގެ ތެރޭގައި ކަމަށް ބެލެވެއެވެ.

ނާސާއިން ބުނެފައިވާ ގޮތުގައި މި ލަސްވުމަކީ މަހާނައުފަރިވެރިންނަށް ނުރައްކަލެއް ކުރިމަތިވާނެ ކަމެއް ނޫނެވެ. ނާސާއިން ނެރުނު ބަޔާނެއްގައި ބުނެފައިވަނީ، "ބައިނަލްއަޤްވާމީ ޖައްވީ މަރުކަޒަށް ނޮވެމްބަރު މަހު ދެ ފަހަރެއްގެ މަތިން ތަކެތި ފޯރުކޮށްދެވިފައިވާ ކަމަށާއި، އެތަނުގައި ތިބި މީހުންނަށް ބޭނުންވާ ކާނާ، ފެން، އަންނައުނު އަދި އޮކްސިޖަން ފަދަ ހުރިހާ އެއްޗެއް ރަނގަޅަށް ސްޓޮކް ކުރެވިފައިވާ" ކަމަށެވެ.

އޯޕަން ޔުނިވަރސިޓީގެ ޑރ. ސިމިއޮން ބާބަރު ވިދާޅުވި ގޮތުގައި، ގިނަ ޖައްވީ މަރުކަޒުގެ މިޝަންތައް ދެމިގެންދަނީ 6 މަސް ދުވަހުގެ މުއްދަތަށް ކަމަށާއި، ބައެއް މިޝަންތައް އަހަރު ދުވަހަށް ވެސް ދެމިގެންދާ ކަމަށެވެ. އެހެންކަމުން، ބަޗް އަދި ސުނީގެ މިހާރުވެސް ލަސްވެފައިވާ މިޝަން އިތުރަށް ދިގުދެމިގެންދިއުމަކީ މައްސަލައަކަށް ވާނެ ކަމެއް ނޫން ކަމަށް އޭނާ ވިދާޅުވިއެވެ.

ވިލްމޯރް އަދި ވިލިއަމްސް އެނބުރި އައުމުގެ ކުރިން އައު ކްރޫއެއް ފޮނުވަން ޖެހޭނެ ކަމަށާއި، ދެން އޮތް މިޝަން އެއް މަސް ދުވަހަށްވުރެ ގިނަ ދުވަހަށް ލަސްވެފައިވާ ކަމަށް ނާސާއިން ބުނެފައިވެއެވެ. ސްޕޭސްއެކްސް އިން އައު ޑްރެގަން ކެޕްސިއުލްއެއް ތައްޔާރުކުރުމުގައި ލަސްވުމާ ގުޅިގެން، މިހާރު މި މިޝަން ފުރޭނެ ކަމަށް ބެލެވެނީ އެންމެ އަވަހަށް މާރިޗު މަހުގެ ފަހުކޮޅުގައެވެ.