ހަފްތާ ބަންދުގައި މޫސުން ގޯސްވާނެ، ސަމާލުވޭ!

މިހަފްތާ ބަންދުގައި މުޅި ރާއްޖެއަށް މޫސުން ގޯސްވާނެ ކަމަށް މޫސުމާއި ބެހޭ ޤައުމީ އިދާރާއިން ލަފާކޮށްފިއެވެ. 

އެއިދާރައިން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ ހަފްތާ ބަންދުގައި މޫސުން ގޯސްވާނެ ކަމަށް ލަފާކުރެވިފައިވާތީ ސަމާލުވުމަށްް އިލްތިމާސްކޮށްފައެވެ.

އެއިދާރާގެ ޕޯސްޓުގައި ބުނެފައިވަނީ ހުކުރު ދުވަހު ރާއްޖޭގެ އުތުރަށް ގުގުރުމާއި އެކު ވިއްސާރަކުރާނެ ކަމަށެވެ. އަދި މެދުރާއްޖެތެރެއަށް ގަދަވަޔާއި އެކު ވިއްސާރަކުރާނެ ކަމަށާއި ރާއްޖޭގެ ދެކުނަށްވެސް ގަދަވަޔާއި އެކު ވިއްސާރަކުރާނެ ކަމަށެވެ.

ހޮނިހިރު ދުވަހު ރާއްޖޭގެ އުތުރަށް ގުގުރުމާއި އެކު ވިއްސާރަކުރާނެ ކަމަށާއި، މެދުރާއްޖެތެރެއަށް ގަދަވަޔާއި އެކު ވިއްސާރަކުރާނެ ކަމަށްވެސް ވަނީ ބުނެފައެވެ. މީގެއިތުރުން ހޮނިހިރު ދުވަހު ރާއްޖޭގެ ދެކުނަށް ގަދަވަޔާއި އެކު ވިއްސާރަކުރާނެ ކަމަށް ވަނީ ލަފާކޮށްފައެވެ.

މިމަހުގެ 18 ވަނަ ދުވަހުން ފެށިގެން ކުރިއަށް އޮތް ފަސް ދުވަހު ރާއްޖޭގެ މޫސުން ގޯސްވާނެ ކަމަށް ކުރިންވެސް މެޓް އޮފީހުން ވަނީ ލަފާކޮށްފައެވެ. 

މިއަދުން ފެށިގެން ސްކޫލްތައް ބަންދުވެ ދެހަފްތާގެ ބަންދަކަށް ސްކޫލް ކުދިން ދާއިރު މޫސުން ގޯސްވުމުން ދަތުރުތަކަށް ބުރުއަރާނެއެވެ. މޫސުން ގޯސްވުމުން ކަނޑު ދަތުުރުފަތުރު ކުރާ ފަރާތްތަކުން މޫސުމަށް ބެލުމަށް އަބަދުވެސް ކަމާބެހޭ އިދާރާތަކުން އިރުޝާދު ދެ ދެމުންގެންދެއެވެ.