އަލިފާނުގެ ހާދިސާއިން ގެދޮރު ގެއްލުނު މީހުން ވަގުތީހިޔާއިން ބަދަލުކުރެވޭނީ މަރާމާތަށްފަހު: އެންޑީއެމްއޭ

މާލޭގައި ހިނގި އަލިފާނުގެ ހާދިސާގައި ގެދޮރު ގެއްލުނު ގިނަ މީހުން އަދިވެސް ތިބީ ވަގުތީ ހިޔާތަކުގައިކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވިދާޅުވެއްޖެއެވެ.

މިމަހުގެ 12 ވަނަ ދުވަހު ގެދޮރުވެރިކަމާ ބެހޭ ވުޒާރާއާއި، ބިނާވެށްޓާ ބެހޭ ވުޒާރާގެ އިތުރުން ތިމާވެށްޓާ ބެހޭ ވުޒާރާ ހިންގަމުންދިޔަ އިމާރާތުގައި ހިނގި އަލިފާނުގެ ހާދިސާއާ ގުޅިގެން، އެ ސަރަހައްދުގެ އެހެން ބައެއް އިމާރާތްތަކުން މީހުން ވަގުތީ ހިޔާތަކަށް ބަދަލުކުރަން ޖެހުނެވެ. އެގޮތުން ތިން އިމާރާތެއްގެ 7 ގޭބިސީއަކުން 29 މީހުން ވަގުތީ ހިޔާތަކަށް ބަދަލުކުރެވުނެވެ. މީގެ ތެރޭގައި ހިމެނެނީ 15 ފިރިހެނުންނާއި 14 އަންހެނުންނެވެ. މި މީހުންނަކީ މ.ލޯކަށިގެ، މ.ކުދިމާވިލާ، އަދި މ.ލޫބިޔާ މި ތިން ގޭގެ މީހުންނެވެ.

އެންޑީއެމްއޭ އިން މަޢުލޫމާތު ދެއްވިގޮތުގައި، 29 މީހުންގެ ތެރެއިން 5 މީހުން ވަނީ އެމީހުންގެ ގެއަށް ބަދަލުވެފައެވެ. އެހެންނަމަވެސް ބާކީ 22 މީހުން އަދިވެސް ތިބީ ވަގުތީ ހިޔާތަކުގައެވެ. މި މީހުންގެ ވަގުތީ ބޯހިޔާވަހިކަން 5 ދުވަހަށް އިތުރުކުރެވިފައިވާކަމަށްވެސް އެންޑީއެމްއޭ އިން ވިދާޅުވިއެވެ. މި މީހުންގެ ޒަރޫރީ ބޭނުންތަކަށް މިވަގުތު ޚަރަދު ކުރަމުންދަނީ ސަރުކާރުންނެވެ.

އެންޑީއެމްއޭ އިން އިތުރަށް ވިދާޅުވީ، މި މީހުން އެމީހުންގެ އަމިއްލަ ގެދޮރަށް ބަދަލުކުރެވޭނީ އެތަންތަން މަރާމާތު ކުރެވިގެންކަމަށެވެ.

އަލިފާނުގެ ހާދިސާގައި ތިން ވުޒާރާ ވަނީ އެއްކޮށް އަނދާ ހުލިވެފައެވެ. އަދި އެ ވުޒާރާތަކުގެ މަސައްކަތް ވަނީ ދަރުބާރުގެއަށް ބަދަލުކޮށް ޚިދުމަތްދޭން ފަށްޓަވާފައެވެ.