ޚަބަރު
ޗުއްޓީއާއި ދިމާކޮށް މާލެއިން ފުރާ މީހުންނަށް ހޭލުންތެރިކަމުގެ ޕްރޮގްރާމެއް ހިންގައިފި

މިއަދު ފުލުހުން ހިންގި ހޭލުންތެރިކަމުގެ ޕްރޮގްރާމްގެ ތެރެއިން. ފޮޓޯ: ފުލުހުން
ޗުއްޓީއާއި ދިމާކޮށް މާލެއިން ފުރާ މީހުންނަށް އަމާޒުކޮށް ފުލުހުން ހޭލުންތެރިކަމުގެ ޕްރޮގްރާމެއް ހިންގައިފިއެވެ.
މި ޕްރޮގްރާމް ހިންގައިފައިވަނީ މިއަދު ފެށިގެންދާ ސްކޫލް ޗިުއްޓީ އާއި ގުޅިގެން މާލެއިން ރަށްރަށަށާއި ބޭރުގެ ޤައުމުތަކަށް ފުރާ މީހުންނަސް ޚާއްސަކޮށް މާލޭ ފުލުހުންގެ ފަރާތުންނެވެ.
ފުލުހުން ބުނެފައިވަނީ ޑިސެންބަަރު 19 ވަނަ ދުވަހު ކުރިއަށް ގެންދިޔަ މި ޕްރޮގްރާމަކީ ކުރިއަށް އޮތް ސްކޫލު ޗުއްޓީ ދުވަސްވަރުކަމުން ގިނަ ބަޔަކު މާލެއިން ފުރައިގެން ތަންތަނަށް ދާނެކަމަށް ބެލެވޭތީ، އެފަރާތްތަކާ ބައްދަލުކޮށް ފުރައިގެން ދިޔުމުގެ ކުރިން ގޯތި ގެދޮރަށާއި އަގުބޮޑު މުދަލަށް ރައްކާތެރިވާނެ ގޮތްތައް ކިޔައިދިނުމުގެ ގޮތުން ކުރިއަށް ގެންދިޔަ ޕްރޮގްރާމެއް ކަމަށެވެ.
މި މިޕްރޮގްރާމުގެ ތެރެއިން މިއަދު ވަނީ މާލޭގެ އެއް ނަންބަރު ޖެޓީ ސަަރަހައްދުގައި ފުރަން ގޮސްތިބި މީހުންނާ ބައްދަލުކޮށް މަޢުލޫމާދީފައި ކަމަށް ފުލުހުން ބުނެފައިވެއެވެ.
އެގޮތުން އަގުބޮޑު ތަކެތި ގޭގައި ނުބެހެއްޓުމަށް ނަސޭހަތްތެރިވެ، ގޯތި ގެދޮރުގެ ރައްކާތެރިކަމަށް ފިޔަވަޅު އަޅާފައިވޭތޯ ޔަޤީންކުރުމާއި ގެ ބެލެހެއްޓުމަށް އިތުބާރުކުރެވޭ މީހަކާ ހަވާލުކުރުމަށް އިިރުޝާދު ދީފައިވެއެވެ.
އަދި ޗުއްޓީގައި އުޅެނިކޮށް ކަމެއް ދިމާވެއްޖެ ޙާލަތެއްގައި ޢަމަލުކުރަންވީ ގޮތުގެ މަޢުލޫމާތު ދީފައިވެއެވެ. މީގެއިތުރުން ސައިކަލުގެ ސަލާމަތާއި ރައްކާތެރިކަން ފުރުމުގެ ކުރިން ކަށަވަރުކުރުމަށާއި މާލޭގައި ނަމަ ރޭގަނޑު އަލިކަން ހުންނަތަނެއް ނުވަތަ އާންމުކޮށް މީހުން ވަދެނުކުމެހަދާ މަގެއް ނުވަތަ ސީސީޓީވީ ކެމެރާ ހުންނަ އަދި ރައްކާތެރި ސަރަހައްދެއްގައި ސައިކަލު ޕާކުކޮށްފައި ބެހެއްޓުމަށް އިރުޝާދު ދީފައިވާކަަމަށްވެސް ފުލުހުން ބުނެފައިވެއެވެ.
މީގެއިތުރުން ސައިކަލުގެ ހުންގާނާއި ޝަޓަރ ވެސް ލޮކްކޮށް ތަޅުދަނޑި ޖަހާފައި ނުބަހައްޓާ އިތުބާރުކުރެވޭ ޒިންމާދާރު މީހަކާ ހަވާލުކުރުމަށްވެސް ހަނދާން ކޮށްދީފައިވެއެވެ.