ޚަބަރު
ޕެންޝަނާއި ގުޅޭ ޢިލްމީ ދިރާސާތައް ކުރުމަށް އެމްއެންޔޫއާއި އެކު އެއްބަސްވުމެއްގައި ސޮއިކޮށްފި
އެމްއެންޔޫ އާއި ޕެންޝަން އޮފީހާއި ދެމެދު އެއްބަސްވުމުގައި ސޮއިކުރެވުން. ފޮޓޯ: އެމްއެންޔޫ
ޕެންޝަނާއި ގުޅޭ ޢިލްމީ ދިރާސާތައް ކުރުމަށް މޯލްޑިވްސް ނޭޝަނަލް ޔުނިވަރސިޓީ އާއި އެކު އެއްބަސްވުމެއްގައި ސޮއިކޮށްފިއެވެ.
މިއެއްބަސްވުމުގައި ސޮއިކޮށްފައިވަނީ އެމްއެންޔޫއާއި މޯލްޑިވްސް ޕެންޝަން އެޑްމިނިސްޓްރޭޝަންގެ އޮފީހާއި އެކުއެވެ.
މި އެއްބަސްވުމުގައި އެމްއެންޔޫގެ ފަރާތުން ސޮއިކުރީ ވައިސް ޗާންސެލާ ޑރ.އައިޝަތު ޝެހެނާޒް އާދަމްއެވެ. އަދި ޕެންޝަން އޮފީހުގެ ފަރާތުން ސޮއިކުރެއްވީ މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ޗީފް އެގްޒެކެޓިވް އޮފިސަރު ޝުޖާތާ ހަލީމްއެވެ. މި އެއްބަސްވުމުގައި ސޮއިކުރެވުނީ މިއަދު އެމްއެންޔޫގައި ބޭއްވި ރަސްމިއްޔާތެއްގައެވެ.
މި އެއްބަސްވުމުގެ ދަށުން ކުރަން ޖޮއިންޓް ރިސާރޗް ޕްރޮޖެކްޓްތައް އެކުލަވާލައި ހިންގުމާއި މަޢުލޫމާތާއި ޑޭޓާ ބަދަލުކުރުމާއި ހޯދުމުގައި އެއްބާރުލުން ދޭނެއެވެ. އަދި ޕެންޝަނާއި ގުޅޭގޮތުން އާއްމުން ހޭލުންތެރިކުރުމާއި، ޕެންޝަނަށް އާއްމުން އަހުލުވެރިކުރުމަށް ޕްރޮގްރާމުތައް ހިންގުން ހިމެނޭ ކަމަށް އެމްއެންޔޫއިން ބުނެފައިވެއެވެ.
އެމްއެންޔޫއިން ބުނެފައިވަނީ މި އެއްބަސްވުމާއެކު ދެފަރާތުގެ ކުރިއެރުމާއި، މުޖުތަމަޢަށް ފައިދާހުރި އައު ފުރުޞަތުތައް ހޯދުމަށް މަގުފަހިވެގެންދާނެކަމަށެވެ.
