އެޗްޑީސީގެ ގޯތި މައްސަލައިބައެއް އިސް ވެރިން ސަސްޕެންޑްކޮށްފި

ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލައިގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ އިސް ވެރިންތަކެއް މިއަދު ސަސްޕެންޑްކޮށްފިއެވެ.

މި މައްސަލައިގައި އެޗްޑީސީގެ މެނޭޖިންގ ޑިރެކްޓަރު ފަޒުލް ރަޝީދު ސަސްޕެންޑްކޮށްފައިވާއިރު، އެންމެ ފަހުން ޗެއަރމަންކަމަށް އައްޔަންކުރި އަޙްމަދު ނާސިފް (ޑީޑީ) ފިޔަވައި ބޯޑުގެ އެހެން ހުރިހާ މެންބަރުން ވެސް ވަނީ ސަސްޕެންޑްކޮށްފައެވެ.

މީގެ އިތުރުން، އައިޓީ ކޮންސަލްޓެންޓް އަބްދުﷲ ޝުހޫދު، ޗީފް ފައިނޭންޝަލް އޮފިސަރު އަބްދުﷲ ފާއިދު، ޗީފް ބިޒްނަސް އޮފިސަރު އަދި މީޑިއާ ޑިޕާޓްމަންޓްގެ ހެޑް އަޙްމަދު ޔާމީން، އަދި ރިއަލްއެސްޓޭޓް ޑެޕިއުޓީ ޑިރެކްޓަރު އަޙްމަދު އައިމަން ވެސް ވަނީ ސަސްޕެންޑްކޮށްފައެވެ.

މި މައްސަލައިގައި ހިމެނޭ ގޯތިތަކާ ގުޅޭ ސިޓީތަކުގައި ސޮއިކޮށްފައިވަނީ އައިމަން ކަމަށް ވެއެވެ. މި މައްސަލަ  ފާހަގަވެފައިވަނީ ގޯތިތަކުގެ ވަށައިފާރު ރޭނުމުގެ ހުއްދައަށް އެދި އެޗްޑީސީއަށް ހުށަހެޅުމުން، އެ ރަޖިސްޓްރީތައް ވެރިފައި ކުރުމަށް ހައުސިންގ މިނިސްޓްރީއަށް ފޮނުވުމުންނެވެ.

މި މައްސަލައިގައި ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި ހިމެނޭ ބައެއް މީހުންނަށް ގޯތީގެ ރަޖިސްޓްރީ ހަދައިދީފައިވާކަން ވަނީ ހާމަވެފައެވެ. މީގެ ތެރޭގައި އެޗްޑީސީގެ އެމްޑީ ފަޒުލްގެ ބޭބެ، އެމްޑަބްލިއުއެސްސީގެ ޑެޕިއުޓީ މެނޭޖިންގ ޑިރެކްޓަރު މުޙައްމަދު ފަޒީލް ރަޝީދުގެ ނަން ހިމެނެއެވެ.

މި މައްސަލަ ސޯޝަލް މީޑިއާގައި ފެންމަތިވުމާ ގުޅިގެން ފުލުހުން ވަނީ ތަޙުޤީޤު ފަށައިފައެވެ. އަދި މައްސަލަ ޖެހިފައިވާ ގޯތީގެ ވަށައިފާރު ރޭނުމުގެ މަސައްކަތް ވެސް ފެށިފައިވާކަން ފާހަގަކުރެވެއެވެ.